ຄະນະສະເພາະກິດ ກະຊວງ ປກສ ມອບຕົວຜູ້ຖືກຫາຄົນໄທ 25 ຄົນ ທີ່ກໍ່ອາຊະຍາກໍາທາງອິນເຕີເນັດ ແລະ ການພະນັນອອນລາຍ ໃຫ້ເຈົ້າໜ້າທີ່ຕໍາຫຼວດໄທ

ໃນວັນທີ 30 ກັນຍາ 2026 ທີ່ຂົວມິດຕະພາບ ລາວ-ໄທ ແຫ່ງທີ 1 ນະຄອນຫຼວງວຽງຈັນ-ໜອງຄາຍ, ຄະນະສະເພາະກິດ ກະຊວງປ້ອງກັນຄວາມສະຫງົບ ລາວ ໄດ້ມອບຜູ້ຖືກຫາຄົນສັນຊາດໄທ ທີ່ກໍ່ອາຊະຍາກຳທາງດ້ານອິນເຕີເນັດ ແລະ ການພະນັນອອນລາຍ ຈໍານວນ 25 ຄົນ, ຍິງ 11 ຄົນ ໃຫ້ເຈົ້າໜ້າທີ່ຕໍາຫຼວດໄທ ສືບຕໍ່ດໍາເນີນຄະດີຕາມລະບຽບກົດໝາຍ ເຊິ່ງຜູ້ຖືກຫາຈໍານວນດັ່ງກ່າວ ແມ່ນຖືກເຈົ້າໜ້າທີ່ສະເພາະກິດ ກະຊວງປ້ອງກັນຄວາມສະຫງົບ ກັກຕົວໄດ້ໃນລະຫວ່າງການເຂົ້າກວາດລ້າງກຸ່ມແກ້ງກໍ່ອາຊະຍາກຳທາງອິນເຕີເນັດ ແລະ ການພະນັນອອນລາຍ ຢູ່ ໂຮງແຮມ ອິດສທີນ (Eastin), ໂຮງແຮມ ອິນທັດ (Inthad), ໂຮງແຮມ ມິນຕາ (Minta), ໂຮງແຮມ ລາແຊນ (La Sen) ໃນວັນທີ 16 ເດືອນກັນຍາ 2026 ທີ່ຜ່ານມາ

ຕາງໜ້າເຈົ້າໜ້າທີ່ຝ່າຍລາວ ເຊັນບົດບັນທຶກມອບໂດຍ ພັຕ ສາຍຄໍາ ສົມສີ ຄະນະດ່ານຕໍາຫຼວດກວດຄົນເຂົ້າ-ອອກເມືອງດ່ານສາກົນຂົວມິດຕະພາບລາວ-ໄທແຫ່ງທີ 1 ແລະ ເຈົ້າໜ້າທີ່ຝ່າຍໄທ ເຊັນຮັບໂດຍ ພັທ ທິຍາຊະພັດ ຣັງສິພຣາມະນາກຸນ ຮອງຜູ້ກຳກັບການກວດຄົນເຂົ້າ-ອອກເມືອງ ແຂວງໜອງຄາຍ ພ້ອມດ້ວຍພາກສ່ວນທີ່ກ່ຽວຂ້ອງທັງສອງຝ່າຍເຂົ້າຮ່ວມ.

ເຊິ່ງການມອບຕົວຜູ້ຖືກຫາຄົນສັນຊາດໄທ ຈໍານວນ 25 ຄົນໃນຄັ້ງນີ້, ແມ່ນອີງຕາມກົດໝາຍ ວ່າດ້ວຍການເຂົ້າ-ອອກເມືອງ ແລະ ຄຸ້ມຄອງຄົນຕ່າງປະເທດ ແຫ່ງ ສປປ ລາວ ສະບັບ ເລກທີ: 59/ສພຊ, ລົງວັນທີ: 26 ທັນວາ 2014 ແລະ ອີງຕາມການຕົກລົງເຫັນດີ ຂອງທາງການ ສປປ ລາວແລະ ທາງການ ຣາຊະອານາຈັກໄທ.

(ຂ່າວ-ພາບ: ກົມສື່ມວນຊົນ ປກສ