ກວດພົບຈຸດລັກລອບຂຸດຄົ້ນແຮ່ຄຳ 12 ຈຸດ ຢູ່ເມືອງສັງທອງ ຢຶດລົດຈົກ 23 ຄັນ ແລະ ອຸປະກອນຫຼາຍລາຍການແຕ່ບໍ່ພົບຄົນກະທຳຜິດ
ຫ້ອງວ່າການສໍານັກງານນາຍົກລັດຖະມົນຕີ ລາຍງານວ່າ: ໃນລະຫວ່າງ ວັນທີ 23-26 ກັນຍາ 2026 ແລະ ລະຫວ່າງວັນທີ 9-11 ຕຸລາ 2026 ຄະນະສະເພາະກິດ ຂັ້ນສູນກາງ ໄດ້ສົມທົບກັບພາກສ່ວນກ່ຽວຂ້ອງ ລົງເຄື່ອນໄຫວຕິດຕາມກວດກາສະກັດກັ້ນ ການລັກລອບຂຸດຄົ້ນຊັບພະຍາກອນທຳມະຊາດ (ແຮ່ຄຳ) ຕາມຄຳສັ່ງ ສະບັບເລກທີ 06/ນຍ, ສະບັບເລກທີ 46/ນຍ ແລະ ສະບັບເລກທີ 11/ຄລພສ ຢູ່ເຂດບ້ານຊໍ້ ແລະ ບ້ານວັງມ້າ, ເມືອງສັງທອງ, ນະຄອນຫລວງວຽງຈັນ, ຊຶ່ງໄດ້ລົງແກ້ໄຂ 2 ຄັ້ງ.
– ຄັ້ງທີ 1: ຢູ່ເຂດບ້ານຊໍ້, ເມືອງສັງທອງ, ນະຄອນຫລວງວຽງຈັນ ມີ 10 ຈຸດ, ສາມາດຢຶດລົດຈົກໄດ້ 23 ຄັນ, ຕະແກງຮ່ອນຄໍາ 7 ອັນ, ຈັກປັ່ນໄຟຟ້າໃຫຍ່ 1 ເຄື່ອງ ແລະ ຂະໜາດນ້ອຍ 2 ເຄື່ອງ, ລົດກະບະ ຍີ່ຫໍ້ Ford ຈໍານວນ 1 ຄັນ ແລະ ລົດຊິ້ງ 1 ຄັນ, ຕູ້ຄອນເທນເນີ້ ພ້ອມແອ ຈໍານວນ 3 ຕູ້ ແລະ ຜ້າພົມສະກັດແຮ່ຄໍາ 127 ຜືນ.
– ຄັ້ງທີ 2: ຢູ່ເຂດບ້ານວັງມ້າ, ເມືອງສັງທອງ, ນະຄອນຫລວງວຽງຈັນ ພົບເຫັນມີຮ່ອງຮອຍການລັກລອບຂຸດຄົ້ນ 2 ຈຸດ ໃກ້ກັບເຂດທ່ອງທ່ຽວນໍ້າຕົກຕາດວັງມ້າ, ພົບເຫັນກົນຈັກອຸປະກອນຂຸດຄົ້ນຄົບຊຸດ ຈໍານວນໜຶ່ງ.
ປັດຈຸບັນ, ຄະນະສະເພາະກິດ ກໍາລັງຕິດຕາມສືບສວນ-ສອບສວນ ຊອກຫາຜູ້ກະທໍາຜິດ ແລະ ຜູ້ໃຫ້ການຮ່ວມມື ເພື່ອນໍາມາດໍາເນີນມາດຕະການ ຢ່າງເຂັ້ມງວດ.
