ວັນອັງຄານ ທີ 17 ພະຈິກ 2026ອັບເດດລ່າສຸດ 19:46ໂຄສະນາ ແລະ ຮ່ວມມື[email protected]WhatsApp +856 20 5888 6182ຕິດຕໍ່
MAHAXAN.COM · ຂ່າວສານພາສາລາວ ສຳລັບຜູ້ອ່ານທົ່ວປະເທດ

ເສຍຊີວິດແລ້ວ 182 ສົບ ອິດສະຣາເອວໂຈມຕີເລບານອນຄັ້ງໃຫຍ່ ບາດເຈັບອີກ 890 ຄົນ

ໂດຍ kaling
· 7 ເດືອນ ກ່ອນອ່ານ 2 ນາທີ62 ຄັ້ງ
ເສຍຊີວິດແລ້ວ 182 ສົບ ອິດສະຣາເອວໂຈມຕີເລບານອນຄັ້ງໃຫຍ່ ບາດເຈັບອີກ 890 ຄົນ
ADadvertisement
ADadvertisement
ADadvertisement

ການໂຈມຕີຮອບໃຫຍ່ຂອງອິດສະຣາແອລໃນປະເທດເລບານອນ ເຮັດໃຫ້ມີຜູ້ເສຍຊີວິດແລ້ວ 182 ສົບ ແລະ ບາດເຈັບອີກຫຼາຍຮ້ອຍຄົນ ໃນຂະນະທີ່ອີຣ່ານຮຽກຮ້ອງໃຫ້ອິດສະຣາແອລຢຸດໂຈມຕີ ຫາກບໍ່ດັ່ງນັ້ນຈະມີມາດຕະການຕອບໂຕ້

ສຳນັກຂ່າວຕ່າງປະເທດລາຍງານໃນວັນທີ 8 ເມສາ 2026 ວ່າ ອິດສະຣາແອລໄດ້ເປີດການໂຈມຕີທາງອາກາດຮອບໃຫຍ່ທົ່ວເລບານອນ ສົ່ງຜົນໃຫ້ມີຜູ້ເສຍຊີວິດ ແລະ ບາດເຈັບຫຼາຍຮ້ອຍຄົນ ໃນຂະນະທີ່ເຈົ້າໜ້າທີ່ອິດສະຣາແອລລະບຸວ່າ ສົງຄາມກັບກຸ່ມຮິດສະບອດລາຮ໌ຈະຍັງຄົງດຳເນີນຕໍ່ໄປ ເຖິງວ່າຈະມີການປະກາດຢຸດຍິງກັບອີຣ່ານແລ້ວກໍຕາມ

ອິດສະຣາແອລລະບຸວ່ານີ້ຄືການໂຈມຕີທາງອາກາດຮອບໃຫຍ່ທີ່ສຸດໃນຄວາມຂັດແຍ້ງຄັ້ງນີ້ ເຊິ່ງເລີ່ມຕົ້ນຕັ້ງແຕ່ວັນທີ 28 ກຸມພາ ໂດຍໂຈມຕີເປົ້າໝາຍກວ່າ 100 ຈຸດ ພາຍໃນເວລາພຽງ 10 ນາທີ ເຊິ່ງອ້າງວ່າເປັນສູນບັນຊາການ ແລະ ທີ່ຕັ້ງທາງທະຫານຂອງກຸ່ມຮິດສະບອດລາຮ໌

ຈຸດທີ່ຕົກເປັນເປົ້າໝາຍຄອບຄຸມທັງເຂດຊານເມືອງທາງຕອນໃຕ້ຂອງນະຄອນຫຼວງເບຍຣູດ ພື້ນທີ່ທາງຕອນໃຕ້ຂອງເລບານອນ ແລະ ຫຸບເຂົາເບກາ (Bekaa Valley) ທາງທິດຕາເວັນອອກ

ກະຊວງສາທາລະນະສຸກຂອງເລບານອນລະບຸວ່າ ການໂຈມຕີຂອງອິດສະຣາແອລເຮັດໃຫ້ມີຜູ້ເສຍຊີວິດແລ້ວຢ່າງໜ້ອຍ 182 ສົບ ແລະ ບາດເຈັບອີກ 890 ຄົນ ໂດຍຄາດວ່າຈຳນວນຜູ້ເສຍຊີວິດຈະເພີ່ມຂຶ້ນອີກ ເນື່ອງຈາກເຈົ້າໜ້າທີ່ຍັງຄົງຮີບຄົ້ນຫາຜູ້ລອດຊີວິດທີ່ອາດຕິດຢູ່ໃຕ້ຊາກພັງເທີນ

ການໂຈມຕີດັ່ງກ່າວເກີດຂຶ້ນຫຼັງຈາກສຳນັກງານນາຍົກລັດຖະມົນຕີ ເບນຈາມິນ ເນທານຢາຮູ ໄດ້ປະຕິເສດຄຳອ້າງຂອງປາກີສະຖານ ຊຶ່ງເປັນຕົວກາງໄກ່ເກ່ຍຂໍ້ຕົກລົງລະຫວ່າງສະຫະລັດ ແລະ ອີຣ່ານ ທີ່ລະບຸວ່າການຢຸດຍິງນັ້ນຄອບຄຸມຄວາມຂັດແຍ້ງໃນເລບານອນດ້ວຍ

ໃນຂະນະທີ່ໃນນະຄອນຫຼວງວໍຊິງຕັນ ນາງ ການໂລລີນ ລີວິດ ໂຄສົກທຳເນຍບຂາວຂອງປະທານາທິບໍດີ ໂດນັລ ທຣຳ ກໍ່ໄດ້ກ່າວຄ້າຍຄືກັນວ່າ ເລບານອນບໍ່ໄດ້ຢູ່ໃນຂອບເຂດຂອງຂໍ້ຕົກລົງນີ້

ເຖິງຢ່າງໃດກໍຕາມ ອີຣ່ານຢືນຢັນວ່າການຢຸດຍິງໃນເລບານອນເປັນສ່ວນໜຶ່ງຂອງຂໍ້ຕົກລົງດ້ວຍ ແລະ ໄດ້ອອກມາເຕືອນອິດສະຣາແອລວ່າຈະມີມາດຕະການຕອບໂຕ້ ຫາກເລບານອນຍັງຄົງຖືກໂຈມຕີແບບນີ້ຕໍ່ໄປ

ດ້ານກຸ່ມຮິດສະບອດລາຮ໌ລະບຸວ່າທາງກຸ່ມມີສິດ໌ທີ່ຈະຕອບໂຕ້ ແລະ ໄດ້ເຕືອນຄອບຄົວຜູ້ພັດຖິ່ນໃຫ້ລໍການປະກາດຢຸດຍິງຢ່າງເປັນທາງການກ່ອນທີ່ຈະພະຍາຍາມເດີນທາງກັບຄືນເຮືອນ

ສ່ວນທຳເນຍບປະທານາທິບໍດີເລບານອນລະບຸວ່າ ຈະຍັງຄົງ “ໃຊ້ຄວາມພະຍາຍາມເພື່ອໃຫ້ເລບານອນຖືກລວມເຂົ້າເປັນສ່ວນໜຶ່ງຂອງສັນຕິພາບໃນພາກພື້ນ”

ທັງນີ້ ການໂຈມຕີຮອບຫຼ້າສຸດເຮັດໃຫ້ຈຳນວນຜູ້ເສຍຊີວິດໃນເລບານອນ ນັບຕັ້ງແຕ່ຄວາມຂັດແຍ້ງຮອບໃໝ່ປະທຸຂຶ້ນ ເພີ່ມຂຶ້ນເປັນຢ່າງໜ້ອຍ 1,710 ສົບ ຕາມການເປີດເຜີຍຂອງກະຊວງສາທາລະນະສຸກເລບານອນ ໂດຍໃນຈຳນວນນີ້ລວມທັງເດັກຢ່າງໜ້ອຍ 130 ຄົນ ໃນຂະນະທີ່ຝ່າຍອິດສະຣາແອລອ້າງວ່າໄດ້ສັງຫານນັກລົບຮິດສະບອດລາຮ໌ໄປແລ້ວກວ່າ 1,100 ສົບ

ນອກຈາກນັ້ນ ຍັງມີປະຊາຊົນຫຼາຍກວ່າ 1.2 ລ້ານຄົນ ຫຼືຄິດໄລ່ເປັນ 1 ໃນ 5 ຂອງຈຳນວນປະຊາກອນທັງໝົດຂອງເລບານອນ ທີ່ຕ້ອງກາຍເປັນຜູ້ພັດຖິ່ນເພາະການໂຈມຕີຂອງອິດສະຣາແອລ
ຂ່າວຈາກ: bbc

ຂ່າວນີ້ມີປະໂຫຍດບໍ່?

ສົ່ງຕໍ່ໃຫ້ໝູ່ ແລະ ຄອບຄົວ ທີ່ຄວນຮູ້ — ກົດດຽວກໍແບ່ງປັນໄດ້

ອ່ານແລ້ວ 62 ຄັ້ງ
‹ ກັບໄປໝວດຂ່າວຕ່າງປະເທດ
ມື້ນີ້ · ຂໍ້ມູນສົດ ວັນອັງຄານ 17 ພະຈິກ 2026 · ຂຶ້ນ 8 ຄ່ຳ ເດືອນ 12 ເປີດໜ້າມື້ນີ້

ອ່ານຕໍ່