ຫາຍາກ! ພົບປາເບີບັອດ (Burbot) ສີເຫຼືອງທອງຫາຍາກໃນທ່າເຮືອລັດນິວຢອກ ທີ່ຢູ່ໃນພາວະເມັດສີຜິດປົກກະຕິ ພົບໄດ້ຍາກກວ່າປາເຜືອກ ແລະ ມີສະພາບຮ່າງກາຍທີ່ຈ່ອຍ

AD

AD

AD

ກາຍເປັນການຄົ້ນພົບທີ່ສ້າງຄວາມຕື່ນຕາຕື່ນໃຈໃຫ້ກັບວົງການສຳຫຼວດສັດນ້ຳ ຫຼັງນັກຊີວະວິທະຍາຈາກສຳນັກງານປະມົງ ແລະ ສັດປ່າແຫ່ງສະຫະລັດ (U.S. Fish and Wildlife Service) ພົບປາ Burbot ທີ່ມີສີເຫຼືອງທອງສົດໃສຜິດປົກກະຕິ ລະຫວ່າງການສຳຫຼວດສັດນ້ຳຢູ່ທ່າເຮືອ Oswego Harbor ເມືອງ Oswego ລັດນິວຢອກ ສະຫະລັດ ໃນເດືອນຕຸລາທີ່ຜ່ານມາ.

ຕາມລາຍງານຂອງທາງການສະຫະລັດ ເຜີຍແຜ່ເມື່ອວັນທີ 10 ພະຈິກ 2026 ລະບຸວ່າ ປາໂຕທີ່ພົບເປັນປາ Burbot (Lota lota) ເຊິ່ງເປັນປາພື້ນເມືອງຂອງເຂດທະເລສາບເກຣດເລັກ (Great Lakes) ແຕ່ມີສີລຳຕົວເຫຼືອງສົ້ມສົດໃສຈົນແຕກຕ່າງຈາກປາທົ່ວໄປຢ່າງຊັດເຈນ.

Burbot = ປາເບີບັອດ (ຊື່ປາຊະນິດໜຶ່ງ ມີຊື່ວິທະຍາສາດ Lota lota) ເປັນປານ້ຳຈືດທີ່ມັກອາໄສຢູ່ໃນນ້ຳເຢັນ.

ຜູ້ຊ່ຽວຊານລະບຸວ່າ ປາໂຕນີ້ມີພາວະ Xanthochromism ຫຼື ພາວະເມັດສີເຫຼືອງຜິດປົກກະຕິ ເຊິ່ງເກີດຈາກຄວາມຜິດປົກກະຕິທາງພັນທຸກຳ ສົ່ງຜົນໃຫ້ລຳຕົວປາປາກົດເປັນສີເຫຼືອງ ຫຼື ສີສົ້ມເຂັ້ມ. ພາວະນີ້ພົບໄດ້ຍາກໃນປ່າທຳມະຊາດ ແລະ ພົບໄດ້ໜ້ອຍກວ່າພາວະຜິວເຜືອກ (Albinism) ແລະ ພາວະເມັດສີເຂັ້ມຜິດປົກກະຕິ (Melanism) ອີກດ້ວຍ.

ການພົບປາໂຕນີ້ຍິ່ງມີຄວາມໜ້າສົນໃຈ ເນື່ອງຈາກປະຊາກອນປາ Burbot ໃນພື້ນທີ່ມີຈຳນວນຄ່ອນຂ້າງໜ້ອຍ ແລະ ປາຊະນິດນີ້ມັກອາໄສຢູ່ໃນເຂດນ້ຳເລິກ ແລະ ມີອຸນຫະພູມເຢັນ ຫຼາຍກວ່າບໍລິເວນທ່າເຮືອ. ນອກຈາກນີ້ ຍັງເປັນການບັນທຶກການພົບປາ Burbot ຄັ້ງທຳອິດຈາກການສຳຫຼວດປະຊາກອນປາຢູ່ທ່າເຮືອ Oswego Harbor ເຖິງແມ່ນວ່າກ່ອນໜ້ານີ້ຈະມີລາຍງານຈາກນັກຕົກປາຢູ່ບາງຄັ້ງກໍຕາມ.

ຢ່າງໃດກໍຕາມ ເມື່ອເຈົ້າໜ້າທີ່ກວດສອບສະພາບຂອງປາ ພົບວ່າມັນມີຮ່າງກາຍຜອມໂຊ ແລະ ມີສຸຂະພາບບໍ່ແຂງແຮງ. ນັກຊີວະວິທະຍາດ້ານປະມົງຈາກສຳນັກງານສຳຫຼວດທໍລະນີວິທະຍາສະຫະລັດ (USGS) ຈຶ່ງສົ່ງປາໂຕນີ້ໄປຍັງວິທະຍາໄລສັດວະແພດ Cornell University College of Veterinary Medicine ເພື່ອກວດວິເຄາະສຸຂະພາບ ແລະ ຊອກຫາສາເຫດທີ່ປະຊາກອນປາຊະນິດນີ້ຫຼຸດລົງຢ່າງຕໍ່ເນື່ອງ.

ທາງການຄາດຫວັງວ່າ ການຄົ້ນພົບປາທີ່ຫາຍາກໂຕນີ້ ອາດຊ່ວຍໃຫ້ນັກວິທະຍາສາດເຂົ້າໃຈສຸຂະພາບ ແລະ ສະຖານະຂອງປະຊາກອນປາ Burbot ໃນເຂດທະເລສາບເກຣດເລັກໄດ້ຫຼາຍຂຶ້ນ ເພື່ອນຳຂໍ້ມູນໄປໃຊ້ວາງແຜນການອະນຸລັກ ແລະ ຟື້ນຟູປະຊາກອນປາຊະນິດນີ້ໃນອະນາຄົດ.

“ທີມງານສຳຫຼວດສັດນ້ຳຕ່າງຖິ່ນ ສະແດງປາ Burbot ສີເຫຼືອງທອງທີ່ຫາຍາກ ຫຼັງຄົ້ນພົບໃນທ່າເຮືອ Oswego ລັດນິວຢອກ.”

ການຄົ້ນພົບຄັ້ງນີ້ ບໍ່ພຽງແຕ່ສ້າງຄວາມຕື່ນເຕັ້ນຈາກສີສັນທີ່ແປກຕາຂອງປາເທົ່ານັ້ນ ແຕ່ຍັງສະທ້ອນໃຫ້ເຫັນເຖິງຄວາມສຳຄັນຂອງການສຳຫຼວດສັດນ້ຳຢ່າງຕໍ່ເນື່ອງ ເພາະການພົບສັດນ້ຳທີ່ຫາຍາກອາດເປັນກະແຈສຳຄັນໃນການຮັກສາຄວາມສົມດຸນຂອງລະບົບນິເວດທາງນ້ຳ.

ແຫລ່ງທີ່ມາ: U.S. Fish and Wildlife Service