ລັດຖະບານຍີ່ປຸ່ນ ມອບກະແຈ ເພື່ອດູແລ ແລະ ຮັກສາຄວາມປອດໄພ ສະໜາມກິລາເຈົ້າອະນຸວົງ ໃຫ້ ສປປ ລາວ ຢ່າງເປັນທາງການ

ພິທີເຊັນສັນຍາມອບ-ຮັບກຸນແຈເພື່ອດູແລ ແລະ ຮັກສາຄວາມປອດໄພ ສະໜາມກິລາເຈົ້າອະນຸວົງ ລະຫວ່າງ ທ່ານ ວິໄລພອນ ພົມມະຫາໄຊ ຫົວໜ້າຫ້ອງການ ກະຊວງສຶກສາທິການ ແລະ ກິລາ ແຫ່ງ ສປປ ລາວ, ທ່ານ Matsuyama ປະທານບໍລິສັດທີ່ປຶກສາ Asuza Sekkei ແລະ ທ່ານ Yamada ຫົວໜ້າບໍລິສັດ Hazama Ando-Toa Road JV ຜູ້ຮັບເໝົາ ຝ່າຍໂຄງການກໍ່ສ້າງຂອງປະເທດຍີ່ປຸ່ນ

ຈັດຂຶ້ນໃນວັນທີ 12 ຕຸລາ 2026 ທີ່ອາຄານຊັ້ນໜຶ່ງ ສະໜາມກິລາເຈົ້າອະນຸວົງ ນະຄອນຫຼວງວຽງຈັນ, ມີບັນດາຫົວໜ້າກົມ-ຮອງຫົວໜ້າກົມ, ຮອງຫົວໜ້າຫ້ອງການ ແລະ ພະນັກງານທີ່ກ່ຽວຂ້ອງເຂົ້າຮ່ວມເປັນສັກຂີພິຍານ.

ໂຄງການນີ້ ໄດ້ເລີ່ມຕົ້ນລົງມືກໍ່ສ້າງ ແລະ ປັບປຸງໃນຕົ້ນປີ 2025 ຈົນມາຮອດປັດຈຸບັນ ກໍສາມາດກໍ່ສ້າງສຳເລັດຢ່າງສົມບູນແບບ, ໃນນັ້ນ ກໍມີບ່ອນນັ່ງ ທີ່ສາມາດບັນຈຸຜູ້ເຂົ້າຊົມໄດ້ເຖິງ 2.800 ຄົນ, ໜ້າບ່ອນວີໄອພີນັ່ງຊົມ ບັນຈຸໄດ້ 1.300 ຄົນ ແລະ ບ່ອນນັ່ງເບື້ອງທີ່ຕິດກັບຫ້ອງການຄະນະກຳມະການໂອແລມປີກແຫ່ງຊາດລາວ ສາມາດບັນຈຸໄດ້ 1.500 ຄົນ ເຊິ່ງສະໜາມດັ່ງກ່າວ ສາມາດນຳໃຊ້ຮອງຮັບໄດ້ທັງນັກກິລາຄົນປົກກະຕິ ແລະ ຄົນພິການ ຖືກອອກແບບມາເປັນພິເສດ, ໃນນັ້ນ ກໍຍັງມີຫ້ອງການ, ຫ້ອງປະຊຸມ, ຫ້ອງສື່ມວນຊົນ, ຫ້ອງນໍ້າ, ຫ້ອງອາຫານ ທີ່ສາມາດຮອງຮັບເຖິງ 100 ຄົນ, ຫ້ອງອອກກຳລັງກາຍ ຫຼື ຟິດເນັດ, ຫ້ອງເກັບມ້ຽນອຸປະກອນ ແລະ ຫ້ອງອື່ນໆອີກດ້ວຍ.

ພາບ-ຂ່າວໂດຍ: ສົງການ ພັນແພງດີ