ເກີດເຫດໄຟໄໝ້ເຄື່ອງຈັກເຮືອບິນ Airbus A320 ຂອງ LATAM ກ່ອນຂຶ້ນບິນ ທີ່ກຸງລິມາ ປະເທດເປຣູ

ເມື່ອວັນທີ 19 ຕຸລາ 2026 ຕາມເວລາທ້ອງຖິ່ນຂອງປະເທດເປຣູ ເຮືອບິນ Airbus A320 ຂອງສາຍການບິນ LATAM ໝາຍເລກທະບຽນ CC-BFS ເກີດໄຟໄໝ້ທີ່ເຄື່ອງຈັກດ້ານຊ້າຍ ໃນຂະນະກຽມອອກເດີນທາງຈາກສະໜາມບິນນານາຊາດ Jorge Chávez ໃນກຸງລິມາ ປະເທດເປຣູ. ເຮືອບິນລຳດັ່ງກ່າວແມ່ນຖ້ຽວບິນ LA2302 ທີ່ມີປາຍທາງໄປຍັງເມືອງປິອູຣາ ທາງພາກເໜືອຂອງປະເທດ.

ຄລິບວິດີໂອທີ່ເຜີຍແຜ່ຢູ່ໃນສື່ສັງຄົມອອນລາຍ ສະແດງໃຫ້ເຫັນແປວໄຟ ແລະຄວັນສີດຳພວຍອອກມາຈາກເຄື່ອງຈັກດ້ານຊ້າຍ ໂດຍບາງພາບຍັງເຫັນໄຟຢູ່ບໍລິເວນໃກ້ປີກເຮືອບິນ. ເຈົ້າໜ້າທີ່ດັບເພີງຂອງສະໜາມບິນໄດ້ເຂົ້າຄວບຄຸມເພີງ ກ່ອນຈະດຳເນີນການອົບພະຍົບຜູ້ໂດຍສານທັງໝົດລົງຈາກເຮືອບິນ. ເບື້ອງຕົ້ນຍັງບໍ່ມີລາຍງານຜູ້ໄດ້ຮັບບາດເຈັບຈາກເຫດການຄັ້ງນີ້.

ສາຍການບິນ LATAM ໄດ້ອອກຖະແຫຼງການວ່າ ເກີດ “ຂໍ້ຂັດຂ້ອງທາງເຕັກນິກທີ່ບໍ່ຄາດຄິດ” ກ່ອນການຂຶ້ນບິນ ຈຶ່ງຕັດສິນໃຈໃຫ້ຜູ້ໂດຍສານລົງຈາກເຮືອບິນທັງໝົດ ເພື່ອຄວາມປອດໄພ. ທາງສາຍການບິນກຳລັງໃຫ້ການດູແລຜູ້ໂດຍສານ ພ້ອມທັງຈັດຫາຖ້ຽວບິນອື່ນເພື່ອພາຜູ້ໂດຍສານໄປຍັງຈຸດໝາຍປາຍທາງ ແລະຈະດຳເນີນການກວດສອບທາງເຕັກນິກເພື່ອຄົ້ນຫາສາເຫດຂອງເຫດການ.

ຂະນະນີ້ ສາເຫດທີ່ແນ່ນອນຂອງເຫດໄຟໄໝ້ເຄື່ອງຈັກດັ່ງກ່າວຍັງບໍ່ທັນຖືກເປີດເຜີຍ.