ກິດຈະກຳກວດສຸຂະພາບ ແລະ ແຈກຢາ ເພື່ອເອົາໃຈໃສ່ຕໍ່ສຸຂະພາບ ແລະ ສ້າງສ້າງຄວາມເບີກບານມ່ວນຊື່ນໃຫ້ແກ່ບັນດາຜູ້ສູງອາຍຸ

ວັນທີ 1 ຕຸລາ 2026, ທີ່ສະໂມສອນຫ້ອງວ່າການເມືອງແກ່ນທ້າວ ແຂວງໄຊຍະບູລີ, ໄດ້ຈັດພິທີລະນຶກວັນຄົນພິການແຫ່ງຊາດ ຄົບຮອບ 34 ປີ ແລະ ວັນຜູ້ອາຍຸສູງສາກົນ ຄົບຮອບ 27 ປີ, ໂດຍມີທ່ານ ຄຳປຸ່ນ ນວນສະບັບ, ກຳມະການພັກແຂວງ, ເລຂາຄະນະບໍລິຫານງານພັກເມືອງ ເປັນປະທານ, ພ້ອມດ້ວຍພະນັກງານອາວຸໂສບຳນານ, ແຂກຖືກເຊີນ ແລະ ບັນດາຜູ້ອາຍຸສູງເຂົ້າຮ່ວມ.

ໃນໂອກາດດັ່ງກ່າວ, ທ່ານ ຄຳປຸ່ນ ນວນສະບັບ ກ່າວວ່າ, ປັດຈຸບັນທົ່ວໂລກມີຄົນພິການຫຼາຍກວ່າ 1 ຕື້ຄົນ ຫຼື ປະມານ 15% ຂອງປະຊາກອນໂລກ, ຂະນະທີ່ຜູ້ອາຍຸສູງອາຍຸ 60 ປີຂຶ້ນໄປມີຫຼາຍກວ່າ 600 ລ້ານຄົນ. ຈຳນວນປະຊາກອນກຸ່ມນີ້ມີແນວໂນ້ມເພີ່ມຂຶ້ນໃນອະນາຄົດ.

ທ່ານກ່າວຕື່ມວ່າ, ຄົນພິການ ແລະ ຜູ້ອາຍຸສູງຍັງປະເຊີນກັບສິ່ງກີດຂວາງຫຼາຍດ້ານ ທັງຈາກໂຄງສ້າງສັງຄົມ, ການພັດທະນາເສດຖະກິດ, ທັດສະນະຄະຕິ, ໂອກາດການມີສ່ວນຮ່ວມ ແລະ ຄວາມສະເໝີພາບ. ສິ່ງດັ່ງກ່າວສະທ້ອນຜ່ານດ້ານການສຶກສາ, ການປິ່ນປົວ, ການຟື້ນຟູສຸຂະພາບ, ການຝຶກວິຊາຊີບ, ການຈ້າງງານ, ການສະໜັບສະໜູນດ້ານນິຕິກຳ ຕະຫຼອດຮອດການເຊື່ອມໂຍງຄົນພິການ ແລະ ຜູ້ອາຍຸສູງເຂົ້າໃນຂະບວນການພັດທະນາ.

ທ່ານ ຄຳປຸ່ນ ນວນສະບັບ ເນັ້ນວ່າ, ພັກ-ລັດ ໄດ້ໃຫ້ຄວາມສຳຄັນຕໍ່ຊີວິດ ແລະ ຄວາມເປັນຢູ່ຂອງປະຊາຊົນລາວບັນດາເຜົ່າ, ໂດຍສະເພາະຄົນພິການ, ເດັກນ້ອຍ, ແມ່ຍິງ ແລະ ຜູ້ອາຍຸສູງ ມາໂດຍຕະຫຼອດ. ໃນປີ 2013, ລັດຖະບານ ສປປ ລາວ ໄດ້ອອກດຳລັດເລກທີ 323/ລບ, ລົງວັນທີ 6 ກັນຍາ 2013, ວ່າດ້ວຍການຈັດຕັ້ງ ແລະ ການເຄື່ອນໄຫວຂອງຄະນະກຳມະການແຫ່ງຊາດເພື່ອຄົນພິການ ແລະ ຜູ້ອາຍຸສູງ ເພື່ອເປັນກົນໄກໃນການຄົ້ນຄວ້າ ແລະ ກຳນົດນະໂຍບາຍ, ລະບຽບກົດໝາຍ ແນໃສ່ປົກປ້ອງ ແລະ ສົ່ງເສີມສິດຂອງຄົນພິການ ແລະ ຜູ້ອາຍຸສູງ.

ນອກຈາກນັ້ນ, ສປປ ລາວ ຍັງໄດ້ໃຫ້ສັດຕະຍາບັນເຂົ້າເປັນພາຄີຂອງສົນທິສັນຍາວ່າດ້ວຍສິດທິຂອງຄົນພິການ ໃນປີ 2009 ແລະ ດຳເນີນແຜນຍຸດທະສາດຕ່າງໆ ໃນລະດັບພາກພື້ນ ແລະ ສາກົນ. ພ້ອມກັນນີ້ ຍັງຍຶດຖືຄຳຂວັນກ່ຽວກັບຄົນພິການທີ່ເນັ້ນ “ການມີສ່ວນຮ່ວມ, ການເຂົ້າເຖິງ ແລະ ການສ້າງຕັ້ງຄວາມເຂັ້ມແຂງໃຫ້ຄົນພິການ” ແລະ ສຳລັບຜູ້ອາຍຸສູງທີ່ວ່າ “ຄົນອາຍຸສູງແມ່ນບັນຫາໜຶ່ງໃນການພັດທະນາ, ຜູ້ອາຍຸສູງທີ່ມີສຸຂະພາບແຂງແຮງແມ່ນຊັບພະຍາກອນຂອງຄອບຄົວ, ຊຸມຊົນ ແລະ ເສດຖະກິດ”.

ພາຍໃນພິທີ ຍັງໄດ້ຈັດກິດຈະກຳກວດສຸຂະພາບ, ແຈກຍາຍຢາ ແລະ ກິດຈະກຳສັນທະນາການອື່ນໆ ເພື່ອສ້າງຄວາມເບີກບານມ່ວນຊື່ນ ແລະ ສົ່ງເສີມສຸຂະພາບພະລານາໄມໃຫ້ແກ່ບັນດາຜູ້ສູງອາຍຸທີ່ເຂົ້າຮ່ວມ.