ປິດແລ້ວ! ສູນປະຕິບັດທຳຫຼັກ 38 ປະກາດຢຸດກິດຈະກຳ ຫຼັງຮັບຮູ້ຂໍ້ຕົກລົງຢ່າງເປັນທາງການ

ໂດຍປະຕິບັດຕາມຂໍ້ຕົກລົງ ສະບັບເລກທີ 874/ຄປນວ, ລົງວັນທີ 24 ກັນຍາ 2026 ວ່າດ້ວຍການຍົກເລີກ ແລະ ໂຈະການເຄື່ອນໄຫວຂອງ ສູນປະຕິບັດທຳ ຫຼັກ 38 ເຊິ່ງຕັ້ງຢູ່ບ້ານ ສ້າງໃສ, ເມືອງປາກງື່ມ, ນະຄອນຫຼວງວຽງຈັນ.

ວັນທີ 25 ກັນຍາ 2026 ນີ້, ທາງຄະນະກໍາມະການປົກຄອງເມືອງ ປາກງື່ມ ໄດ້ອອກຂໍ້ຕົກລົງ ສະບັບເລກທີ 513/ຄປມ.ປງ, ວ່າດ້ວຍການແຕ່ງຕັ້ງຄະນະກໍາມະການຈັດຕັ້ງປະຕິບັດຂໍ້ຕົກລົງດັ່ງກ່າວ ເຊີ່ງປະກອບມີ ຄະນະກໍາມະການປົກຄອງເມືອງ ປາກງື່ມ, ກຳລັງ ປກສ – ປກຊ ເມືອງ, ຄະນະກໍາມະການປົກຄອງຕາແສງ ນາຊອນ, ບ້ານ ສ້າງໃສ ແລະ ບ້ານ ໜອງບົວທອງ. ພ້ອມທັງ ໄດ້ລົງຈັດຕັ້ງປະຕິບັດງານຕົວຈິງ ໃນການປິດ ແລະ ໂຈະການເຄື່ອນໄຫວກິດຈະກໍາຕ່າງໆ ໃນບໍລິເວນສູນປະຕິບັດທໍາຫຼັກ 38 ຢ່າງເປັນທາງການ ໃນວັນທີ 26 ກັນຍາ 2026.

ໃນການລົງປະຕິບັດງານຄັ້ງນີ້, ຄະນະກຳມະການ ໄດ້ຜ່ານຂໍ້ຕົກລົງ ສະບັບເລກທີ 874/ຄປນວ ແລະ ຂໍ້ຕົກລົງ ສະບັບເລກທີ 513/ຄປມ.ປງ ໃຫ້ (ທ່ານ ນ. ທອງແກ້ວ ຊຸມພົນພັກດີ ຜູ້ນໍາສູນປະຕິບັດທຳຫຼັກ 38, ຜູ້ປະກາດຕົນເປັນພຣະສີອະຣິຍະເມຕໄຕຣ) ພ້ອມດ້ວຍຄະນະ ແລະ ຜູ້ທີ່ມາປະຕິບັດທໍາຢູ່ສູນໄດ້ຮັບຮູ້, ເຂົ້າໃຈຢ່າງຈະແຈ້ງ ກ່ຽວກັບ ເນື້ອໃນຂໍ້ຕົກລົງ.

ຜ່ານການຮັບຟັງຂໍ້ຕົກລົງດັ່ງກ່າວ ທ່ານ ນ. ທອງແກ້ວ ຊຸມພົນພັກດີ ພ້ອມຄະນະ ກໍໄດ້ໃຫ້ການຍອມຮັບ ແລະ ຍິນຍອມ ປະຕິບັດຕາມຂໍ້ຕົກລົງຂອງທາງການ. ເຊິ່ງພາຍຫຼັງມີການຍອມຮັບປິດສູນປະຕິບັດທຳຫຼັກ 38 ແລ້ວ, ຄະນະກຳມະການໄດ້ອຳນວຍຄວາມສະດວກໃຫ້ຜູ້ມາປະຕິບັດທໍາ ແລະ ຄະນະໄດ້ເດີນທາງກັບເຮືອນຊານຂອງຕົນເອງຢ່າງປອດໄພ.

ໂດຍລວມແລ້ວ ການລົງຈັດຕັ້ງປະຕິບັດງານຂອງຄະນະກຳມະການໃນຄັ້ງນີ້ ແມ່ນສາມາດຮັກ ສາໄດ້ຄວາມສະຫງົບ, ຄວາມເປັນລະບຽບຮຽບຮ້ອຍ ແລະ ມີຄວາມປອດໄພ 100%.

ຂໍ້ມູນ: ໂທລະພາບນະຄອນຫລວງວຽງຈັນ