ເຈົ້າໜ້າທີ່ໄທ ຈັບກຸມຂະບວນການລົດເຖື່ອນ ກ່ອນນຳລົດຂ້າມມາຍັງຝັ່ງລາວ

ໃນວັນທີ 18 ຕຸລາ 2026 ທະຫານພານ ກອງກຳລັງສະເພາະກິດທະຫານພານທີ 31 ໄດ້ສະກັດຈັບລົດຈັກຈຳນວນ 4 ຄັນ ແລະ ຈັບຜູ້ຕ້ອງຫາໄດ້ 2 ຄົນ ຂະນະທີ່ອີກ 2 ຄົນສາມາດຫຼົບໜີໄປໄດ້.

ເຫດການເກີດຂຶ້ນບໍລິເວນບ້ານຮົ່ມໂພທອງ ໝູ່ 19 ຕຳບົນຕັບເຕົ່າ ອຳເພີເທີງ ຈັງຫວັດຊຽງຮາຍ ປະເທດໄທ ເຊິ່ງຫ່າງຈາກຊາຍແດນປະມານ 50 ແມັດ. ໃນຂະນະນັ້ນ ກຸ່ມຜູ້ຕ້ອງຫາກຳລັງຂີ່ລົດຈັກ ໂດຍມີເປົ້າໝາຍຈະນຳລົດຈັກຂ້າມຊາຍແດນໄປຂາຍຢູ່ປະເທດລາວ.

ຈາກການກວດສອບ ເຈົ້າໜ້າທີ່ບໍ່ພົບເອກະສານຄູ່ມືລົດ ຫຼື ເອກະສານຢືນຢັນການຄອບຄອງລົດຈັກທັງ 4 ຄັນ.

ດັ່ງນັ້ນ ເຈົ້າໜ້າທີ່ຈຶ່ງຄວບຄຸມຕົວຜູ້ຕ້ອງຫາ 2 ຄົນ ພ້ອມຂອງກາງທັງໝົດ ສົ່ງໃຫ້ສະຖານີຕຳຫຼວດເທີງ ເພື່ອດຳເນີນຄະດີຕາມກົດໝາຍຕໍ່ໄປ.