ຄື້ນຄວາມຮ້ອນໃນເອີຣົບພາກຊີວິດກວ່າ 50,000 ຄົນໃນປີ 2026 ໂດຍພົບວ່າ 65% ເກີດພາວະໂລກຮ້ອນຈາກຝີມືມະນຸດ

ຜົນການວິໄຈຈາກວິທະຍາໄລ Imperial College London ປະເມີນວ່າ ຄື້ນຄວາມຮ້ອນໃນເອີຣົບຊ່ວງເດືອນມິຖຸນາຫາເດືອນສິງຫາ ປີ 2026 ເຮັດໃຫ້ມີຜູ້ເສຍຊີວິດຫຼາຍກວ່າ 50,000 ຄົນ. ໃນຈຳນວນນີ້ ປະມານ 65% ມີສາເຫດເຊື່ອມໂຍງກັບພາວະໂລກຮ້ອນທີ່ເກີດຈາກກິດຈະກຳຂອງມະນຸດ.

ພາບປະກອບ

ຄື້ນຄວາມຮ້ອນຮຸນແຮງທີ່ແຜ່ປົກຄຸມເອີຣົບໃນລະດູຮ້ອນປີ 2026 ສົ່ງຜົນໃຫ້ມີຜູ້ເສຍຊີວິດຈາກຄວາມຮ້ອນປະມານ 50,391 ຄົນ. ໃນນັ້ນ 32,619 ຄົນ ຫຼືປະມານ 65% ເປັນຜົນກະທົບທີ່ເຊື່ອມໂຍງກັບພາວະໂລກຮ້ອນຈາກກິດຈະກຳຂອງມະນຸດ ໂດຍສະເພາະການເຜົາໄໝ້ເຊື້ອເພີງຟອດຊິວ ເຊັ່ນ ຖ່ານຫີນ, ນ້ຳມັນ ແລະກາຊທຳມະຊາດ ຕາມຜົນການສຶກສາຂອງຄະນະນັກວິໄຈ ທີ່ກຽມຈະເຜີຍແຜ່ໃນວາລະສານ Nature Health.

ຄະນະນັກວິໄຈໄດ້ວິເຄາະຂໍ້ມູນຈາກ 854 ເມືອງທົ່ວເອີຣົບ ຄອບຄຸມໄລຍະເດືອນມິຖຸນາ, ກໍລະກົດ ແລະສິງຫາ ໂດຍໃຊ້ແບບຈຳລອງທາງສະຖິຕິເພື່ອປະເມີນຈຳນວນຜູ້ເສຍຊີວິດຈາກຄວາມຮ້ອນໃນແຕ່ລະກຸ່ມອາຍຸ ແລະນຳໄປປຽບທຽບກັບສະຖານະການຈຳລອງທີ່ໂລກບໍ່ມີພາວະໂລກຮ້ອນຈາກກິດຈະກຳຂອງມະນຸດ.

ຜົນການສຶກສາພົບວ່າ ຈຳນວນຜູ້ເສຍຊີວິດໃນລະດູຮ້ອນປີນີ້ສູງກວ່າສະຖິຕິເດີມໃນປີ 2022 ເຊິ່ງມີຜູ້ເສຍຊີວິດປະມານ 29,480 ຄົນ ເຖິງ 71%. ແນວໃດກໍຕາມ ນັກວິໄຈລະບຸວ່າ ຕົວເລກດັ່ງກ່າວອາດຕ່ຳກວ່າຄວາມເປັນຈິງ ເນື່ອງຈາກຍັງບໍ່ໄດ້ລວມຄື້ນຄວາມຮ້ອນຮຸນແຮງໃນເດືອນພຶດສະພາ ແລະການສຶກສາຄອບຄຸມພຽງ 854 ເມືອງ ເຊິ່ງມີປະຊາກອນລວມກັນປະມານ 40% ຂອງປະຊາກອນເອີຣົບທັງໝົດ.

ແກຣີຟັລລອສ ຄອນສະແຕນຕິນູດິສ (Garryfallos Konstantinoudis) ສາດສະດາຈານຈາກສະຖາບັນ Grantham ຂອງວິທະຍາໄລ Imperial College London ລະບຸວ່າ ເກືອບໜຶ່ງໃນສາມຂອງຜູ້ເສຍຊີວິດທັງໝົດເກີດຂຶ້ນໃນໄລຍະວັນທີ 17 ມິຖຸນາ ຫາ 1 ກໍລະກົດ ເຊິ່ງເປັນຊ່ວງທີ່ເກີດຄື້ນຄວາມຮ້ອນຮຸນແຮງ ໂດຍອຸນຫະພູມສະເລ່ຍສູງກວ່າຄ່າສະເລ່ຍໃນອະດີດປະມານ 5.3 ອົງສາເຊລຊຽສ.

ຜູ້ສູງອາຍຸເປັນກຸ່ມທີ່ໄດ້ຮັບຜົນກະທົບໜັກທີ່ສຸດ ໂດຍຜູ້ເສຍຊີວິດອາຍຸ 85 ປີຂຶ້ນໄປຄິດເປັນປະມານເຄິ່ງໜຶ່ງຂອງຍອດຜູ້ເສຍຊີວິດທັງໝົດ. ຂະນະທີ່ຄົນໜຸ່ມສາວອາຍຸ 20–44 ປີ ກໍໄດ້ຮັບຜົນກະທົບເຊັ່ນກັນ ໂດຍມີຜູ້ເສຍຊີວິດຈາກຄວາມຮ້ອນຫຼາຍກວ່າ 800 ຄົນ.

ປະເທດອິຕາລີ, ຝຣັ່ງ, ສະເປນ ແລະເຢຍລະມັນ ເປັນປະເທດທີ່ມີຈຳນວນຜູ້ເສຍຊີວິດຈາກຄວາມຮ້ອນສູງທີ່ສຸດໃນການສຶກສາຄັ້ງນີ້. ຂະນະທີ່ຜົນການສຶກສາອີກຊິ້ນໜຶ່ງຂອງທີມວິໄຈ ເຊິ່ງເຜີຍແຜ່ກ່ອນໜ້ານີ້ ລະບຸວ່າ ກຸງໂຣມເປັນນະຄອນຫຼວງໃນເອີຣົບທີ່ມີຈຳນວນຜູ້ເສຍຊີວິດສະສົມຈາກຄວາມຮ້ອນສູງທີ່ສຸດໃນໄລຍະປີ 2000–2025.

ແຄລຣ໌ ບານສ໌ (Claire Barnes) ນັກວິທະຍາສາດດ້ານພູມອາກາດຈາກ Imperial College London ລະບຸວ່າ ເອີຣົບເປັນທະວີບທີ່ມີອຸນຫະພູມເພີ່ມຂຶ້ນໄວທີ່ສຸດ ໂດຍອຸນຫະພູມໃນຊ່ວງລະດູຮ້ອນສູງກວ່າລະດັບທີ່ຄວນຈະເປັນ ຖ້າບໍ່ມີພາວະໂລກຮ້ອນຈາກມະນຸດ ໂດຍສະເລ່ຍປະມານ 2.5 ອົງສາເຊລຊຽສ. ພ້ອມທັງເຕືອນວ່າ ໂຄງສ້າງພື້ນຖານໃນຫຼາຍພື້ນທີ່ຂອງເອີຣົບຕາເວັນຕົກ ແລະເອີຣົບເໜືອ ຍັງບໍ່ໄດ້ຮັບການອອກແບບໃຫ້ຮອງຮັບອຸນຫະພູມທີ່ຮຸນແຮງໃນລະດັບນີ້.

ນັກວິໄຈຍັງລະບຸວ່າ ການເສຍຊີວິດຈາກຄວາມຮ້ອນມັກບໍ່ໄດ້ຖືກບັນທຶກເປັນສາເຫດໂດຍກົງໃນໃບມໍລະນະບັດ ຈຶ່ງຈຳເປັນຕ້ອງໃຊ້ແບບຈຳລອງທາງສະຖິຕິໃນການປະເມີນຈຳນວນຜູ້ເສຍຊີວິດທີ່ແທ້ຈິງ. ນອກຈາກນີ້ ສັດສ່ວນການເສຍຊີວິດຈາກຄວາມຮ້ອນທີ່ເຊື່ອມໂຍງກັບພາວະໂລກຮ້ອນຈາກມະນຸດ ໄດ້ເພີ່ມຈາກປະມານ 45% ໃນຊ່ວງຕົ້ນທົດສະວັດ 2000 ມາເປັນປະມານ 65% ໃນປັດຈຸບັນ.

ພາບປະກອບ

ແຫຼ່ງຂ່າວ: (AP)