ຢຶດ ແລະ ທຳລາຍຊີ້ນໝູ ລັກລອບນຳເຂົ້າ ລວມນໍ້າຫນັກ 685 ກິໂລກຣາມ

ໃນວັນທີ 23 ກັນຍາ 2026 ເຈົ້າໜ້າທີ່ສັດຕະວະແພດ, ພາສີ ແລະ ເຈົ້າຫນ້າທີ່ຕຳ ຫຼວດກວດຄົນເຂົ້າ-ອອກເມືອງ ປະຈໍາດ່ານສາກົນຂົວມິດຕະພາບ 1 ໄດ້ລົງປະຕິບັດຫນ້າທີ່ ຕາມແຈ້ງການຂອງຫ້ອງວ່າການ ສຳນັກງານນາຍົກລັດຖະມົນຕີ ສະບັບເລກທີ 1291/ຫສນຍ, ລົງວັນທີ 10 ກັນ ຍາ 2026 ກ່ຽວກັບ ມາດຕະການຄວບຄຸມ ການລະບາດຂອງພະຍາດອະຫິວາໝູອາຟຣິກາ ໃນຂອບເຂດທົ່ວປະເທດ, ພ້ອມທັງ ແຈ້ງການຂອງຫ້ອງວ່າການ ນະຄອນຫຼວງວຽງຈັນ ສະບັບເລກທີ 40/ຫວນວ, ລົງວັນທີ 11 ກັນຍາ 2026 ວ່າດ້ວຍການຄວບຄຸມການລະບາດ ຂອງພະຍາດອະຫິວາໝູອາຟຣິກາ ໃນຂອບເຂດນະຄອນຫຼວງວຽງຈັນ.

ຜ່ານການລົງກວດກາຕົວຈິງ ໄດ້ພົບເຫັນຜູ້ໂດຍສານ ລັກລອບນຳເຂົ້າຊີ້ນໝູ ແລະ ຜະລິດຕະພັນຈາກຊີ້ນໝູ ທີ່ຊື້ມາຈາກປະເທດເພື່ອນບ້ານ (ຝັ່ງປະເທດໄທ) ລວມນ້ຳໜັກທັງຫມົດ 685 ກິໂລກຣາມ.

ພາຍຫຼັງກວດພົບ, ເຈົ້າໜ້າທີ່ໄດ້ສຶກສາອົບຮົມຜູ້ລະເມີດ ແລະ ຢຶດຂອງກາງທັງໝົດ ເພື່ອນໍາໄປທຳລາຍຖິ້ມຕາມຫຼັກວິຊາການ ໃນວັນທີ 24 ກັນຍາ 2026 ຢູ່ດ່ານກັກກັນສັດດົງໂພສີ ໂດຍມີ ທ່ານ ຈິດຕະວົງ ອິນທະວົງ ຮອງຫົວໜ້າຂະແຫນງລ້ຽງສັດ ແລະ ການປະມົງ ພ້ອມດ້ວຍ ພາກສ່ວນກ່ຽວຂ້ອງເຂົ້າຮ່ວມ.