ຊ່ວຍຊີວິດລະທຶກ ຊາຍພັດຕົກອຸໂມງລະບາຍນ້ຳ ຫຼັງພາຍຸຖົ່ມລາສເວກັສ ກູ້ໄພຕ້ອງໂຮຍຕົວຊ່ວຍ

ເກີດເຫດລະທຶກຂຶ້ນໃນຂະນະທີ່ພາຍຸຝົນຖົ່ມລາສເວກັສ ເມື່ອຊາຍຄົນໜຶ່ງພັດຕົກຈາກຂົວລົງໄປໃນອຸໂມງລະບາຍນ້ຳ ເຈົ້າໜ້າທີ່ຕ້ອງໄດ້ໃຊ້ທິມກູ້ໄພທາງເຕັກນິກ ແລະ ລະບົບເຊືອກໂຮຍຕົວລົງໄປຊ່ວຍ ກ່ອນຈະນຳຕົວຂຶ້ນມາໄດ້ຢ່າງປອດໄພ.

ເຫດການລະທຶກຄັ້ງນີ້ ເກີດຂຶ້ນຢູ່ເມືອງລາສເວກັສ ລັດເນວາດາ ຂອງສະຫະລັດຯ ຫຼັງຈາກພາຍຸຝົນຟ້າຄະນອງ ແລະ ຝົນຕົກໜັກເມື່ອຄືນວັນຈັນທີ 28 ກັນຍາ ຜ່ານມາ ເຮັດໃຫ້ນ້ຳໄຫຼຊ່ຽວເຂົ້າສູ່ຊ່ອງທາງ ແລະ ອຸໂມງລະບາຍນ້ຳຫຼາຍຈຸດ.

ໂດຍໃນເວລາປະມານ 22:04 ໂມງ ຕາມເວລາທ້ອງຖິ່ນ ໜ່ວຍດັບເພີງເທດສະມົນທົນຄລາກ (Clark County Fire Department) ໄດ້ຮັບແຈ້ງວ່າ ມີຊາຍຄົນໜຶ່ງພັດຕົກຈາກຂົວລົງໄປໃນອຸໂມງລະບາຍນ້ຳ ບໍລິເວນໃກ້ກັບຖະໜົນທເວນ (Twain Avenue) ແລະ ຖະໜົນອິສເທີນ (Eastern Avenue).

ເມື່ອເຈົ້າໜ້າທີ່ໄປຮອດ ກໍພົບຊາຍຄົນດັ່ງກ່າວຢືນຢູ່ທ່າມກາງກະແສນ້ຳທີ່ໄຫຼຊ່ຽວ ທິມກູ້ໄພພະຍາຍາມເຂົ້າເຖິງຕົວ ແຕ່ບໍ່ສາມາດເຂົ້າໃກ້ໄດ້ ເນື່ອງຈາກອຸໂມງຢູ່ຫ່າງຈາກຈຸດທີ່ເຈົ້າໜ້າທີ່ຢູ່ ແລະ ກະແສນ້ຳໄຫຼແຮງຫຼາຍ.

ໃນທ້າຍທີ່ສຸດ ເຈົ້າໜ້າທີ່ທິມກູ້ໄພທາງເຕັກນິກຕ້ອງໄດ້ເຂົ້າມາສະໜັບສະໜູນ ພ້ອມທັງຕິດຕັ້ງລະບົບເຊືອກສຳລັບໂຮຍຕົວຈາກຈຸດສູງ ກ່ອນຈະສົ່ງເຈົ້າໜ້າທີ່ກູ້ໄພໂຮຍຕົວລົງໄປຫາຊາຍຄົນດັ່ງກ່າວ ຈາກນັ້ນໄດ້ລັອກຕົວລາວໄວ້ກັບລະບົບເຊືອກ ແລະ ຊ່ວຍກັນດຶງທັງສອງຄົນຂຶ້ນມາຈາກອຸໂມງໄດ້ຢ່າງປອດໄພ.

ຊາຍຄົນດັ່ງກ່າວໄດ້ຮັບການປະເມີນອາການຢູ່ຈຸດເກີດເຫດ ກ່ອນຈະໄດ້ຮັບອະນຸຍາດໃຫ້ກັບບ້ານໄດ້ ໂດຍບໍ່ມີລາຍງານຜູ້ໄດ້ຮັບບາດເຈັບເພີ່ມເຕີມ.

ຊ່ວງທ້າຍເດືອນກັນຍາ ພື້ນທີ່ຮ່ອມພູລາສເວກັສ (Las Vegas Valley) ຕ້ອງຜະເຊີນກັບພາຍຸຝົນຕົກໜັກ, ຟ້າຜ່າ ແລະ ຄວາມສ່ຽງທີ່ຈະເກີດນ້ຳຖ້ວມຊັບພະລັນ ໂດຍສະໜາມບິນນານາຊາດແຮຣີ ລີດ (Harry Reid International Airport) ວັດປະລິມານຝົນໄດ້ 0.23 ນິ້ວ ຫຼື ປະມານ 5.8 ມິນລິແມັດ ຖືວ່າເປັນມື້ທີ່ມີຝົນຕົກຫຼາຍທີ່ສຸດນັບຕັ້ງແຕ່ເດືອນກຸມພາເປັນຕົ້ນມາ.

ພື້ນທີ່ທີ່ໄດ້ຮັບຜົນກະທົບໜັກ ໄດ້ແກ່ ຊຳເມີລິນ (Summerlin), ເຣດຣັອກແຄນຍອນ (Red Rock Canyon) ລວມເຖິງພື້ນທີ່ທາງຕາເວັນຕົກ ແລະ ຕາເວັນຕົກສ່ຽງໃຕ້ຂອງຮ່ອມພູ ໂດຍຝົນທີ່ຕົກໜັກເຮັດໃຫ້ນ້ຳຖ້ວມຊັບພະລັນບົນຖະໜົນຫຼາຍສາຍ ເຮັດໃຫ້ການຈາລະຈອນຊັກຊ້າ ແລະ ມີນ້ຳຖ້ວມຂັງບໍລິເວນທາງແຍກສຳຄັນ ເຊັ່ນ: ຖະໜົນຊາຮາຣາ (Sahara Avenue) ແລະ ຖະໜົນດີເຄເຕີ (Decatur Boulevard) ລວມທັງເຮັດໃຫ້ຖ້ຽວບິນຂາອອກຢູ່ສະໜາມບິນຕ້ອງຫຼ້າຊ້າ.

ເຈົ້າໜ້າທີ່ເຕືອນວ່າ ກະແສນ້ຳທີ່ໄຫຼຊ່ຽວໃນຊ່ອງທາງລະບາຍນ້ຳຄອນກຣີດແມ່ນມີອັນຕະລາຍຫຼາຍ ແລະ ທີ່ຜ່ານມາ ເຈົ້າໜ້າທີ່ດັບເພີງຕ້ອງໄດ້ໃຊ້ທິມກູ້ໄພທາງເຕັກນິກເຂົ້າຊ່ວຍເຫຼືອຜູ້ທີ່ຕິດຢູ່ໃນອຸໂມງລະບາຍນ້ຳຈາກສະຖານະການນ້ຳຖ້ວມຊັບພະລັນຢູ່ເລື້ອຍໆ.