ປກສ ແຂວງສະຫວັນນະເຂດ ມ້າງແກ້ງສະແກມເມີ ແລະ ກຸ່ມຊື້-ຂາຍໃບກະທ້ອມ ລາຍໃຫຍ່

ໃນວັນທີ 28 ກັນຍາ 2026 ເຈົ້າໜ້າທີ່ ກອງບັນຊາການ ປກສ ແຂວງສະຫວັນນະເຂດ ໄດ້ປະສານສົມທົບກັບພາກສ່ວນກ່ຽວຂ້ອງ ເຂົ້າກວດຄົ້ນເຄຫະສະຖານ ແລະ ສະຖານທີ່ເປົ້າໝາຍ ຫຼັງສືບຮູ້ວ່າມີການເຄື່ອນໄຫວອາຊະຍາກໍາທາງອິນເຕີເນັດ ຫຼື ສະແກມເມີ ແລະ ເຄື່ອນໄຫວຊື້-ຂາຍ ໃບກະທ້ອມ.

ຜ່ານການລົງກວດຄົ້ນຕົວຈິງຢູ່ 2 ຈຸດ ເປົ້າໝາຍ, ເຈົ້າໜ້າທີ່ສາມາດກັກຕົວຜູ້ຕ້ອງສົງໄສ ແລະ ຢຶດຂອງກາງໄດ້ເປັນຈໍານວນຫຼວງຫຼາຍ ດັ່ງນີ້:

ຈຸດທີ 1 (ເຮືອນເຊົ່າ ບ້ານໂພນສະຫວ່າງໃຕ້ ນະຄອນໄກສອນພົມວິຫານ): ເຊິ່ງເປັນຈຸດເຄື່ອນໄຫວອາຊະຍາກໍາທາງອິນເຕີເນັດ. ເຈົ້າໜ້າທີ່ໄດ້ກັກຕົວຜູ້ຖືກສົງໄສທັງໝົດ 15 ຄົນ (ສັນຊາດຈີນ 14 ຄົນ ແລະ ສັນຊາດລາວ 1 ຄົນ); ພ້ອມທັງຢຶດອຸປະກອນທີ່ນໍາໃຊ້ເຂົ້າໃນການກະທໍາຜິດ ປະກອບມີ: ຄອມພິວເຕີຕັ້ງໂຕະ 38 ເຄື່ອງ ແລະ ໂທລະສັບສະມາດໂຟນ 41 ເຄື່ອງ.

ຈຸດທີ 2 (ເຮືອນຫ້ອງແຖວໃຫ້ເຊົ່າ ບ້ານສະໜາມໄຊນະຄອນໄກສອນພົມວິຫານ): ເຊິ່ງເປັນຈຸດເຄື່ອນໄຫວຊື້-ຂາຍ ໃບກະທ້ອມ ແລະ ນໍ້າຢາດີໄອ. ເຈົ້າໜ້າທີ່ໄດ້ກັກຕົວຜູ້ຖືດສົງໄສ 2 ຄົນ (ສັນຊາດລາວ ທັງສອງຄົນ, ຍິງ 1 ຄົນ); ພ້ອມຢຶດຂອງກາງ ໃບກະທ້ອມ ຈໍານວນ 3 ກະສອບໃຫຍ່ ກັບ 134 ຖົງນ້ອຍ, ນໍ້າຢາດີໄອ (Lean) ຈໍານວນ 22.963 ຂວດ ແລະ ລົດໃຫຍ່ 1 ຄັນ.

ປັດຈຸບັນ, ເຈົ້າໜ້າທີ່ ກຳລັງດໍາເນີນການສືບສວນ-ສອບສວນ ຂະຫຍາຍຜົນ ເພື່ອນໍາຕົວຜູ້ກະທໍາຜິດ ແລະ ຜູ້ຮ່ວມຂະບວນການ ມາລົງໂທດຕາມຂັ້ນຕອນຂອງກົດໝາຍຢ່າງເຄັ່ງຮ້ອນ.

ຂ່າວ: ປກສ ແຂວງສະຫວັນນະເຂດ