ເຈົ້າໜ້າທີ່ ປກສ ເມືອງເຟືອງ ມອບລົດທີ່ຖືກລັກ ຄືນໃຫ້ເຈົ້າຂອງເດີມ.

ໃນຕອນເຊົ້າ ວັນທີ 30 ກັນຍາ 2026 ນີ້ ເຈົ້າໜ້າທີ່ພະແນກຕໍາຫຼວດ ສືບສວນ-ສອບສວນ ປກສ ເມືອງເຟືອງ ແຂວງວຽງຈັນ ໄດ້ຈັດພິທີມອບ-ຮັບເຄຶ່ອງຂອງກາງປະເພດລົດຈັກ ຈຳນວນ 05 ຄັນທີ່ຖືກຄົນຮ້າຍລັກໄປ ແລະເຈົ້າໜ້າທີ່ ສາມາດຕິດຕາມເກັບກູ້ຄືນມາ ຄືນໃຫ້ເຈົ້າຂອງເດີມ.

ທ່ານ ພັຕ ສົມພົດ ພົງສະໄໝ ຫົວໜ້າໜ່ວຍງານ ສຶບສວນ-ສອບສວນ ໃຫ້ຮູ້ວ່າ: ສຳລັບລົດຈັກຈຳນວນ 05 ຄັນ ທີ່ໄດ້ນຳມາມອບໃນຄັ້ງນີ້ແມ່ນ: ນັບຕັ້ງແຕ່ ເດືອນ ກໍລະກົດ-ສິງຫາ 2026 ຜ່ານມາ ທາງເຈົ້າໜ້າທີ່ ວິຊາສະເພາະ ໄດ້ລົງຕິດຕາມກຸ່ມຄົນຮ້າຍທີ່ລັກຊັບຢູ່ພາຍໃນເມືອງເຟືອງ ແລະສາມາດເກັບກູ້ລົດຈຳນວນດັ່ງກ່າວມາໄດ້. ສະນັ້ນໃນໂອກາດນີ້ ທ່ານ ພັທ ບຸນພຽງ ແກ້ວມະນີວົງ ຄະນະພັກຮາກຖານຮັກສາການພະແນກຕຳຫຼວດ ປກສ ເມືອງເຟືອງ ໄດ້ໃຫ້ກຽດມອບເຄື່ອງຂອງກາງປະເພດລົດຄືນໃຫ້ເຈົ້າຂອງເດີມ ໂດຍມີເຈົ້າໜ້າທີ່ ຕຳຫຼວດ ແລະເຈົ້າຂອງງລົດ ໄດ້ພ້ອມກັນເຂົ້າຮ່ວມ, ພ້ອມທັງກ່າວແນະນຳ ໃຫ້ ປະຊາຊົນເພິ່ມຄວາມ ຮອບຄອບໃນການຮັກສາຊັບສິນຕ່າງໆຂອງຕົນ ແລະຖ້າພົບເຫັນພຶດຕິກຳ ຕ້ອງສົງໃສຂອງກຸ່ມຄົນບໍ່ດີ ຕ້ອງແຈ້ງໃຫ້ເຈົ້າໜ້າທີ່ຮັບຮູ້ ເພຶ່ອລົງຕິດຕາມກວດກາໃຫ້ທັນເວລາ.

ຂ່າວ: ໂຄສະນາ ເມືອງເຟືອງ