ສິງກະໂປເປີດບໍລິການໃຫ້ທະນາຄານກາງຕ່າງປະເທດນຳຄຳສຳຮອງມາຝາກເກັບຮັກສາ ໂດຍສາມາດຮອງຮັບໄດ້ສູງສຸດ 500 ໂຕນ.

AD

AD

AD

ສິງກະໂປເປີດບໍລິການຄັງຮັບຝາກຄຳລະດັບຄວາມປອດໄພສູງ ຮອງຮັບຄຳສຳຮອງສູງສຸດ 500 ໂຕນ ພ້ອມກຽມຍົກເວັ້ນ GST ດຶງດູດການຄ້າຄຳຈາກທົ່ວໂລກ

ທະນາຄານກາງສິງກະໂປ (MAS) ປະກາດເປີດບໍລິການຄັງເກັບຮັກສາຄຳລະດັບຄວາມປອດໄພສູງ ໂດຍສາມາດຮອງຮັບຄຳສຳຮອງໄດ້ສູງສຸດ 500 ໂຕນ ສຳລັບທະນາຄານກາງ ແລະ ສະຖາບັນການເງິນສາກົນ ພ້ອມກຽມຍົກເວັ້ນພາສີສິນຄ້າ ແລະ ບໍລິການ (GST) ສຳລັບທຸລະກຳຊື້ຂາຍຄຳລະດັບສະຖາບັນ ເພື່ອຮອງຮັບຄວາມຕ້ອງການຄຳທີ່ເພີ່ມຂຶ້ນທ່າມກາງຄວາມບໍ່ແນ່ນອນຂອງເສດຖະກິດໂລກ ແລະ ຜັກດັນໃຫ້ສິງກະໂປກາຍເປັນສູນກາງການຄ້າ ແລະ ການສົ່ງມອບຄຳແຫ່ງໃໝ່ຂອງພາກພື້ນ.

ສິງກະໂປເປີດບໍລິການຮັບຝາກຄຳສຳຮອງ

ທະນາຄານກາງສິງກະໂປ ຫຼື MAS ຮ່ວມກັບກະຊວງການເງິນສິງກະໂປ ປະກາດເປີດຕົວບໍລິການຮັບຝາກຄຳສຳລັບທະນາຄານກາງ (Gold Vaulting Service) ຢ່າງເປັນທາງການໃນວັນທີ 10 ພະຈິກ 2026 ເພື່ອເປີດໂອກາດໃຫ້ທະນາຄານກາງຂອງຕ່າງປະເທດ, ສະຖາບັນການເງິນສາກົນ ແລະ ກອງທຶນຄັ່ງແຫ່ງຊາດ ນຳເອົາຄຳສຳຮອງມາຈັດເກັບໄວ້ໃນສິງກະໂປຢ່າງປອດໄພ.

ທ່ານ ການ ຄິມ ຢອງ ຮອງນາຍົກລັດຖະມົນຕີສິງກະໂປ ກ່າວວ່າ ມີທະນາຄານກາງຈາກຕ່າງປະເທດບາງແຫ່ງ ໄດ້ສະແດງຄວາມສົນໃຈແລ້ວ ໃນການໃຊ້ບໍລິການຮັບຝາກຄຳຂອງທະນາຄານກາງສິງກະໂປ.

ພາບ: ທ່ານ ການ ຄິມ ຢອງ — ST PHOTO: GIN TAY

ທ່ານ ການ ຄິມ ຢອງ (Gan Kim Yong) ຮອງນາຍົກລັດຖະມົນຕີ ແລະ ປະທານ MAS ເປີດເຜີຍວ່າ ບໍລິການຈັດເກັບຄຳດັ່ງກ່າວຕັ້ງຢູ່ພາຍໃນຄັງເກັບທະນະບັດແຫ່ງຊາດຂອງສິງກະໂປ ໂດຍມີຄວາມສາມາດຮອງຮັບ ແລະ ຈັດເກັບຄຳໄດ້ສູງສຸດ 500 ໂຕນໃນປັດຈຸບັນ ແລະ ພ້ອມຂະຫຍາຍພື້ນທີ່ເພີ່ມເຕີມໃນອະນາຄົດ ຕາມຄວາມຕ້ອງການທີ່ເພີ່ມຂຶ້ນ.

ບໍລິການຂອງພາກລັດຄັ້ງນີ້ ຈະເຂົ້າມາເສີມຄວາມແຂງແກ່ງໃຫ້ກັບຄັງເກັບຄຳຂອງພາກເອກະຊົນໃນສິງກະໂປ ເຊິ່ງມີຄວາມຈຸລວມກັນຫຼາຍກວ່າ 2,000 ໂຕນ.

ກຽມຍົກເວັ້ນພາສີ GST ເພື່ອດຶງດູດການຄ້າຄຳລະດັບໂລກ

ເພື່ອສົ່ງເສີມໃຫ້ສິງກະໂປກາຍເປັນສູນກາງການຄ້າຄຳລະດັບໂລກ MAS ແລະ ກະຊວງການເງິນ ກຽມສະເໜີປັບປຸງກອບໂຄງສ້າງພາສີສິນຄ້າ ແລະ ບໍລິການ (GST) ໃໝ່ ໂດຍຈະຍົກເວັ້ນພາສີສຳລັບບໍລິການຄ້າສົ່ງທີ່ກ່ຽວຂ້ອງກັບຄຳເພື່ອການລົງທຶນ ລະຫວ່າງຜູ້ປະກອບການລະດັບສະຖາບັນ ເຊັ່ນ:

• ບໍລິການຮັບຝາກ ແລະ ຈັດເກັບຄຳ
• ການນຳຄຳກັບມາຣີໄຊເຄິນ ແລະ ຫຼອມຄຳ
• ການກວດສອບຄວາມບໍລິສຸດຂອງຄຳ
• ບໍລິການນາຍໜ້າຊື້ຂາຍຄຳ

ທ່ານ ການ ລະບຸວ່າ ມາດຕະການດ້ານພາສີນີ້ສະທ້ອນໃຫ້ເຫັນວ່າ ຄຳທີ່ໝູນວຽນຢູ່ໃນລະບົບການຄ້າດັ່ງກ່າວ ເປັນການເຄື່ອນໄຫວລະຫວ່າງສະຖາບັນການເງິນ ບໍ່ແມ່ນເພື່ອການບໍລິໂພກພາຍໃນປະເທດ.

ຄາດວ່າມາດຕະການນີ້ຈະເລີ່ມມີຜົນບັງຄັບໃຊ້ຕັ້ງແຕ່ເດືອນເມສາ 2027 ເປັນຕົ້ນໄປ ໂດຍຈະມີການຊີ້ແຈງລາຍລະອຽດເພີ່ມເຕີມໃນການປະກາດງົບປະມານປະຈຳປີ 2027.

ຄວາມຕ້ອງການຄຳທົ່ວໂລກເພີ່ມສູງ ທ່າມກາງຄວາມບໍ່ແນ່ນອນ

ທ່ານ ການ ເນັ້ນວ່າ ທ່າມກາງສະຖານະການພາຍນອກ ແລະ ຄວາມຂັດແຍ່ງທາງພູມລັດສາດທີ່ມີຄວາມບໍ່ແນ່ນອນເພີ່ມຂຶ້ນ ຄວາມຕ້ອງການຄຳໃນຖານະສິນຊັບປອດໄພຈາກນັກລົງທຶນ ແລະ ທະນາຄານກາງທົ່ວໂລກ ກໍເພີ່ມສູງຂຶ້ນຢ່າງຕໍ່ເນື່ອງ ເພື່ອໃຊ້ໃນການກະຈາຍຄວາມສ່ຽງ.

ການເປີດບໍລິການຄັງຮັບຝາກຄຳຂອງສິງກະໂປ ບໍ່ໄດ້ມີເປົ້າໝາຍເພື່ອແຂ່ງຂັນ ຫຼື ເຂົ້າມາແທນທີ່ສູນກາງການຄ້າຄຳເດີມ ເຊັ່ນ ລອນດອນ, ນິວຢອກ ຫຼື ຮ່ອງກົງ ແຕ່ເປັນການສະເໜີທາງເລືອກໃໝ່ທີ່ມີຄວາມປອດໄພ ແລະ ມີສະຖຽນລະພາບສູງໃຫ້ແກ່ທະນາຄານກາງຕ່າງໆ.

ຂໍ້ມູນຈາກບົດລາຍງານວິໄຈຂອງທະນາຄານ DBS ລະບຸວ່າ ທະນາຄານກາງ 1 ໃນ 4 ແຫ່ງທົ່ວໂລກ ກຳລັງປະເມີນສູນກາງການເງິນໃນອາຊີ ເພື່ອໃຊ້ເປັນສະຖານທີ່ຈັດເກັບຄຳສຳຮອງຢ່າງເປັນທາງການ.

ຂະນະທີ່ຄວາມຕ້ອງການຄຳທົ່ວໂລກໃນປີ 2025 ສູງເກີນ 5,000 ໂຕນ ຄິດເປັນມູນຄ່າສູງເປັນປະຫວັດການ 555 ຕື້ໂດລາສະຫະລັດ ໂດຍພາກພື້ນອາຊີມີສັດສ່ວນຄວາມຕ້ອງການຄຳແທ່ງ ແລະ ຫຼຽນຄຳຫຼາຍກວ່າເຄິ່ງໜຶ່ງຂອງທົ່ວໂລກ.

ຮ່ວມມືກັບ 6 ທະນາຄານ ພັດທະນາລະບົບຊື້ຂາຍ ແລະ ສົ່ງມອບຄຳ

ນອກຈາກການເປີດຄັງຮັບຝາກຄຳແລ້ວ MAS ຍັງຮ່ວມມືກັບຕະຫຼາດຫຼັກຊັບສິງກະໂປ (SGX) ແລະ 6 ທະນາຄານພານິດຊັ້ນນຳ ປະກອບມີ:

• DBS
• Deutsche Bank
• ICBC Standard Bank
• JPMorgan
• OCBC
• UOB

ທັງໝົດກຳລັງເລັ່ງກະກຽມລະບົບຫັກບັນຊີ ແລະ ຊຳລະລາຄາສຳລັບທຸລະກຳຊື້ຂາຍຄຳນອກຕະຫຼາດ (OTC) ທັງຄຳແທ່ງມາດຕະຖານລອນດອນ ຂະໜາດ 400 ຕຣອຍອອນຊ໌ ແລະ ຄຳແທ່ງຂະໜາດ 1 ກິໂລກຣາມ ໃຫ້ສຳເລັດພາຍໃນທ້າຍປີ 2026.

ຄາດວ່າຈະເປີດໃຫ້ບໍລິການສົ່ງມອບ ແລະ ຊື້ຂາຍຈິງໃນໄຕມາດທີ 1 ຂອງປີ 2027.

ນອກຈາກນີ້ SGX ຍັງມີແຜນເປີດຕົວສັນຍາຊື້ຂາຍຄຳລ່ວງໜ້າແບບສົ່ງມອບຄຳຈິງ ໃນໄຕມາດທີ 2 ຂອງປີ 2027.

ຄວາມເຄື່ອນໄຫວທັງໝົດນີ້ ຈະຊ່ວຍເຊື່ອມໂຍງລະບົບການຈັດເກັບ, ການຊື້ຂາຍ ແລະ ການຊຳລະລາຄາຄຳເຂົ້າດ້ວຍກັນ ເພີ່ມສະພາບຄ່ອງໃຫ້ກັບຕະຫຼາດໃນຊ່ວງເວລາທຳການຂອງອາຊີ ພ້ອມດຶງດູດການຈ້າງງານທີ່ມີມູນຄ່າສູງໃນຂະແໜງການເງິນ ແລະ ການບໍລິຫານຄວາມສ່ຽງເຂົ້າສູ່ສິງກະໂປໃນໄລຍະຍາວ.

ທີ່ມາຂ່າວສານ: CNA / The Straits Times