ກັກຕົວໄວລຸ້ນຫລວງພະບາງ 3 ແກ້ງ ຂັບຂີ່ລົດແຂ່ງກັນ ດັດແປງສະພາບເຕັກນິກລົດ, ບໍ່ມີໃບຂັບຂີ່ ຈຳນວນ 24 ຄົນ ມາເຮັດບົດບັນທຶກສຶກສາອົບຮົມ

ວາລະສານ ປກສ ແຂວງຫລວງພະບາງ ລາຍງານວ່າ: ວັນທີ 24 ກັນຍາ 2026 ກອງບັນຊາການ ປກສ ນະຄອນ-ຫລວງພະບາງ ໄດ້ນຳຕົວກຸ່ມແກ້ງດັດແປງສະພາບເຕັກນິດລົດ ມາເຮັດບົດບັນທຶກສຶກສາອົບຮົມ, ໂດຍການເຂົ້້າຮ່ວມຂອງທ່ານ ພັນໂທ ໄວຍະສັກ ຄຳພິຈິດ ຮອງຫົວໜ້າກອງບັນຊາການ ປກສ ນະຄອນຫລວງພະບາງ, ທ່ານນາງ ຄຳຂາວ ແສງອາຄົມ ເລຂາຄະນະບໍລິຫານງານຊາວໜຸ່ມ ນະຄອນ-ຫລວງພະບາງ, ມີບັນດາຄະນະຮັບຜິດຊອບ ສຶກສາອົບຮົມ, ຜູ້ລະເມີດກົດລະບຽບການສັນຈອນ ແລະ ພໍ່ແມ່ຜູ້ປົກຄອງເຂົ້າຮ່ວມ.

ກຸ່ມແກັງດັ່ງກ່າວ, ເຈົ້້າໜ້າທີ່ ໄດ້ມີການຈັດຕັ້ງວາງກໍາລັງ ເຄື່ອນໄຫວຕິດຕາມ ກວດກາການສັນຈອນຂອງບັນດາຜູ້ໃຊ້ລົດໃຊ້ຖະໜົນ ແລະ ສະກັດກັ້ນ ບັນດາກຸ່ມແກ້ງ ດັດແປງສະພາບເຕັກນິກລົດ, ໃຊ້ສຽງດັງເກີນຂອບເຂດ ແລະ ມີການຂັບຂີ່ລົດແຂ່ງກັນຕາມເສັ້ນທາງຫລວງ ເຮັດໃຫ້ການສັນຈອນພົບຄວາມຫຍຸ້ງຍາກຕິດຄັດ.

ຜ່ານການຕິດຕາມກວດກາ ຂອງເຈົ້າໜ້າທີ່ ສາມາດສະກັດຈັບ ລົດຈັກທີ່ດັດແປງສະພາບເຕັກນິກ ແລະ ກຸ່ມແກ້ງຂີ່ລົດແຂ່ງກັນໄດ້ 3 ກຸ່ມແກ້ງ, ກັກລົດໄດ້ 12 ຄັນ, ຖານການລະເມີດມີຄື: ລົດດັດແປງໃສ່ທໍ່ອາຍສຽງດັງ 32 ຄັນ, ລົດດັດແປງໃສ່ຢາງນ້ອຍໜ້າ-ຫລັງ ມີ 15 ຄັນ, ດັດແປງ ປາດເບາະນັ່ງ 23 ຄັນ, ບໍ່ໃສ່ແວ່ນສ່ອງຂ້າງ ຫລັງ ສ່ອງຫລັງ 37 ຄັນ, ລົດບໍ່ມີເອກະສານ 7 ຄັນ, ກັກຕົວເດັກອາຍຸບໍ່ເຖິງກະສຽນ ຕໍ່າກວ່າ 15 ປີ ຈໍານວນ 10 ຄົນ ແລະ ບໍ່ມີໃບຂັບຂີ່ ຈຳນວນ 24 ຄົນ.

ໃນໂອກາດນີ້ ເຈົ້າໜ້າທີ່ ໄດ້ເຜີຍແຜ່ ກົດລະບຽບການສັນຈອນ ບາງມາດຕາ ເພື່ອໃຫ້ນັກຂັບຂີ່ ຜູ້ທີ່ລະເມີດລະບຽບການສັນຈອນ ໄດ້ທົບທວນຄືນ ເຖິງຄວາມຜິດພາດຂອງຕົນເອງ ທີ່ລະເມີດກົດລະບຽບການສັນຈອນ ສ້າງຄວາມວຸ້ນວາຍແກ່ສັງຄົມໃນໄລຍະຜ່ານມາ, ພ້ອມນີ້ ຍັງເປັນການເຮັດໃຫ້ບັນດາ ພໍ່ແມ່ຜູ້ປົກຄອງ ມີຄວາມຮັບຮູ້ ບັນດາລະບຽບກົດໝາຍຈະລາຈອນທາງບົກຢ່າງເລິກເຊີ່ງ ນຳໄປສຶກສາອົບຮົມລູກຫຼານຂອງຕົນ ທີ່ຮູ້ເທົ່າບໍ່ເຖິງການ ໃຫ້ມີສະຕິຕື່ນຕົວເຄົາລົບລະບຽບການສັນຈອນຢ່າງເຂັ້ມງວດ.