ຄື້ນທະເລໃຫຍ່ຊັດຝັ່ງຕາເວັນອອກໄຕ້ຫວັນ ຂະນະພາຍຸໄຕ້ຝຸ່ນ ຈຳປີ ເຄື່ອນເຂົ້າໃກ້

ເກີດຄື້ນທະເລຂະໜາດໃຫຍ່ຊັດເຂົ້າຝັ່ງທາງຕາເວັນອອກຂອງໄຕ້ຫວັນ ໃນວັນສຸກ ທີ 23 ຕຸລາ 2026 ຂະນະທີ່ພາຍຸໄຕ້ຝຸ່ນ ຈຳປີ (Champi) ເຄື່ອນເຂົ້າໃກ້ເກາະ ສົ່ງຜົນໃຫ້ເຂດຊາຍຝັ່ງທະເລມີສະພາບອັນຕະລາຍຈາກຄື້ນສູງ ແລະ ລົມແຮງ.

ກະຊວງມະຫາດໄທຂອງໄຕ້ຫວັນໄດ້ເຕືອນປະຊາຊົນໃຫ້ຫຼີກລ່ຽງການເຂົ້າໃກ້ຊາຍຝັ່ງທະເລ ແລະ ທ່າເຮືອ ເນື່ອງຈາກຄື້ນທະເລທີ່ຮຸນແຮງ ປະກອບກັບກະແສລົມຈາກພາຍຸ ແລະ ມໍລະສຸມຕາເວັນອອກສຽງເໜືອ ທີ່ພັດເສີມໃຫ້ສະພາບອາກາດຮຸນແຮງຂຶ້ນ.

ກ່ອນໜ້ານີ້ ໜ່ວຍງານອຸຕຸນິຍົມຂອງໄຕ້ຫວັນໄດ້ເຕືອນວ່າ ພາຍຸຈຳປີອາດສ້າງຄື້ນທະເລສູງກວ່າ 6 ແມັດ ໃນບາງພື້ນທີ່ ພ້ອມທັງມີລົມແຮງ ແລະ ຝົນຕົກໜັກ. ທາງການຈຶ່ງຂໍໃຫ້ປະຊາຊົນຕິດຕາມຂ່າວສານຢ່າງໃກ້ຊິດ ແລະ ຫ້າມເຂົ້າໄປຫຼິ້ນນ້ຳ ຫຼື ຢືນເບິ່ງຄື້ນຢູ່ຕາມຊາຍຝັ່ງໃນຊ່ວງທີ່ມີຄື້ນສູງ.

ພາຍຸຈຳປີເຄີຍມີຄວາມຮຸນແຮງເຖິງລະດັບຊຸບເປີໄຕ້ຝຸ່ນ ກ່ອນຈະອ່ອນກຳລັງລົງເລັກນ້ອຍ ແຕ່ຍັງສາມາດສ້າງຄວາມເສຍຫາຍຈາກລົມແຮງ ຝົນຕົກໜັກ ແລະ ຄື້ນທະເລສູງໄດ້. ທາງການໄຕ້ຫວັນຈຶ່ງເນັ້ນຢ້ຳໃຫ້ປະຊາຊົນລະມັດລະວັງ ແລະ ໃຫ້ຄວາມສຳຄັນຕໍ່ຄວາມປອດໄພເປັນຫຼັກ.

ທີ່ມາ: CBS News, Reuters ແລະ Focus Taiwan