ອົງການອາຫານໂລກ (WFP) ມອບເງິນຊ່ວຍເຫລືອ ຈຳນວນ 19,26 ຕື້ກີບ ຫຼື (ປະມານ 900.000 ໂດລາສະຫະລັດ) ໃຫ້ຜູ້ປະສົບໄພນ້ຳຖ້ວມ

AD

AD

AD

ອົງການອາຫານໂລກ (WFP) ໂດຍການປະສານສົມທົບກັບກະຊວງແຮງງານ ແລະ ສະຫວັດດີການສັງຄົມ ໄດ້ມອບເງິນຊ່ວຍເຫລືອຈຳນວນ 19,26 ຕື້ກີບ (ປະມານ 900.000 ໂດລາສະຫະລັດ) ໂດຍການສະໜັບສະໜູນທຶນຈາກສະຫະລັດອາເມລິກາ ໃຫ້ແກ່ປະຊາຊົນ 15.000 ຄົນ ທີ່ປະສົບໄພນ້ຳຖ້ວມຢູ່ແຂວງສະຫວັນນະເຂດ ໃນເດືອນກໍລະກົດ ຫາ ກັນຍາ 2026 ຜ່ານມາ.

ເມື່ອເກີດອຸທົກກະໄພ, ການຊ່ວຍເຫຼືອດ້ານເງິນສົດຖືເປັນສິ່ງທີ່ມີຄວາມໝາຍຢ່າງຍິ່ງ ເພາະໄດ້ມອບອິດສະຫຼະໃຫ້ກັບແຕ່ລະຄອບຄົວ ໃນການເລືອກຊື້ສິ່ງຂອງທີ່ຈຳເປັນ ແລະ ຕ້ອງການຫຼາຍທີ່ສຸດ.

ຢູ່ທີ່ເມືອງໄຊບູລີ, ແຂວງສະຫວັນນະເຂດ, ທ່ານ ພົງໄຊສັກ ອິນທະລາດ, ຮອງລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ, ທ່ານນາງ ມີເຊວ ເອົາລໍ, ຜູ້ຮັກສາການແທນ ເອກອັກຄະລັດຖະທູດ ສະຫະລັດ ອາເມລິກາ ປະຈຳ ລາວ, ແລະ ທ່ານ ມາກ-ອານເດຣ ໂປສ໌, ຜູ້ອຳນວຍການ ອົງການອາຫານໂລກ ປະຈຳ ລາວ ໄດ້ຮ່ວມກັບຊຸມຊົນທ້ອງຖິ່ນ ສະແດງໃຫ້ເຫັນເຖິງຄວາມສຳຄັນຂອງການຊ່ວຍເຫຼືອດ້ານເງິນສົດ ທີ່ສາມາດຕອບສະໜອງຄວາມຕ້ອງການດ້ານອາຫານສຸກເສີນຂອງຄອບຄົວທີ່ໄດ້ຮັບຜົນກະທົບຈາກໄພນ້ຳຖ້ວມ ຢ່າງທັນທ່ວງທີ, ໂດຍໄດ້ຮັບການສະໜັບສະໜູນຢ່າງເອື້ອເຟື້ອເພື້ອແຜ່ຈາກ ສະຫະລັດ ອາເມລິກາ.

ອົງການອາຫານໂລກ (WFP) ຮ່ວມກັບ ກະຊວງແຮງງານ ແລະ ສະຫວັດດີການສັງຄົມ ໄດ້ແຈກຢາຍເງິນສົດຊ່ວຍເຫຼືອໃຫ້ກັບປະຊາຊົນ 15,000 ຄົນ ໃນ 4 ເມືອງ ຂອງແຂວງສະຫວັນນະເຂດ. ໂດຍແຕ່ລະຄົນຈະໄດ້ຮັບເງິນ 1,350,000 ກີບ (ຫຼື 60 ໂດລາສະຫະລັດ), ເຊິ່ງຄິດໄລ່ໃຫ້ຄອບຄຸມຄວາມຕ້ອງການດ້ານອາຫານທີ່ຈຳເປັນ ເປັນເວລາ 30 ວັນ.

ການຊ່ວຍເຫຼືອເປັນເງິນສົດ ນອກຈາກຈະມອບທາງເລືອກ ແລະ ຄວາມຢືດຢຸ່ນໃຫ້ກັບຄອບຄົວໃນຍາມຂາດແຄນແລ້ວ, ຍັງຊ່ວຍຮັກສາສັກສີ ແລະ ສະໜັບສະໜູນການຟື້ນຟູຊີວິດການເປັນຢູ່ຂອງເຂົາເຈົ້າໃຫ້ດີຂຶ້ນອີກດ້ວຍ.

ທີ່ມາ: WFP