ຄໍາມ່ວນ ທໍາລາຍສິ້ນສ່ວນເຄື່ອງໃນໝູທີ່ລັກລອບນຳເຂົ້າ 28.000 ກິໂລກຣາມ

ຂປລ. ແຫລ່ງຂ່າວຈາກ ແຂວງຄຳມ່ວນ ໃຫ້ຮູ້ວ່າ: ຂະແໜງລ້ຽງສັດ ແລະ ການປະມົງ ແຂວງຄໍາມ່ວນ ຮ່ວມກັບພາກສ່ວນກ່ຽວຂ້ອງ ຈັດພິທີຝັງທໍາລາຍສິ້ນສ່ວນເຄື່ອງໃນໝູຈໍານວນ 1.400 ແພັກ, ມີນໍ້າໜັກ 28.000 ກິໂລກຣາມ ທີ່ລັກລອບນຳເຂົ້າ ໃນວັນທີ 29 ກັນຍາ 2026 ທີ່ສະໜາມຖິ້ມຂີ້ເຫຍື້ອ ບ້ານນາບວບ ເມືອງທ່າແຂກ.

ສິ້ນສ່ວນເຄື່ອງໃນໝູຈໍານວນດັ່ງກ່າວ, ແມ່ນຄະນະສະເພາະກິດແຂວງຄຳມ່ວນ ໄດ້ສົມທົບກັບວິຊາການຂະແໜງລ້ຽງສັດ ແລະ ການປະມົງ ລົງກວດກາ ລົດບັນທຸກສິນຄ້າທະບຽນ 12 H 02252 ຂັບໂດຍຄົນສັນຊາດຫວຽດນາມ ໃນວັນທີ 28 ກັນຍາ 2026 ຜ່ານມາ, ຊຶ່ງໄດ້ຂົນສົ່ງສິນຄ້າປະເພດເຄື່ອງໃນໝູ (ກະເພາະໝູແຊ່ແຂງ) ໂດຍກວດພົບຢູ່ບໍລິເວນເຂດບ້ານດົງມ່ວງໄຂ ເມືອງທ່າແຂກ ແຂວງຄໍາມ່ວນ, ສິນຄ້າດັ່ງກ່າວ ໄດ້ຢຶດມາໄວ້ທີ່ກອງກວດກາຊັບພະຍາກອນທໍາມະຊາດ ແລະ ສິ່ງແວດລ້ອມ ເພື່ອປະຕິບັດຕາມແຈ້ງການດ່ວນ ຂອງຫ້ອງວ່າການແຂວງ ສະບັບເລກທີ 814/ຫວຂ ລົງວັນທີ 11 ກັນຍາ 2026 ແລະ ແຈ້ງການຂອງພະແນກກະສິກໍາ ແລະ ສິ່ງແວດລ້ອມແຂວງ 3653/ກສຂ ວ່າດ້ວຍການເພີ່ມທະວີ ກຽມຮັບມືກັບການລະບາດຂອງພະຍາດອະຫິວາໝູ ອາຟຣິກາ ໃນຂອບເຂດທົ່ວແຂວງ ແລະ ເປັນການປ້ອງກັນ, ເຝົ້າລະວັງການລະບາດຂອງພະຍາດອະຫິວາໝູ ອາຟຣິກາ ແລະ ອີງຕາມບັນທຶກການກວດກາຕົວຈິງ ໃນການຢຶດສິນຄ້າຂອງຄະນະສະເພາະກິດໃນຄັ້ງວັນທີ 28 ກັນຍາ 2026 ທາງຄະນະສະເພາະກິດ, ວິຊາການສັດຕະວະແພດ ຈຶ່ງຂໍສະເໜີອະນຸຍາດທໍາລາຍສິນຄ້າດັ່ງກ່າວ.

ການກວດພົບສິ້ນສ່ວນເຄື່ອງໃນໝູໃນຄັ້ງນີ້ ຖືວ່າເປັນລ໋ອດໃຫຍ່ໃນຮອບປີ. ປັດຈຸບັນທາງເຈົ້າໜ້າທີ່ກ່ຽວຂ້ອງໄດ້ທໍາການຢຶດລົດບັນທຸກສິນຄ້າ ປະເພດເຄື່ອງໃນໝູ ພ້ອມທັງກັກຕົວຄົນຂັບລົດຄົນສັນຊາດຫວຽດນາມໄວ້ ເພື່ອທໍາການສອບສວນສືບສວນ ແລະ ດໍາເນີນການຕາມລະບຽບກົດໝາຍຂອງ ສປປ ລາວ.