ເມືອງສີໂຄດຕະບອງ ເຂັ້ມງວດ ລົງກວາດລ້າງ ແລະ ເກັບມ້ຽນລົດຈັກໄຟຟ້າຈອດຊະຊາຍ ກີດຂວາງທາງ

ອີງຕາມທິດຊີ້ນ້ຳຂອງນະຄອນຫຼວງວຽງຈັນ ກ່ຽວກັບການເກັບມ້ຽນລົດຈັກໄຟຟ້າ ທີ່ບໍ່ມີການອະນຸຍາດຈາກພາກສ່ວນກ່ຽວຂ້ອງ.

ໃນລະຫວ່າງວັນທີ 28-29 ກັນຍາ 2026 ຄະນະຈັດສັນຄວາມບໍ່ເປັນລະບຽບຮຽບຮ້ອຍຂອງເມືອງສີໂຄດຕະບອງ ໄດ້ລົງເກັບມ້ຽນປະເພດລົດຈັກໄຟຟ້າ ທີ່ຈອດຊະຊາຍຢັງຢາຍຢູ່ຕາມແຄມທາງຫລັກພາຍໃນເມືອງ, ເຮັດໃຫ້ກີດຂວາງການສັນຈອນການໄປມາຂອງການໃຊ້ລົດ ແລະ ທາງຄົນຍ່າງ. ສະນັ້ນ ເພື່ອເປັນການປະຕິບັດຕາມດຳລັດສະບັບເລກທີ 568/ລບ,ລົງວັນທີ 16 ກັນຍາ 2021 ຂອງລັດຖະບານ ວ່າດ້ວຍການປັບໄຫມ ແລະ ມາດຕະການອື່ນໆຕໍ່ຜູ້ລະເມີດການຈໍລະຈອນທາງບົກ, ຂໍ້ຕົກລົງສະບັບ 1184/ຈນວ, ລົງວັນທີ 20 ພະຈິກ 2017 ວ່າດ້ວຍການຈັດສັນຄວາມບໍ່ເປັນລະຽບຮຽບຮ້ອຍຢູ່ໃນຕົວເມືອງ ແລະ ຊານເມືອງຂອງນະຄອນຫລວງວຽງຈັນ. ດັ່ງນັ້ນ ທາງຄະນະຮັບຜິດຊອບຈັດສັນຄວາມບໍ່ເປັນລະບຽບຮຽບຮ້ອຍຂອງເມືອງສີໂຄດຕະບອງ ຈຶ່ງໄດ້ໄປເກັບເອົາລົດໄຟຟ້າດັ່ງກ່າວ ມີຢູ່ຈຳນວນ 150 ຄັນ ມາຮັກສາໄວ້ຢູ່ສຳນັກງານປົກຄອງເມືອງ ເພື່ອໃຫ້ເຈົ້າຂອງຜູ້ປະກອບການ ໄປປະກອບເອກະສານຂໍອະນຸຍາດຈາກຂັ້ນເທິງ ກໍ່ຄືພາກສ່ວນກ່ຽວຂ້ອງໃຫ້ຖືກຕ້ອງຕາມລະບຽບກົດຫມາຍ.

ທີ່ມາ:ວຽງຈັນໃໝ່