ທົ່ວປະເທດ ພົບຜູ້ຕິດເຊື້ອ HIV ທັງໝົດ 26,693 ຄົນ ຈາກການກວດ 1,8 ລ້ານກວ່າຄົນ ເສຍຊີວິດແລ້ວ 6,335 ຄົນ

ສູນຕ້ານເອດ ແລະ ພຕພ ລາຍງານວັນທີ 26 ກັນຍາ 2026 ວ່າ: ຈາກຂໍ້ມູນລາຍງານ ທົ່ວປະເທດ ນັບແຕ່ປີ 1990 ຫາ ເດືອນສິງຫາ 2026 ມີຜູ້ເຂົ້າຮັບການກວດເລືອດຫາເຊື້ອ HIV ສະສົມທັງໝົດ 1,835,988 ຄົນ ໃນນັ້ນ, ພົບຜູ້ຕິດເຊື້ອ HIV 26,693 ຄົນ (ຄິດເປັນປະມານ 1.45% ຂອງຜູ້ທີ່ເຂົ້າມາກວດ). ຂະນະດຽວກັນ ພົບວ່າມີຜູ້ພັດທະນາເປັນພະຍາດເອດສະສົມ 7,975 ຄົນ ແລະ ອັດຕາການເສຍຊີວິດທັງໝົດ 6,335 ຄົນ.

ຈາກສະຖິຕິດັ່ງກ່າວ, ສະທ້ອນໃຫ້ເຫັນເຖິງຄວາມສຳຄັນຂອງການສົ່ງເສີມການກວດເລືອດຊອກຫາການຕິດເຊື້ອ ແລະ ການເຂົ້າເຖິງຢາຢັບຢັ້ງເຊື້ອ HIV (ART) ໃຫ້ໄວ ເພື່ອຫລຸດຜ່ອນອັດຕາການພັດທະນາໄປເປັນພະຍາດເອດ ແລະ ຫລຸດຜ່ອນອັດຕາການເສຍຊີວິດ.

ປະຈຸບັນ, ຍັງເຫັນວ່າຜູ້ທີ່ເຂົ້າມາຮັບການກວດເລືອດສ່ວນຫລາຍແມ່ນມີອາການ ຫລື ເຂົ້າສູ່ໄລຍະທີ່ພະຍາດດຳເນີນໄປແລ້ວ ຈຶ່ງເຂົ້າມາກວດ ຊຶ່ງມັນເຮັດໃຫ້ການປິ່ນປົວໃຊ້ເວລາດົນ ຖ້າກໍລະນີເປັນຮ້າຍແຮງກໍ່ບໍ່ສາມາດຊ່ວຍທັນເວລາໄດ້.

ທີ່ມາ: ສູນຕ້ານເອດ ແລະ ພຕພ