ອຸດົມໄຊ ເຂົ້າຮ່ວມກອງປະຊຸມ ສາຍສຳພັນກົນໄກການຮ່ວມມື 4 ປະເທດ 10 ຝ່າຍ ເຂດຊາຍແດນ ຄັ້ງທີ 11
ແຫລ່ງຂ່າວຈາກ ແຂວງອຸດົມໄຊ ໃຫ້ຮູ້ວ່າ: ໃນລະຫວ່າງວັນທີ 25-27 ພະຈິກ 2025, ຄະນະຜູ້ແທນ ຈາກ ສປປ ລາວ ລວມມີ: ແຂວງອຸດົມໄຊ, ຫລວງນ້ຳທາ, ບໍ່ແກ້ວ, ຫລວງພະບາງ ແລະ ແຂວງຜົ້ງສາລີ ໃນນັ້ນ, ຄະນະຜູ້ແທນແຂວງອຸດົມໄຊ ນຳໂດຍ ທ່ານ ອາລຸນ ບຸນວິໄລ ຫົວໜ້າພະແນກອຸດສາຫະກຳ ແລະ ການຄ້າແຂວງອຸດົມໄຊ ພ້ອມດ້ວຍຄະນະ ໄດ້ເຂົ້າຮ່ວມກອງປະຊຸມສາຍສຳພັນກົນໄກການຮ່ວມມື 4 ປະເທດ 10 ຝ່າຍ ເຂດຊາຍແດນ ລະຫວ່າງ ຣາຊະອານາຈັກໄທ, ສປປ ລາວ, ສປ ຈີນ ແລະ ສະຫະພາບ ມຽນມາ ຄັ້ງທີ 11 ທີ່ເມືອງຊຽງແສນ ແຂວງຊຽງລາຍ ປະເທດໄທ.
ກອງປະຊຸມໄດ້ຍົກໃຫ້ເຫັນຜົນການຈັດຕັ້ງປະຕິບັດ ການພົວພັນຮ່ວມມື 4 ປະເທດ 9 ຝ່າຍ ຄັ້ງທີ 10 ທີ່ ສປ ຈີນ ໄລຍະຜ່ານມາ ກ່ຽວກັບວຽກງານການຮ່ວມມື ດ້ານເສດຖະກິດ, ການຄ້າ, ການລົງທຶນ, ການຍົກລະດັບໃນການອໍານວຍຄວາມສະດວກ ໃນການຜ່ານດ່ານ, ການຄ້າດ້ານສະບຽງອາຫານ ຈາກພືດພັນກະສິກໍາ ແລະ ຜະລິດຕະພັນໝາກໄມ້, ການເຊື່ອມໂຍງເຊື່ອມຈອດ, ການເຊື່ອມຕໍ່ກົນໄກໃນພາກພື້ນ, ວຽກງານການທ່ອງທ່ຽວ, ດ້ານສຶກສາ ແລະ ກະສິກໍາ. ກອງປະຊຸມດັ່ງກ່າວ ຍັງໄດ້ມີລົງນາມບົດບັນທຶກການຮ່ວມມືຮ່ວມກັນ ແລະ ພັດປ່ຽນກັນເປັນເຈົ້າພາບຈັດກອງປະຊຸມ ອີກດ້ວຍ.
