ສັ່ງຫຼຸດຄວາມໄວເນັດ Starshield ຊ່ວຍຢູເຄຣນຕ້ານສຶກຣັດເຊຍ

ໜັງສືພິມວໍລສະຕຣີທເຈີນັລ (WSJ) ລາຍງານເມື່ອວັນອັງຄານ (20 ຕຸລາ) ວ່າ ອີລອນ ມັສກ໌ ເປັນຜູ້ສັ່ງຫຼຸດບໍລິການອິນເຕີເນັດເກຣດທະຫານ Starshield ສຳລັບຢູເຄຣນ ຫຼັງຈາກທີ່ມະຫາເສດຖີດ້ານເຕັກໂນໂລຊີລາຍນີ້ອອກມາອ້າງວ່າ ຂໍ້ຈຳກັດໃດໆ ກ່ຽວກັບລະບົບສື່ສານທີ່ດຳເນີນການໂດຍ SpaceX ນັ້ນ ສຸດທ້າຍແລ້ວຕ້ອງມາຈາກຄຳສັ່ງຂອງປະທານາທິບໍດີສະຫະລັດ.

WSJ ລາຍງານໂດຍອ້າງເຈົ້າໜ້າທີ່ສະຫະລັດ ທີ່ບໍ່ເປີດເຜີຍຊື່ວ່າ ມັສກ໌ ໄດ້ຈຳກັດຄວາມໄວໃນການເຊື່ອມຕໍ່ອຸປະກອນຂອງຢູເຄຣນເຂົ້າກັບລະບົບ ເຮັດໃຫ້ໂດຣນບາງສ່ວນຂອງຄຽບ (Kyiv) ໃຊ້ງານບໍ່ໄດ້.

ຂະນະດຽວກັນ, ພີທ ເຮກເຊທ (Pete Hegseth) ລັດຖະມົນຕີວ່າການກະຊວງປ້ອງກັນປະເທດສະຫະລັດ ຢືນຢັນເມື່ອວັນອັງຄານ (20) ວ່າ ເພັນຕາກອນບໍ່ໄດ້ສັ່ງການປ່ຽນແປງໃດໆ ກັບ Starshield ເຊິ່ງໄດ້ກ່າວວ່າ “ພວກເຮົາບໍ່ໄດ້ຖອນຫຍັງອອກໄປເລີຍ”.

“ຈາກມຸມມອງຂອງພວກເຮົາ ແມ່ນບໍ່ມີຫຍັງປ່ຽນແປງ ພວກເຮົາບໍ່ໄດ້ອອກຄຳສັ່ງ ຫຼື ຫຍັງທຳນອງນັ້ນ” ເຂົາກ່າວ.

ເມື່ອວັນສຸກທີ່ຜ່ານມາ (16), ປະທານາທິບໍດີ ໂດນັລ ທຣຳ ແຫ່ງສະຫະລັດ ກ່າວວ່າ ເຂົາບໍ່ໄດ້ຮ້ອງຂໍໃຫ້ຈຳກັດການໃຊ້ງານ Starshield.

“ບໍ່ແມ່ນຂ້ອຍ, ແລະ ຂ້ອຍກໍຄິດວ່າບໍ່ແມ່ນ ອີລອນ ຄືກັນ” ທຣຳກ່າວ.

ຄຽບລາຍງານເມື່ອອາທິດທີ່ແລ້ວກ່ຽວກັບການຈຳກັດການໃຊ້ງານບໍລິການດັ່ງກ່າວ ເຊິ່ງຄຽບເບິ່ງວ່າເປັນສິ່ງສຳຄັນໃນການປ້ອງກັນການຮຸກຮານຂອງມົສກູ (Moscow) ຫຼັງຈາກທີ່ ທຣຳ ວິພາກວິຈານຢູເຄຣນ ແລະ ຮຽກຮ້ອງໃຫ້ຄຽບຢຸດໂຈມຕີໂຮງກັ່ນນ້ຳມັນຂອງຣັດເຊຍ.

ກ່ອນໜ້ານີ້, ມັສກ໌ ເຄີຍກ່າວວ່າ “ຂໍ້ຈຳກັດໃດໆ ກ່ຽວກັບຄວາມໄວ ຫຼື ການໃຊ້ງານ” ຂອງລະບົບ Starshield ນັ້ນ “ຈະຖືກຕັດສິນໂດຍກອງທັບສະຫະລັດ ແລະ ທ້າຍທີ່ສຸດກໍໂດຍປະທານາທິບໍດີສະຫະລັດ” ເຊິ່ງໝາຍເຖິງ ທຣຳ.

ຢູເຄຣນໃຊ້ Starshield ບໍລິການດາວທຽມລະດັບກອງທັບຂອງ Starlink ສຳລັບການສື່ສານໃນສະໜາມຮົບ, ການໂຈມຕີໄລຍະກາງໃນດິນແດນທີ່ຣັດເຊຍຢຶດຄອງ ແລະ ໂດຣນສະກັດກັ້ນ. ນອກຈາກນີ້ ຍັງໃຊ້ລະບົບດາວທຽມພົນລະເຮືອນ Starlink ຂອງ SpaceX ນຳອີກ.

ຄວາມສຳພັນລະຫວ່າງວໍຊິງຕັນ ແລະ ຄຽບ ຕຶງຄຽດຫຼາຍຂຶ້ນໃນຊ່ວງບໍ່ກີ່ວັນທີ່ຜ່ານມາ ໂດຍ ທຣຳ ຮຽກຮ້ອງໃຫ້ປົດປະທານາທິບໍດີ ໂວໂລດີມີຣ ເຊເລນສະກີ ຫຼັງຈາກທີ່ເຂົາວິຈານຂໍ້ຕົກລົງຂອງສະຫະລັດ ທີ່ອະນຸຍາດໃຫ້ນ້ຳມັນດີເຊລຣັດເຊຍເຂົ້າສູ່ຕະຫຼາດໂລກຫຼາຍຂຶ້ນ.

ທີ່ມາ: ຣອຍເຕີຣ໌ (Reuters)