ປກສ ແຂວງຈຳປາສັກ ກັກຕົວເປົ້າໝາຍ ກໍ່ອາຊະຍາກຳທາງອິນເຕີເນັດ 22 ຄົນ.

ອີງຕາມການລາຍງານຂອງເຈົ້າໜ້າທີ່ວິຊາສະເພາະພະແນກຕໍາຫຼວດຄຸ້ມຄອງຄົນຕ່າງປະເທດ ຫ້ອງສັນຕິບານ ປກສ ແຂວງຈຳປາສັກໃຫ້ຮູ້ວ່າ: ໃນຄັ້ງວັນທີ 18 ກັນຍາ 2026 ເວລາ 11 ໂມງ 00 ນາທີ ເຈົ້າໜ້າທີ່ວິຊາສະເພາະພະແນກຕໍາຫຼວດຄຸ້ມຄອງຄົນຕ່າງປະເທດ ຫ້ອງສັນຕິບານ ປກສ ແຂວງຈຳປາສັກ ໄດ້ຮັບການລາຍງານຈາກພົນລະເມືອງດີວ່າ: ອາດມີການກໍ່ອາດຊະຍາກຳທາງອິນເຕີເນັດ ຢູ່ເຂດບ້ານ ຫົວແຊ ຕາແສງຫົວແຊ ເມືອງບາຈຽງຈະເລີນສຸກ, ແຂວງຈຳປາສັກ.

ຈາກນັ້ນ, ເຈົ້າໜ້າທີ່ວິຊາສະເພາະ ປກສ ແຂວງ ໄດ້ສົມທົບກັບເຈົ້າໜ້າທີ່ພະແນກສັນຕິບານ ປກສ ເມືອງບາຈຽງຈະເລີນສຸກ ແລະ ອໍານາດການປົກຄອງບ້ານ ຫົວແຊ, ເຂົ້າກວດກາຈຸດ ສົງໃສ ກ່ຽວກັບການພັກເຊົາຢູ່ເຮືອນເຊົ່າຫຼັງໜື່ງ ຕັ້ງຢູ່ເຂດບ້ານ ຫົວແຊ.

ຜ່ານການກວດກາ ພົບເຫັນຜູ້ຖືກສົງໃສກໍ່ອາຊະຍາກຳທາງອິນເຕີເນັດເປັນຄົນຕ່າງປະເທດ ເຈົ້າໜ້າທີ່ຈິ່ງຄວບຄຸມຕົວຜູ້ຖືກສົງໃສເປັນຊາວຈີນ 22 ຄົນ ຍິງ 1ຄົນ ພ້ອມເຄື່ອງຂອງກາງ ຄອມພິວເຕີ້ຕັ້ງໂຕະ 49 ໜ່ວຍ, ໂທລະສັບ 237 ໜ່ວຍ,ຫົວຊີພີຢູ ຈໍານວນ 27 ໜ່ວຍ, ໝໍ້ຍົກໄຟ ຈໍານວນ 07 ໜ່ວຍແລະ ເຄື່ອງຮັບໃຊ້ອື່ນໆອີກຈໍານວນໜຶ່ງ.

ສ່ວນຄະດີດັ່ງກ່າວ ຍັງຢູ່ໃນຂັ້ນຕອນດໍາເນີນການສືບສວນ-ສອບສວນ ຂອງເຈົ້າໜ້າທີ່ ວິຊາສະເພາະ.

ຂ່າວ: ປກສ ແຂວງຈຳປາສັກ