ແຈ້ງການຫຼີກລ້ຽງການສັນຈອນຊົ່ວຄາວ! ຢູ່ ຖະໜົນລ້ານຊ້າງ ເບື້ອງຂາເຂົ້າ ເຂດໄຟອຳນາດ ໂຮງຮຽນ ມສ ວຽງຈັນ ໄປຫາ ໄຟອຳນາດທະນາຄານລາວ-ຝຣັ່ງ.

ວັນທີ 23 ກັນຍາ 2026 ພະແນກໂຍທາທິການ ແລະ ຂົນສົ່ງ ນະຄອນຫລວງວຽງຈັນ, ອອກແຈ້ງການ ຫລີກລ້ຽງການສັນຈອນຊົ່ວຄາວຢູ່ ຖະໜົນລ້ານຊ້າງ ເບື້ອງຂາເຂົ້າ ເຂດ ໄຟອໍານາດ ໂຮງຮຽນ ມສ ວຽງຈັນ ໄປຫາ ໄຟອຳນາດທະນາຄານລາວ-ຝຣັ່ງ.

ພະແນກໂຍທາທິການ ແລະ ຂົນສົ່ງ ນະຄອນຫລວງວຽງຈັນ ແຈ້ງມາຍັງ ຜູ້ນໍາໃຊ້ ລົດໃຊ້ຖະໜົນໃນທົ່ວນະຄອນຫລວງວຽງຈັນ ຊາບວ່າ: ໃນລະຫວ່າງ ວັນເສົາ ແລະ ວັນອາທິດ ທີ 26 – 27 ກັນຍາ 2026, ແມ່ນໃຫ້ບັນດາທ່ານຫລີກລ່ຽງການສັນຈອນ ຊົ່ວຄາວ ຢູ່ຖະໜົນລ້ານຊ້າງ ເບື້ອງຂາເຂົ້າ ເຂດ ແຕ່ໄຟອຳນາດໂຮງຮຽນ ມສ ວຽງຈັນ ໄປຫາ ໄຟອຳນາດທະນາຄານລາວ-ຝຣັ່ງ, ເພື່ອອໍານວຍຄວາມສະດວກ ໃນການກໍ່ສ້າງຂຸດເຈາະໜ້າທາງເພື່ອວາງທໍ່ນໍ້າຂ້າມທາງ ຂອງໂຄງການ ກໍ່ສ້າງລະບົບລ້າງທໍາຄວາມສະອາດ-ລະບາຍຄວາມຮ້ອນຂອງຖະໜົນ ດ້ວຍລະບົບຄວບຄຸມອັດສະລິຍະ (Smart Clean-Cooling Road System (CCRS)) ໃຫ້ສໍາເລັດຕາມແຜນ.

ວັນທີ ແລະ ເວລາປິດການສັນຈອນຊົ່ວຄາວ:

ໃນວັນເສົາ ແລະ ວັນອາທິດ (ວັນທີ 26 – 27 ກັນຍາ 2026ນີ້!)

ຜູ້ໃຊ້ລົດໃຊ້ຖະໜົນທີ່ມາຈາກ ເສັ້ນທາງໜ້າສໍານັກງານນາຍົກລັດຖະມົນຕີ ມີຈຸດປະສົງຈະຜ່ານເສັ້ນທາງ ດັ່ງກ່າວ ສາມາດໃຊ້ເສັ້ນທາງເວັ້ນ ດັ່ງນີ້:

– ລ້ຽວຂວາອ້ອມໄປຕາມກໍາແພງໂຮງຮຽນ ມສ ວຽງຈັນ ໄປຖະໜົນສີສະຫວາດ ແລະ ຖະໜົນສາຍລົມ;

– ລ້ຽວຊ້າຍໄປທາງ ຖະໜົນ ຂ້າງຫ້ອງວ່າການ ນະຄອນຫລວງວຽງຈັນ ໄປຫາ ຖະໜົນໜອງບອນ.

ສໍາລັບຜູ້ທີ່ອາໄສຢູ່ບ້ານ ຫລື ມີສໍານັກງານ ຢູ່ໃນເຂດດັ່ງກ່າວແມ່ນໃຫ້ປະຕິບັດຕາມການແນະນໍາຂອງເຈົ້າໜ້າທີ່ ຕຳຫລວດຈະລາຈອນ ໃນເວລາເຂົ້າ-ອອກ ເສັ້ນທາງດັ່ງກ່າວ.