ຈີນ ແລະ ເກົາຫຼີເໜືອກຽມເປີດນຳໃຊ້ “ຂົວແມ່ນ້ຳຢາລູແຫ່ງໃໝ່” ຢ່າງເປັນທາງການໃນວັນທີ 15 ຕຸລາ 2026 ນີ້!

ຈີນ ແລະ ເກົາຫຼີເໜືອກຽມເປີດນຳໃຊ້ “ຂົວແມ່ນ້ຳຢາລູແຫ່ງໃໝ່” ຢ່າງເປັນທາງການໃນວັນທີ 15 ຕຸລານີ້ ຫຼັງຈາກການເປີດໃຊ້ຂົວຂ້າມຊາຍແດນລະຫວ່າງສອງປະເທດຖືກເລື່ອນອອກໄປດົນເຖິງ 12 ປີ ນັບຕັ້ງແຕ່ກໍ່ສ້າງສຳເລັດໃນປີ 2014 ເນື່ອງຈາກບັນຫາດ້ານໂຄງລ່າງພື້ນຖານຢູ່ຝັ່ງເກົາຫຼີເໜືອ. ການເປີດຂົວແຫ່ງນີ້ຖືເປັນບາດກ້າວສຳຄັນໃນການຂະຫຍາຍຊ່ອງທາງການຄ້າລະຫວ່າງສອງປະເທດ ເຖິງແມ່ນວ່າເກົາຫຼີເໜືອຍັງຄົງລະມັດລະວັງຕໍ່ການພຶ່ງພາທາງເສດຖະກິດຈາກຈີນກໍຕາມ.

ສຳນັກຂ່າວຊິນຫົວຂອງທາງການຈີນລາຍງານວ່າ ຈີນ ແລະ ເກົາຫຼີເໜືອຈະເປີດໃຊ້ຂົວລົດຍົນຂ້າມແມ່ນ້ຳຢາລູແຫ່ງໃໝ່ໃນວັນທີ 15 ຕຸລາ ໂດຍທັງສອງປະເທດຈະຈັດພິທີເປີດຮ່ວມກັນ. ນີ້ເປັນຄວາມຄືບໜ້າຄັ້ງສຳຄັນໃນການສົ່ງເສີມສາຍພົວພັນທາງເສດຖະກິດ ແລະ ການຄ້າລະຫວ່າງສອງປະເທດເພື່ອນບ້ານ.

ການເປີດຂົວເກີດຂຶ້ນໃນຊ່ວງທີ່ເກົາຫຼີເໜືອເລີ່ມຂະຫຍາຍການຕິດຕໍ່ກັບຕ່າງປະເທດອີກຄັ້ງ ຫຼັງຈາກປິດຊາຍແດນໃນຊ່ວງການລະບາດຂອງໂຄວິດ-19. ບໍລິການລົດໄຟລະຫວ່າງຈີນກັບເກົາຫຼີເໜືອໄດ້ກັບມາໃຫ້ບໍລິການໃນເດືອນມີນາຜ່ານມາ ຫຼັງຈາກຢຸດໄປດົນເຖິງ 6 ປີ. ແຕ່ເກົາຫຼີເໜືອຍັງບໍ່ໄດ້ກັບມາອອກວີຊາທ່ອງທ່ຽວໃຫ້ຊາວຈີນ ເຊິ່ງກ່ອນໜ້ານີ້ຖືເປັນກຸ່ມນັກທ່ອງທ່ຽວຕ່າງປະເທດທີ່ໃຫຍ່ທີ່ສຸດຂອງປະເທດ.

ຂະນະດຽວກັນ ເກົາຫຼີເໜືອກຳລັງຂະຫຍາຍຄວາມຮ່ວມມືກັບຣັດເຊຍ. ທັງສອງປະເທດໄດ້ເປີດໃຊ້ຂົວຖະໜົນຂ້າມແມ່ນ້ຳທູເໝິນໃນເດືອນກັນຍາຜ່ານມາ ເຊິ່ງຖືເປັນຂົວຖະໜົນແຫ່ງທຳອິດທີ່ເຊື່ອມຕໍ່ສອງປະເທດໂດຍກົງ. ການເປີດເສັ້ນທາງດັ່ງກ່າວສະທ້ອນໃຫ້ເຫັນເຖິງສາຍພົວພັນທາງເສດຖະກິດ ແລະ ຍຸດທະສາດທີ່ໃກ້ຊິດກັນຫຼາຍຂຶ້ນລະຫວ່າງພຽງຢາງກັບມົສກູ ນັບຕັ້ງແຕ່ການພົບປະຫາລືລະຫວ່າງຜູ້ນຳຂອງສອງປະເທດໃນປີ 2023.

ນັກວິເຄາະເຫັນວ່າ ການຄ້າກັບຈີນອາດມີບົດບາດສຳຄັນໃນການຈັດຫາສິນຄ້າ ແລະ ຊັບພະຍາກອນທີ່ເກົາຫຼີເໜືອຕ້ອງການ ເພື່ອພັດທະນາເສດຖະກິດພາກພົນລະເຮືອນ. ສ່ວນການຄ້າກັບຣັດເຊຍສ່ວນໃຫຍ່ແມ່ນກ່ຽວຂ້ອງກັບອາວຸດ ແລະ ອຸປະກອນທາງທະຫານ.

ເຖິງແນວນັ້ນ ເກົາຫຼີເໜືອຍັງຄົງລະມັດລະວັງບໍ່ໃຫ້ຕົນເອງພຶ່ງພາຈີນຫຼາຍເກີນໄປໃນດ້ານເສດຖະກິດ ແລະ ພະຍາຍາມຮັກສາຄວາມສົມດຸນຂອງສາຍພົວພັນກັບທັງຈີນ ແລະ ຣັດເຊຍ ເຊິ່ງເປັນພັນທະມິດສຳຄັນທັງໃນດ້ານເສດຖະກິດ ແລະ ຍຸດທະສາດ.

ໂຊ ຮັນບອມ ນັກວິໄຈອາວຸໂສຈາກສະຖາບັນເກົາຫຼີເພື່ອການລວມຊາດ ໃນກຸງໂຊລ ປະເທດເກົາຫຼີໃຕ້ ລະບຸວ່າ ສາຍພົວພັນລະຫວ່າງຈີນກັບເກົາຫຼີເໜືອມີທັງຄວາມຮ່ວມມື ແລະ ຄວາມລະແວງລະວັງຄຽງຄູ່ກັນໄປ. ພ້ອມທັງຊີ້ວ່າ ຖ້າການເປີດຂົວຖືກເລື່ອນອອກໄປອີກ ກໍອາດສ້າງຄວາມຕຶງຄຽດທີ່ທັງສອງຝ່າຍບໍ່ຕ້ອງການ.

ດ້ານກະຊວງການລວມຊາດຂອງເກົາຫຼີໃຕ້ລະບຸວ່າ ກຳລັງຕິດຕາມສະຖານະການການເປີດຂົວຢ່າງໃກ້ຊິດ. ຄວາມເຄື່ອນໄຫວຄັ້ງນີ້ອາດຊ່ວຍເພີ່ມການແລກປ່ຽນທາງເສດຖະກິດລະຫວ່າງຈີນກັບເກົາຫຼີເໜືອ ໃນຂະນະທີ່ເກົາຫຼີເໜືອກຳລັງພະຍາຍາມຂະຫຍາຍສາຍພົວພັນກັບຕ່າງປະເທດ ແລະ ຮັກສາຄວາມສົມດຸນລະຫວ່າງພັນທະມິດສຳຄັນທັງສອງປະເທດ.

ແຫຼ່ງຂ່າວ: Reuters / AFP