ສສ ຫວຽດນາມຈະສະໜອງນໍ້າມັນເຊື້ອໄຟໃຫ້ ສປປ ລາວ ຈໍານວນ 50 ລ້ານລິດ

ລັດຖະບານ ສສ ຫວຽດນາມຕົກລົງ ຫຼື ໃຫ້ບໍລິສັດນໍ້າມັນເຊື້ອໄຟຂອງຫວຽດນາມ ສະໜອງນໍ້າມັນເຊື້ອໄຟ ຈໍານວນ 50 ລ້ານລິດໃຫ້ ປະເທດລາວເພື່ອຊ່ວຍແກ້ໄຂສະພາບການສະໜອງພາຍໃນປະເທດລາວ ໃຫ້ພຽງພໍໃນໄລຍະທີ່ສະພາບການກຳລັງເຄັ່ງຮ້ອນ. ນອກຈາກນັ້ນ, ຫວຽດນາມຍັງຈະຊ່ວຍອຳນວຍຄວາມສະດວກ ໃຫ້ແກ່ການນຳເຂົ້ານ້ຳມັນເຊື້ອໄຟຈາກປະເທດທີສາມຜ່ານ ສສ ຫວຽດນາມ ເຂົ້າມາ ສປປ ລາວ ອີກດ້ວຍ.

ການຕົກລົງສະໜອງນໍ້າມັນດັ່ງກ່າວໄດ້ຕົກລົງກັນເມື່ອມໍ່ໆມານີ້ ໃນການພົບປະສອງຝ່າຍລະຫວ່າງທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກຳ ແລະ ການຄ້າ ພ້ອມດ້ວຍຄະນະ ແລະ ທ່ານ ເລ ເມັງຮຸງ ລັດຖະມົນຕີກະຊວງອຸດສາຫະກຳ ແລະ ການຄ້າ ແຫ່ງ ສສ ຫວຽດນາມ ແລະ ຄະນະ.