ລະທຶກ! ເກີດເຫດໄຟໄໝ້ເຮືອເຟີຣີກາງທະເລປະເທດອິນໂດເນເຊຍ ເຈົ້າໜ້າທີ່ເລັ່ງອົບພະຍົບຜູ້ໂດຍສານ ແລະ ລູກເຮືອໄດ້ທັນເວລາ

ເມື່ອວັນທີ 20 ຕຸລາ 2026 ເກີດເຫດໄຟໄໝ້ເຮືອຂ້າມຟາກໂດຍສານຢ່າງລະທຶກຂວັນ ໂດຍໄຟໄດ້ລຸກໄໝ້ບໍລິເວນທ້າຍເຮືອ ໃນຂະນະທີ່ເຮືອກຳລັງເຂົ້າທຽບທ່າຢູ່ປະເທດອິນໂດເນເຊຍ. ໂຊກດີທີ່ເຈົ້າໜ້າທີ່ສາມາດອົບພະຍົບຜູ້ໂດຍສານແລະລູກເຮືອອອກຈາກເຮືອໄດ້ທັນເວລາ ໂດຍບໍ່ມີລາຍງານການສູນເສຍຊີວິດ ຫຼື ຜູ້ສູນຫາຍ. ຂະນະນີ້ກຳລັງເລັ່ງສືບສວນຫາສາເຫດຂອງເພີງໄໝ້.

ເຫດໄຟໄໝ້ເຮືອຂ້າມຟາກໂດຍສານຄັ້ງນີ້ເກີດຂຶ້ນໃນວັນອັງຄານທີ່ຜ່ານມາ ໃນຂະນະທີ່ເຮືອກຳລັງແລ່ນເຂົ້າໃກ້ທ່າເຮືອເມຣັກ ໃນແຂວງບັນເຕັນ ເທິງເກາະຊວາ ປະເທດອິນໂດເນເຊຍ. ເຈົ້າໜ້າທີ່ສາມາດອົບພະຍົບຜູ້ໂດຍສານແລະລູກເຮືອທັງໝົດອອກຈາກເຮືອໄດ້ຢ່າງປອດໄພ. ຕາມຂໍ້ມູນທີ່ໄດ້ຮັບ ຍັງບໍ່ມີລາຍງານຜູ້ໂດຍສານ ຫຼື ລູກເຮືອສູນຫາຍຈາກເຫດການນີ້.

ທ່ານ ວິນດີ ອັນດາເລ ໂຄສົກຂອງບໍລິສັດ PT ASDP Indonesia Ferry ຜູ້ໃຫ້ບໍລິການເຮືອຂ້າມຟາກຂອງລັດ ເປີດເຜີຍວ່າ ເຮືອຂ້າມຟາກຊື່ KMP Batu Mandi ໄດ້ອອກຈາກທ່າເຮືອບາກາວເຮນີ ໃນແຂວງລຳປຸງ ທາງຕອນໃຕ້ສຸດຂອງເກາະສຸມາຕຣາ ໃນເວລາປະມານ 14:52 ໂມງ ຕາມເວລາທ້ອງຖິ່ນ.

ຫຼັງຈາກອອກເດີນທາງໄດ້ປະມານ 2 ຊົ່ວໂມງ ໃນຂະນະທີ່ເຮືອກຳລັງເຂົ້າໃກ້ທ່າທຽບເຮືອໝາຍເລກ 6 ຂອງທ່າເຮືອເມຣັກ ໃນເມືອງຈີເລກອນ ແຂວງບັນເຕັນ ເຈົ້າໜ້າທີ່ປະຈຳຝັ່ງໄດ້ສັງເກດເຫັນແປວໄຟຢູ່ບໍລິເວນທ້າຍເຮືອ. ຈາກນັ້ນຈຶ່ງໄດ້ດຳເນີນມາດຕະການສຸກເສີນເພື່ອຊ່ວຍເຫຼືອຜູ້ທີ່ຢູ່ເທິງເຮືອໃຫ້ອອກຈາກຈຸດອັນຕະລາຍໂດຍໄວ.

ໂຄສົກບໍລິສັດລະບຸວ່າ ການອົບພະຍົບຜູ້ໂດຍສານແລະລູກເຮືອສຳເລັດພາຍໃນເວລາບໍ່ຮອດ 1 ຊົ່ວໂມງ ໂດຍມີເຈົ້າໜ້າທີ່ຈາກອົງການທ່າເຮືອ ສຳນັກງານຄົ້ນຫາແລະກູ້ໄພແຫ່ງຊາດອິນໂດເນເຊຍ ລວມທັງຕຳຫຼວດ ເຂົ້າຮ່ວມປະຕິບັດການຮັບມືກັບເຫດການ.

ເຖິງແມ່ນວ່າທຸກຄົນຈະຖືກອົບພະຍົບອອກມາໄດ້ຢ່າງປອດໄພ ແຕ່ສາເຫດທີ່ແນ່ນອນຂອງເຫດໄຟໄໝ້ຍັງບໍ່ຖືກເປີດເຜີຍ. ຂະນະທີ່ບໍລິສັດຜູ້ໃຫ້ບໍລິການເຮືອຂ້າມຟາກກຳລັງປະສານງານກັບອົງການທ່າເຮືອແລະໜ່ວຍງານທີ່ກ່ຽວຂ້ອງ ເພື່ອສະໜັບສະໜູນການກວດສອບຂໍ້ເທັດຈິງ ແລະ ສືບສວນຫາສາເຫດຂອງເຫດໄຟໄໝ້ຄັ້ງນີ້ຕໍ່ໄປ.

ທີ່ມາ: AP