ຂໍໃຫ້ທຸກຄົນປອດໄພ! ເກີດເຫດລົດເມສາຍໃຕ້ເສຍຫລັກປີ້ນ ມີຜູ້ໄດ້ຮັບບາດເຈັບ 35 ຄົນ
Pele
ເຜີຍແຜ່: 22 April 2026, 10:57
ປັບປຸງຫຼ້າສຸດ: 22 April 2026, 10:57
ອ່ານ 65 ຄັ້ງ
ປກສ ແຂວງບໍລິຄຳໄຊ ລາຍງານວ່າ: ເວລາປະມານ 04:20 ນາທີ ຕອນເຊົ້າ ວັນທີ 22 ເມສາ 2026 ເກີດອຸປະຕິເຫດ ລົດເມປາກເຊ-ວຽງຈັນປີ້ນ ຢູ່ບໍລິເວນທາງໂຄ້ງ ບ້ານນ້ຳເດື່ອ ເມືອງປາກກະດິງ ແຂວງບໍລິຄຳໄຊ. ໃນລົດຄັນດັ່ງກ່າວ ມີຜູ້ໂດຍສານ 46 ຄົນ, ແອດລົດ 1 ຄົນ, ໂຊເຟີລົດ 1 ຄົນ ລວມທັງໝົດ 48 ຄົນ.
ເຈົ້າໜ້າທີ່ ແລະ ພົນລະເມືອງດີ ໄດ້ເຂົ້າໃຫ້ການຊ່ວຍເຫລືອ ໃນເບື້ອງຕົ້ນ ພົບເຫັນຜູ້ໄດ້ຮັບບາດເຈັບ 35 ຄົນ ແລະ ຍັງບໍ່ສາມາດລາຍງານໄດ້ວ່າເສຍຊີວິດຈັກຄົນ. ສາເຫດການເກີດອຸປະຕິເຫດ ແມ່ນຍ້ອນ ມີຝົນຕົກເຮັດໃຫ້ທາງມື່ນ ບວກກັບແລ່ນໄວ ລົດຈື່ງເສຍຫລັກປີ້ນ.
ປະຈຸບັນຍັງຢູ່ໃນຂັ້ນຕອນ ການຊ່ວຍເຫລືອເພີ່ມເຕີມ ແລະ ສືບສວນ-ສອບສວນ ຂະຫຍາຍຜົນ ຫາກົກປາຍສາເຫດຂອງອຸປະຕິເຫດ, ພາຍຫລັງໄດ້ຮັບຂໍ້ມູນ ທີ່ຖືກຕ້ອງ, ຊັດເຈນ ຈະລາຍງານໃຫ້ຊາບຕື່ມພາຍຫລັງ.
ຂ່າວ:ໜັງສືພິມລາວພັດທະນາ Laophattana News
ແບ່ງປັນ:
‹ ກັບໄປໝວດເຫດການ
