ຄະແນນນິຍົມຂອງ “ທຣຳ” ດິ່ງລົງເຫຼືອພຽງ 31% ຕ່ຳສຸດເປັນປະຫວັດການ

ໃນໄລຍະນີ້ “ໂດນັລ ທຣຳ” ປະທານາທິບໍດີສະຫະລັດ ກຳລັງເດີນສາຍຫາສຽງທຸກມື້ຕາມເມືອງຕ່າງໆ ເນື່ອງຈາກເຫຼືອເວລາອີກບໍ່ຮອດ 2 ອາທິດ ກໍຈະຮອດວັນທີ 3 ພະຈິກ ເຊິ່ງເປັນວັນເລືອກຕັ້ງກາງສະໄໝຂອງສະຫະລັດ.

ແຕ່ໃນຂະນະທີ່ຜົນສຳຫຼວດຄະແນນນິຍົມລ່າສຸດຂອງ Reuters/Ipsos ພົບວ່າ ຄະແນນນິຍົມຂອງທຣຳຫຼຸດລົງຕ່ຳສຸດເປັນປະຫວັດການ ເຫຼືອພຽງ 31% ຂະນະທີ່ແນວໂນ້ມການລົງຄະແນນໃຫ້ພັກຣີພັບລິກັນຢູ່ທີ່ 35%.

ຜົນສຳຫຼວດຂອງ Reuters ຮ່ວມກັບ Ipsos ເຊິ່ງເປັນບໍລິສັດວິໄຈຕະຫຼາດ ແລະສຳຫຼວດຄວາມຄິດເຫັນຂອງຜູ້ບໍລິໂພກລະດັບໂລກ ໄດ້ເປີດເຜີຍຜົນສຳຫຼວດທີ່ສິ້ນສຸດການເກັບຂໍ້ມູນໃນມື້ວານນີ້ (19 ຕຸລາ) ໂດຍມີຊາວອາເມຣິກາເຂົ້າຮ່ວມຕອບແບບສອບຖາມທັງໝົດ 1,679 ຄົນ ໃນນັ້ນເປັນຜູ້ທີ່ລົງທະບຽນມີສິດເລືອກຕັ້ງແລ້ວ 1,279 ຄົນ.

ຜົນສຳຫຼວດພົບວ່າ ຊາວອາເມຣິກາພຽງ 31% ເຫັນດີກັບຜົນງານການເຮັດວຽກຂອງປະທານາທິບໍດີໂດນັລ ທຣຳ ເຊິ່ງຫຼຸດລົງ 1 ຈຸດເປີເຊັນຈາກການສຳຫຼວດເມື່ອ 2 ອາທິດກ່ອນ ນັບເປັນຄະແນນນິຍົມຕ່ຳສຸດເປັນປະຫວັດການ.

ສ່ວນຜົນສຳຫຼວດແນວໂນ້ມການເລືອກພັກການເມືອງຂອງຜູ້ມີສິດເລືອກຕັ້ງທີ່ລົງທະບຽນແລ້ວ ພົບວ່າ ປະມານ 47% ເລືອກພັກເດໂມແຄຣັດ ຂະນະທີ່ພັກຣີພັບລິກັນມີພຽງ 35% ເຮັດໃຫ້ພັກເດໂມແຄຣັດມີຄະແນນນຳເຖິງ 12 ຈຸດເປີເຊັນ.

ຕົວເລກດັ່ງກ່າວເພີ່ມແຮງກົດດັນຕໍ່ພັກຣີພັບລິກັນ ກ່ອນການເລືອກຕັ້ງກາງສະໄໝໃນວັນທີ 3 ພະຈິກ ເຊິ່ງຈະເປັນຕົວຊີ້ວັດສຳຄັນວ່າ ພັກຣີພັບລິກັນຈະຍັງສາມາດຮັກສາສຽງຂ້າງຫຼາຍໃນສະພາຄອງເກຣສໄດ້ຫຼືບໍ່ ແລະອາດເພີ່ມຄວາມຫວັງໃຫ້ພັກເດໂມແຄຣັດໃນການຄອງສຽງຂ້າງຫຼາຍໃນສະພາຜູ້ແທນລາຊະດອນ ແລະວຸດທິສະພາຂອງສະຫະລັດ.

ສຳລັບພັກຣີພັບລິກັນ ການສູນເສຍສຽງຂ້າງຫຼາຍໃນສະພາໃດໜຶ່ງ ອາດເຮັດໃຫ້ການຜັກດັນວາລະທາງການເມືອງຂອງທຣຳໃນຊ່ວງ 2 ປີສຸດທ້າຍຂອງວາລະປະທານາທິບໍດີ ມີຄວາມສັບຊ້ອນຫຼາຍຂຶ້ນ.

ທັງນີ້ ສິ່ງທີ່ຕ້ອງຕິດຕາມແມ່ນ ໃນຊ່ວງໂຄ້ງສຸດທ້າຍກ່ອນວັນເລືອກຕັ້ງ ທຣຳ ແລະພັກຣີພັບລິກັນຈະສາມາດຟື້ນຟູຄວາມເຊື່ອໝັ້ນກັບຄືນມາໄດ້ຫຼືບໍ່.

ຂ່າວ: Reuters