ຜົນຄະແນນນິຍົມທຣຳປ໌ຮ່ວງຕໍ່າສຸດສະໄໝທີ່ສອງ ເຫດຄົນອາເມລິກາບໍ່ເຫັນດີກັບສົງຄາມອີຣານ
ຄະແນນນິຍົມຂອງປະທານາທິບໍດີສະຫະລັດ ໂດນັລ ທຣຳປ໌ ຫຼຸດລົງແຕະລະດັບຕໍ່າສຸດນັບຕັ້ງແຕ່ເລີ່ມດຳລົງຕຳແໜ່ງສະໄໝທີ່ 2 ໂດຍມີປັດໄຈຫຼັກຈາກການບໍລິຫານຈັດການສົງຄາມກັບອີຣານ ຕາມຜົນສຳຫຼວດລ່າສຸດຂອງ NBC News.
ຜົນສຳຫຼວດທີ່ເຜີຍແຜ່ເມື່ອວັນອາທິດ ລະບຸວ່າ ມີຄົນອາເມລິກາພຽງ 37% ທີ່ໃຫ້ການສະໜັບສະໜູນການເຮັດວຽກຂອງທຣຳປ໌ ໃນຂະນະທີ່ເຖິງ 63% ບໍ່ເຫັນດີກັບຜົນງານຂອງລາວ ໃນຈຳນວນນີ້ ມີເຖິງ 50% ທີ່ບໍ່ເຫັນດີຢ່າງແຮງ ສະທ້ອນກະແສຄວາມບໍ່ພໍໃຈທີ່ເພີ່ມສູງຂຶ້ນ.
ເມື່ອເຈາະສະເພາະປະເດັນສົງຄາມກັບອີຣານ ພົບວ່າ ມີພຽງ 33% ຂອງຜູ້ຕອບແບບສອບຖາມທີ່ເຫັນດີກັບການດຳເນີນນະໂຍບາຍຂອງທຣຳປ໌ ໃນຂະນະທີ່ 67% ລະບຸວ່າບໍ່ເຫັນດີ ບໍ່ວ່າຈະໃນລະດັບຫຼາຍຫຼືໜ້ອຍ.
ຜົນສຳຫຼວດຍັງສະທ້ອນຄວາມແຕກແຍກທາງການເມືອງຢ່າງຊັດເຈນ ໂດຍ 82% ຂອງກຸ່ມເດໂມແຄຣັດ ແລະ ຜູ້ມີສິດເລືອກຕັ້ງອິດສະຫລະ ບໍ່ເຫັນດີກັບສົງຄາມ ໃນຂະນະທີ່ 74% ຂອງພັກຣີພັບລິກັນ ກົງກັນຂ້າມໃຫ້ການສະໜັບສະໜູນ.
ອີກໜຶ່ງປະເດັນສຳຄັນຄືຄົນລຸ້ນໃໝ່ ມີແນວໂນ້ມບໍ່ເຫັນດີກັບສົງຄາມຫຼາຍເປັນພິເສດ ໂດຍລວມແລ້ວ 61% ຂອງຜູ້ໃຫຍ່ໃນສະຫະລັດ ເຫັນວ່າປະເທດບໍ່ຄວນດຳເນີນການທາງທະຫານເພີ່ມເຕີມໃນອີຣານ ແຕ່ຕົວເລກນີ້ພຸ່ງສູງເຖິງ 74% ໃນກຸ່ມຜູ້ທີ່ມີອາຍຸຕໍ່າກວ່າ 30 ປີ.
ທັງນີ້ ຜົນສຳຫຼວດດັ່ງກ່າວສະທ້ອນໃຫ້ເຫັນເຖິງແຮງກົດດັນທີ່ເພີ່ມຂຶ້ນຕໍ່ລັດຖະບານສະຫະລັດ ທ່າມກາງຄວາມຂັດແຍ່ງໃນຕາເວັນອອກກາງ ແລະ ອາດສົ່ງຜົນຕໍ່ທິດທາງທາງການເມືອງ ລວມເຖິງການຕັດສິນໃຈດ້ານນະໂຍບາຍຂອງລັດຖະບານໃນໄລຍະຕໍ່ໄປ.
