ສປ ຈີນສົ່ງທ່ານທູດແພນດ້າຍັກ 2 ໂຕ ໄປນະຄອນແອັດແລນຕາ ສະຫະລັດ ເປັນເວລາ 10 ປີ ສືບຕໍ່ “ການທູດແພນດ້າ”.

ສປ ຈີນ ສົ່ງແພນດ້າຍັກ “Ping Ping” ແລະ “Fu Shuang” ເດີນທາງຈາກເມືອງເສິງຕູ ໄປສະຫະລັດ ເພື່ອໄປອາໄສຢູ່ສວນສັດແອັດແລນຕາ ລັດຈໍເຈຍ ເປັນເວລາ 10 ປີ ຫຼັງຈາກປະທານາທິບໍດີ ສີ ຈິ້ນຜິງ ເດີນທາງໄປວໍຊິງຕັນ.

ຈີນໄດ້ສົ່ງແພນດ້າຍັກ 2 ໂຕ ຄື “Ping Ping” ແພນດ້າເພດຜູ້ ແລະ “Fu Shuang” ແພນດ້າເພດແມ່ ເດີນທາງໄປສະຫະລັດໃນຕອນເຊົ້າວັນອາທິດທີ 27 ກັນຍາ ຕາມລາຍງານຂອງສື່ທາງການຈີນ. ທັງສອງມີກຳນົດຈະອາໄສຢູ່ທີ່ສວນສັດແອັດແລນຕາ ລັດຈໍເຈຍ ເປັນເວລາ 10 ປີ.

ແພນດ້າທັງສອງອອກເດີນທາງຈາກສະໜາມບິນນານາຊາດ Chengdu Shuangliu ດ້ວຍຖ້ຽວບິນເໝົາລຳຂອງສາຍການບິນ FedEx ໃນເວລາປະມານ 03:00 ໂມງຕາມເວລາທ້ອງຖິ່ນ ໂດຍໃຊ້ເວລາບິນປະມານ 15 ຊົ່ວໂມງ.

ສຳລັບອາຫານໃນລະຫວ່າງເດີນທາງ ມີການກຽມ ຊາລາເປົາສາລີນຶ່ງ, ໜໍ່ໄມ້ ແລະແຄຣອດ ໃຫ້ແພນດ້າທັງສອງກິນຕະຫຼອດຖ້ຽວບິນ. ຂະນະດຽວກັນ ເຮືອບິນ Boeing 777 ຂອງ FedEx ທີ່ໃຊ້ຂົນສົ່ງແພນດ້າ ກາຍເປັນຖ້ຽວບິນທີ່ມີຄົນຕິດຕາມຫຼາຍທີ່ສຸດໃນແພລດຟອມ FlightRadar24 ໃນຂະນະທີ່ກຳລັງເຂົ້າໃກ້ລັດອາລາສະກາ ເຊິ່ງຢູ່ປະມານເຄິ່ງທາງຂອງເສັ້ນທາງບິນ.

ການສົ່ງແພນດ້າຄັ້ງນີ້ເປັນສ່ວນໜຶ່ງຂອງ ຄວາມຮ່ວມມື ທີ່ຈີນແລະສະຫະລັດໄດ້ຕົກລົງກັນໄວ້ກ່ອນໜ້ານີ້. ການເດີນທາງຄັ້ງນີ້ຖືກປະກາດໃນຊ່ວງທີ່ປະທານາທິບໍດີ ສີ ຈິ້ນຜິງ ເດີນທາງໄປວໍຊິງຕັນໃນວັນພະຫັດຜ່ານມາ.

ກ່ອນອອກເດີນທາງ ໄດ້ມີການຈັດພິທີອຳລາແພນດ້າທັງສອງຢູ່ສູນວິໄຈແລະເພາະພັນແພນດ້າຍັກເສິງຕູ. ຂະນະທີ່ຝ່າຍສະຫະລັດໄດ້ສົ່ງພະນັກງານຜູ້ດູແລແພນດ້າທີ່ມີປະສົບການຮ່ວມເດີນທາງໄປນຳ ເພື່ອດູແລທັງສອງຕະຫຼອດຖ້ຽວບິນ.

ດ້ານສວນສັດແອັດແລນຕາ ໄດ້ປັບປຸງພື້ນທີ່ຈັດສະແດງແພນດ້າ ແລະຈັດຕຽມທີມງານດູແລສັດເພື່ອຮອງຮັບສະມາຊິກໃໝ່. ພ້ອມທັງຈັດຫາແຫຼ່ງໄຜ່ທີ່ມີຄວາມສະໝ່ຳສະເໝີໃນໄລຍະຍາວ ໂດຍໄຜ່ດັ່ງກ່າວປູກຢູ່ໃນພື້ນທີ່ທ້ອງຖິ່ນຂອງແອັດແລນຕາ ເຊິ່ງມີສະພາບອາກາດໃກ້ຄຽງກັບເມືອງເສິງຕູຂອງຈີນ.

ສວນສັດແອັດແລນຕາເຄີຍຮັບແພນດ້າຈາກຈີນມາລ້ຽງເປັນເວລາຍາວນານເຖິງ 25 ປີ ເລີ່ມຕັ້ງແຕ່ປີ 1999 ແຕ່ນັບຕັ້ງແຕ່ປີ 2024 ເປັນຕົ້ນມາ ສວນສັດແຫ່ງນີ້ບໍ່ມີແພນດ້າຢູ່ອີກເລີຍ.

ແພນດ້າທັງສອງໂຕເກີດໃນປີ 2020. ປັດຈຸບັນ Ping Ping ມີອາຍຸ 6 ປີ ສ່ວນ Fu Shuang ຈະມີອາຍຸຄົບ 6 ປີໃນເດືອນໜ້າ. ແພນດ້າທີ່ຢູ່ໃນສະຖານທີ່ລ້ຽງດູມັກມີອາຍຸປະມານ 30 ປີ.

ການສົ່ງແພນດ້າໄປຍັງປະເທດຕ່າງໆທົ່ວໂລກ ເກີດຂຶ້ນມາຫຼາຍທົດສະວັດແລ້ວ ໂດຍຈີນໃຊ້ແພນດ້າເປັນສ່ວນໜຶ່ງຂອງສິ່ງທີ່ເອີ້ນວ່າ “ການທູດແພນດ້າ” (Panda Diplomacy) ເພື່ອສົ່ງເສີມສາຍສຳພັນ ແລະຄວາມຮ່ວມມືກັບຕ່າງປະເທດ.

ຍ້ອນກັບໄປໃນປີ 1972 ຈີນເຄີຍມອບແພນດ້າ 1 ຄູ່ໃຫ້ແກ່ສະຫະລັດ ຫຼັງຈາກປະທານາທິບໍດີ Richard Nixon ຂອງສະຫະລັດ ເດີນທາງໄປຢ້ຽມຢາມຈີນ ເຊິ່ງຖືເປັນເຫດການສຳຄັນໃນປະຫວັດສາດສາຍສຳພັນລະຫວ່າງ 2 ປະເທດ.

ດັ່ງນັ້ນ ການເດີນທາງຂອງ Ping Ping ແລະ Fu Shuang ໃນຄັ້ງນີ້ ຈຶ່ງຖືເປັນການກັບຄືນຂອງແພນດ້າຈີນສູ່ສວນສັດແອັດແລນຕາອີກຄັ້ງ ແລະເປັນອີກໜຶ່ງພາບສະທ້ອນເຖິງບົດບາດຂອງແພນດ້າໃນຖານະ ທູດສັນຕິໄມຕີ ທີ່ມີຕໍ່ສາຍສຳພັນລະຫວ່າງຈີນກັບນານາຊາດ.

ທີ່ມາ: Channel NewsAsia