ສສຊ ເຂດ 13 ສະເໜີເລັ່ງແກ້ໄຂເສັ້ນທາງເປ່ເພ ແລະ ບັນຫາຜູ້ມີອາຍຸຕ່ຳກວ່າ 18 ປີ ເຂົ້າໃຊ້ສະຖານບັນເທີງ

ໃນກອງປະຊຸມສະໄໝສາມັນ ເທື່ອທີ 02 ຂອງສະພາແຫ່ງຊາດ ຊຸດທີ X ໃນວັນທີ 05 ຕຸລາ 2026 ນີ້, ທ່ານ ສົມບູນ ສີຫານາດ, ສະມາຊິກສະພາແຫ່ງຊາດ (ສສຊ) ປະຈໍາເຂດເລືອກຕັ້ງທີ 13 ແຂວງສະຫວັນນະເຂດ, ໄດ້ປະກອບຄໍາເຫັນຕໍ່ບົດລາຍງານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ, ແຜນງົບປະມານແຫ່ງລັດ ແລະ ແຜນເງິນຕາ ປີ 2026 ພ້ອມທັງ ທິດທາງແຜນການ ປີ 2027 ໂດຍໄດ້ເນັ້ນໃສ່ 2 ປະເດັນສໍາຄັນທີ່ສັງຄົມກໍາລັງໃຫ້ຄວາມສົນໃຈ.

ທ່ານ ສສຊ ໄດ້ຍົກໃຫ້ເຫັນວ່າ: ບັນຫາເສັ້ນທາງເປ່ເພ, ໂດຍສະເພາະໃນຊ່ວງລະດູຝົນ ແລະ ໄລຍະນໍ້າຖ້ວມທີ່ຜ່ານມາ, ໄດ້ກາຍເປັນກະແສວິພາກວິຈານຢ່າງໜັກໜ່ວງໃນສື່ອອນລາຍ. ເສັ້ນທາງຫຼັກ, ເສັ້ນທາງຍຸດທະສາດການຂົນສົ່ງ, ເສັ້ນທາງໄປຫາແຫຼ່ງທ່ອງທ່ຽວ (ເຊັ່ນ: ຫຼວງພະບາງ ແລະ ວັງວຽງ) ຮວມເຖິງເສັ້ນທາງເຂົ້າຫາສະຖານີລົດໄຟໃນຫຼາຍເຂດ ຍັງມີສະພາບເປ່ເພ, ເປັນບວກເປັນຂຸມ ແລະ ເປັນຂີ້ຝຸ່ນ, ເຊິ່ງສົ່ງຜົນກະທົບຕໍ່ພາບລັກການທ່ອງທ່ຽວຂອງປະເທດ.

ດັ່ງນັ້ນ, ທ່ານ ຈຶ່ງໄດ້ສະເໜີໃຫ້ລັດຖະບານ ພິຈາລະນາຈັດສັນ “ງົບປະມານພິເສດ” ທີ່ສາມາດເບີກຈ່າຍໄດ້ຕາມກໍານົດເວລາແທ້ໆ ເພື່ອຟື້ນຟູເສັ້ນທາງຍຸດທະສາດ ແລະ ທາງເຂົ້າສະຖານີລົດໄຟໃຫ້ມີຄວາມສວຍງາມ. ພ້ອມທັງ ເນັ້ນໃຫ້ມີການປະມູນກໍ່ສ້າງຢ່າງໂປ່ງໃສ ແລະ ກໍານົດລາຄາທີ່ສອດຄ່ອງເໝາະສົມ ເພື່ອບໍ່ໃຫ້ລັດຖະບານຕ້ອງເສຍຜົນປະໂຫຍດ.

ໃນຂົງເຂດວັດທະນະທໍາ-ສັງຄົມ, ທ່ານ ສົມບູນ ສີຫານາດ ໄດ້ສະແດງຄວາມເປັນຫ່ວງເປັນໄຍຕໍ່ອະນາຄົດຂອງເຍົາວະຊົນ ແລະ ຄົນຮຸ່ນໃໝ່. ຈາກການລົງຕິດຕາມຕົວຈິງ ພົບວ່າ ມີເດັກນ້ອຍ ແລະ ເຍົາວະຊົນ ທີ່ມີອາຍຸຫຼຸດ 18 ປີ ເຂົ້າໃຊ້ບໍລິການໃນສະຖານບັນເທີງ, ເທັກ, ບາ ຫຼາຍກວ່າ 50%. ທ່ານ ຈຶ່ງໄດ້ສະເໜີໃຫ້ລັດຖະບານ ແລະ ບັນດາກະຊວງ-ຂະແໜງການທີ່ກ່ຽວຂ້ອງ ເພີ່ມທະວີການຕິດຕາມກວດກາສະຖານບັນເທີງຕ່າງໆ ຢ່າງເຂັ້ມງວດ, ໂດຍໃຫ້ຖອດຖອນບົດຮຽນຈາກປະເທດເພື່ອນບ້ານ ທີ່ມີການກວດບັດປະຈໍາຕົວຢ່າງຈິງຈັງ ແລະ ຈໍາກັດອາຍຸຜູ້ເຂົ້າໃຊ້ບໍລິການຢ່າງເຂັ້ມງວດ (18-20 ປີຂຶ້ນໄປ) ເພື່ອປົກປ້ອງເຍົາວະຊົນ ເຊິ່ງເປັນໜໍ່ແໜງ ແລະ ຜູ້ສືບທອດອະນາຄົດຂອງຊາດ.