ກໍາລັງ ປກຊ ຊ້ອມກຽມຄວາມພ້ອມຊ່ວຍເຫລືອນໍ້າຖ້ວມ ຢູ່ ແຂວງບໍລິຄຳໄຊ, ຄຳມ່ວນ ແລະ ແຂວງສະຫວັນນະເຂດ

ວັນທີ 23 ກໍລະກົດ 2026 ກອງພັນ 564 (ຊ່າງແສງ) ກອງພົນທີ 4 ໄດ້ກວດກາຄວາມພ້ອມດ້ານຈຳນວນພົນ, ພາຫະນະ ແລະ ເຕັກນິກ ເພື່ອຮັບປະກັນໃຫ້ແກ່ວຽກງານ ຕ້ານ ແລະ ກອບກູ້ ໄພພິບັດທາງທຳມະຊາດ ທີ່ອາດຈະເກີດຂຶ້ນ ໃນ 3 ແຂວງພາກກາງ, ໂດຍມີສະຫາຍ ພັນໂທ ຄຳແກ້ວ ກົງປາລີ ຫົວໜ້າພະແນກຊ່າງແສງ ພ້ອມຄະນະ, ມີສະຫາຍ ພັນໂທ ອຳພອນ ສອນມະນີ ຫົວໜ້າການທະຫານ ກອງພັນ 564, ຄະນະພັກ-ຄະນະບັນຊາກອງຮ້ອຍ, ວິຊາການ ແລະ ພະນັກງານ-ນັກຮົບ ເຂົ້າຮ່ວມ.

ສະຫາຍ ພັນຕີ ຄຳມ່ວນ ພົມມີໄຊ ຫົວໜ້າການທະຫານ ກອງຮ້ອຍເຕັກນິກ ກອງພັນ 564 ໃຫ້ຮູ້ວ່າ: ໂດຍການປະຕິບັດຕາມແຜນການ ແລະ ຄຳສັ່ງ ຂອງກົມສູ້ຮົບ ກົມໃຫຍ່ເສນາທິການກອງທັບ ດັ່ງນັ້ນ, ກອງພົນທີ 4 ຈຶ່ງອະນຸມັດໃຫ້ ກອງພັນ 564 ຈັດຕັ້ງກວດກາຄວາມພ້ອມດ້ານກຳລັງພົນ, ພາຫະນະ ແລະ ເຕັກນິກ ໃຫ້ປະຕິບັດຕາມແຜນການ, ບັນດາເນື້ອໃນ, ຄາດໝາຍ, ທິດສະດີ ແລະ ຫລັກການໃຫ້ບັນດານັກຂັບຂີ່ມີຄວາມຊໍານິຊໍານານ ສາມາດຮັບປະກັນທາງດ້ານການກຽມພ້ອມກອບກູ້ຊ່ວຍເຫລືອໄພພິບັດທາງທຳມະຊາດ ທີ່ອາດຈະເກີດຂຶ້ນ ໃນ 3 ແຂວງເຂດພາກກາງ: ບໍລິຄຳໄຊ, ຄຳມ່ວນ ແລະ ແຂວງສະຫວັນນະເຂດ ໃຫ້ມີຄວາມປອດໄພ 100℅.