ກວດຄົ້ນຮ້ານນວດແອບແຝງຂາຍບໍລິການທາງເພດ ກັກຕົວເປົ້າໝາຍສົງໄສ 22 ຄົນ

ວັນທີ 13 ມິຖຸນາ 2026 ຜ່ານມານີ້, ກົມຕຳຫຼວດສະກັດກັ້ນ ແລະ ຕ້ານການຄ້າມະນຸດ ກົມໃຫຍ່ຕຳຫຼວດ ກະຊວງປ້ອງກັນຄວາມສະຫງົບ ໄດ້ສົມທົບກັບ ພາກສ່ວນທີ່ກ່ຽວຂ້ອງ ໄດ້ເຂົ້າກວດຄົ້ນຮ້ານນວດ ທີ່ແອບແຝງຂາຍບໍລິການທາງເພດ ຢູ່ເຂດນະຄອນຫຼວງວຽງຈັນ ສາມາດກັກຕົວຜູ້ຖືກສົງໄສໄດ້ທັງໝົດ 22 ຄົນ, ຍິງ 18 ຄົນ ເປັນຄົນຕ່າງປະເທດ 17 ຄົນ.

ພາຍຫຼັງສາມາດກັກຕົວຜູ້ຖືກສົງໄສໄດ້ທັງໝົດແລ້ວ ເຈົ້າໜ້າທີ່ຈຶ່ງໄດ້ກວດຄົ້ນຮ້ານດັ່ງກ່າວຕາມຫຼັກການວິຊາສະເພາະ ແລະ ສາມາດກວດພົບອຸປະກອນຫຼາຍລາຍການທີ່ນຳໃຊ້ເຂົ້າໃນການຂາຍບໍລິການທາງເພດ. ຈາກນັ້ນ ເຈົ້າໜ້າທີ່ກົມຕຳຫຼວດສະກັດກັ້ນ ແລະ ຕ້ານການຄ້າມະນຸດ ຈຶ່ງໄດ້ພາຕົວຜູ້ຖືກສົງໄສທັງໝົດມາດຳເນີນການສືບສວນ – ສອບສວນ ຕາມຂັ້ນຕອນຂອງກົດໝາຍ.

ຂ່າວຈາກ: ຄວາມສະຫງົບ Lao Security News