ທໍາລາຍສິນຄ້າທີ່ລະເມີດຊັບສິນທາງປັນຍາ ຢາງຕີນລົດໄຖ ແລະ ຊິ້ນສ່ວນລວມມູນຄ່າກວ່າ 510 ລ້ານກີບ

ໜັງສືພິມສະຫວັນພັດທະນາ ລາຍງານວ່າ: ວັນທີ 3 ມິຖຸນາ 2026 ພະແນກອຸດສາຫະກຳ ແລະ ການຄ້າແຂວງສະຫວັນນະເຂດ ຈັດພິທີທຳລາຍສິນຄ້າທີ່ລະເມີດຊັບສິນທາງປັນຍາ ປະເພດເຄື່ອງໝາຍການຄ້າຍີ່ຫໍ້ “ປືນໃຫຍ່ຄູ່” ໂດຍການເຂົ້າຮ່ວມເປັນປະທານຂອງທ່ານ ນາງ ສຸກສະເຫວີຍ ແກ້ວປະເສີດ ຮອງຫົວໜ້າພະແນກອຸດສາຫະກຳ ແລະການຄ້າແຂວງ, ມີທ່ານ ພາທິດ ວຸດທິພົງມະນີ ຕາງໜ້າບໍລິສັດເຈສະຫຍາຍອິນດັສທຣີຈຳກັດ(J.Thaisiam Industry Co., LTD ) ທີ່ເປັນເຈົ້າຂອງເຄື່ອງໝາຍການຄ້າກາປືນໃຫຍ່ຄູ່ ແລະ ພາກສ່ວນກ່ຽວຂ້ອງເຂົ້າຮ່ວມ.

ສິນຄ້າທີ່ທໍາລາຍໃນຄັ້ງນີ້ ຢຶດໄດ້ຈາກບ້ານໄຊຍະມຸງຄຸນ, ເມືອງອຸທຸມພອນ ວັນທີ 5 ພຶດສະພາ 2026 ມີຈຳນວນທັງໝົດ 944 ຊີ້ນ, ປະກອບມີ: ຢາງໜ້າລົດໄຖ ຈຳ ນວນ 124 ເສັ້ນ, ຢາງຫຼັງລົດໄຖ 107 ເສັ້ນ, ໂຄງພານໃບໄຖສີສົ້ມ 42 ຊິ້ນ, ເພົາຫຼັງລົດໄຖສີສົ້ມ-ຂາວ 70 ຊິ້ນ, ເພົາຫຼັງລົດໄຖສີສົ້ມ-ຂ້ຽວ 5 ຊິ້ນ, ເພົາຫຼັງລົດໄຖນາສີດຳ 102 ຊິ້ນ, ລໍ້ລາກລົດໄຖສີດຳ167 ຊິ້ນ, ຄໍລາກລົດໄຖສີສົ້ມ 156 ຊິ້ນ, ຊັງລົດໄຖສີສົ້ມ 109 ຊິ້ນ, ຄານໃບໄຖສີຟ້າອີກຈຳນວນ 62 ຊິ້ນ, ລວມເປັນມູນຄ່າ 510 ລ້ານກວ່າກີບ. ສ່ວນຜູ້ລະເມີດແມ່ນໄດ້ເຮັດບົດບັນທຶກ ພ້ອມທັງສຶກສາອົບຮົມ ແລະ ຖ້າມີຄັ້ງຕໍ່ໄປ ແມ່ນຈະປະຕິບັດຕາມມາດຕະການຢ່າງເຂັ້ມງວດ ໂດຍຈະໄດ້ອາຍັດສິນຄ້າ ແລະປັບໃໝຜູ້ທີ່ກະທຳຜິດຕາມລະບຽບກົດໝາຍ.