ມອບຜູ້ຖືກຫາຊາວຈີນ ກັບຄືນປະເທດ

ໃນວັນທີ 1 ຕຸລາ 2026, ຢູ່ທີ່ດ່ານສາກົນບໍ່ເຕ່ນ (ສປປ ລາວ) – ບໍ່ຫ່ານ (ສປ ຈີນ) ໄດ້ມີພິທີມອບ-ຮັບ ຜູ້ຖືກຫາສັນຊາດຈີນ ທີ່ກະທຳຜິດກົດໝາຍ ຂອງ ສປປລາວ ລະຫວ່າງ ກອງບັນຊາການ ປກສ ແຂວງບໍ່ແກ້ວ (ສປປ ລາວ) ແລະ ເຈົ້າໜ້າທີ່ວິຊາສະເພາະ ສປ ຈີນ ເພື່ອນໍາສົ່ງຕົວໄປດໍາເນີນຄະດີຕາມຂັ້ນຕອນກົດໝາຍ.

ຕາງໜ້າຝ່າຍລາວມີ ທ່ານ ພັຕ ສີສະຫວັດ ໄຊຍະແສງ ຮອງພະແນກຄຸ້ມຄອງຄົນຕ່າງປະເທດ, ທ່ານ ພັຕ ພອນສັກ ສີສະຫວັດ ຮອງພະແນກຕຳຫຼວດປ້ອງກັນເສດຖະກິດ ກອງບັນຊາການ ປກສ ແຂວງບໍ່ແກ້ວ ພ້ອມດ້ວຍຄະນະ ແລະ ເຈົ້າໜ້າທີ່ກ່ຽວຂ້ອງທັງສອງຝ່າຍເຂົ້າຮ່ວມ.

ຜູ້ຖືກຫາສັນຊາດຈີນທີ່ຖືກສົ່ງຕົວໃນຄັ້ງນີ້ ມີຈໍານວນທັງໝົດ 118 ຄົນ, ຍິງ 02 ຄົນ ໃນນັ້ນມີ: ຜູ້ຖືກຫາຄະດີກໍ່ອາຊະຍາກຳທາງອິນເຕີເນັດ ຈໍານວນ 113 ຄົນ, ຍິງ 02 ຄົນ; ຂໍ້ຫາເຂົ້າເມືອງຜິດກົດໝາຍຈຳນວນ 05 ຄົນ.

ການມອບ-ຮັບ ຜູ້ຖືກຫາໃນຄັ້ງນີ້ ແມ່ນປະຕິບັດຕາມທິດຊີ້ນຳຂອງຂັ້ນເທິງ ກໍຄືການຮ່ວມມືລະຫວ່າງ ເຈົ້າໜ້າທີ່ປ້ອງກັນຄວາມສະຫງົບ ຂອງ ສປປ ລາວ ແລະ ສປ ຈີນ ໃນການສະກັດກັ້ນ ແລະ ຕ້ານອາດຊະຍາກຳຂ້າມຊາດ, ໂດຍສະເພາະແມ່ນບັນຫາການອາຊະຍາກຳທາງອິນເຕີເນັດ ແລະ ການລັກລອບເຂົ້າເມືອງໂດຍບໍ່ຖືກຕ້ອງ ທີ່ສ້າງຄວາມບໍ່ສະຫງົບໃຫ້ແກ່ສັງຄົມ.

ທາງເຈົ້າໜ້າທີ່ວິຊາສະເພາະທັງສອງຝ່າຍ ໄດ້ຮ່ວມກັນກວດກາຈຳນວນພົນ, ອຸປະກອນທີ່ໃຊ້ໃນການກະທຳຜິດ ແລະ ເອກະສານທີ່ກ່ຽວຂ້ອງຢ່າງລະອຽດ ແລ້ວພ້ອມກັນລົງນາມໃນບົດບັນທຶກມອບ-ຮັບ ຢ່າງເປັນທາງການ.