Claude AI ກາຍເປັນກະແສໃນໂລກອອນລາຍ ຫຼັງຈາກໄລ່ໃຫ້ຜູ້ໃຊ້ໄປນອນ ແລະ ໄປດື່ມນ້ຳ ເມື່ອລົມກັນດົນເກີນໄປ!
Claude AI ຈາກບໍລິສັດ Anthropic ກຳລັງຖືກເວົ້າເຖິງຢ່າງໜັກໃນໂລກໂຊຊຽວ ຫຼັງຈາກມີຜູ້ໃຊ້ຫຼາຍຄົນແຊຣ໌ປະສົບການທີ່ຄາດບໍ່ເຖິງ ເມື່ອ AI ໂຕນີ້ເຂົ້າມາຂັດຈັງຫວະການສົນທະນາທີ່ຍືດເຍື້ອ ໂດຍການບອກໃຫ້ຜູ້ໃຊ້ “ໄປນອນ”, “ໄປພັກຜ່ອນໄດ້ແລ້ວ” ຫຼື ແມ່ນແຕ່ເຕືອນໃຫ້ “ໄປດື່ມນ້ຳ”.
ເປັນຫຍັງ AI ຄືມາເປັນຫ່ວງເຮົາແທ້?
ເບື້ອງຫຼັງພຶດຕິກຳດັ່ງກ່າວອາດມາຈາກການທີ່ Anthropic ວາງຕຳແໜ່ງ AI ຂອງຕົນໃຫ້ເນັ້ນໜັກເລື່ອງຄວາມປອດໄພ ແລະ ຈັນຍາບັນຂອງມະນຸດ ຜ່ານລະບົບທີ່ເອີ້ນວ່າ Constitutional AI. ລະບົບນີ້ຖືກອອກແບບມາໃຫ້ຕອບສະໜອງພາຍໃຕ້ຫຼັກການທີ່ກຳນົດໄວ້. ເມື່ອການສົນທະນາຍືດເຍື້ອໄປຈົນເຖິງເິກເດິກ ຫຼື ໃຊ້ເວລາດົນຫຼາຍຊົ່ວໂມງ, Algorithm ຈະຖືກກະຕຸ້ນໃຫ້ກວດສອບ “ສຸຂະພາວະ” ຂອງຜູ້ໃຊ້ໂດຍອັດຕະໂນມັດ ເຮັດໃຫ້ການເຕືອນເບິ່ງຄືວ່າມັນມີຄວາມເປັນຫ່ວງເປັນໄຍທາງອາລົມແທ້ໆ.
ແຕ່ກໍມີມຸມມອງດ້ານທຸລະກິດຊ້ອນຢູ່…
ນັກສັງເກດການບາງສ່ວນເບິ່ງວ່າ ນີ້ອາດຈະບໍ່ແມ່ນເລື່ອງຄວາມເປັນຫ່ວງພຽງຢ່າງດຽວ. ເນື່ອງຈາກການສົນທະນາທີ່ຍາວ ແລະ ຊັບຊ້ອນ ຕ້ອງໃຊ້ພະລັງງານໃນການປະມວນຜົນສູງ ແລະ ມີຕົ້ນທຶນມະຫາສານ. ການທີ່ AI ແນະນຳໃຫ້ຜູ້ໃຊ້ພັກຜ່ອນ ຈຶ່ງອາດເປັນກົນລະຍຸດທາງອ້ອມເພື່ອຫຼຸດຜ່ອນພາລະຂອງເຊີເວີ (Server) ໃນຊ່ວງທີ່ມີການໃຊ້ງານໜາແໜ້ນ.
ຄຳຊີ້ແຈງຈາກທີມງານ
ທາງດ້ານ ແຊມ ແມັກຄັລລິສເຕີ (Sam McAllister) ທີມງານຂອງ Anthropic ໄດ້ໃຫ້ຄວາມເຫັນພຽງວ່າ ມັນເປັນພຽງລັກສະນະສະເພາະຂອງຕົວລະຄອນ (Character) ເທົ່ານັ້ນ, ບໍ່ຄວນໃຫ້ຄວາມສຳຄັນຫຼາຍເກີນໄປ ແລະ ອາດຈະມີການປັບປຸງໃນອະນາຄົດເພື່ອໃຫ້ລະບົບເຮັດວຽກໄດ້ເໝາະສົມຍິ່ງຂຶ້ນ.
ທີ່ມາ: TechRadar, Reddit
ຂ່າວທີ່ກ່ຽວຂ້ອງ
