8 ແຂວງພາກເໜືອ ຫາລືແກ້ໄຂບັນຫາການລັກລອບຕັດໄມ້ ອາຊະຍາກຳສັດປ່າຂ້າມຊາດ

ວັນທີ 1 ຕຸລາ 2026 ກົມກວດກາຊັບພະຍາກອນທຳມະຊາດ ແລະ ສິ່ງແວດລ້ອມ , ກະຊວງກະສິກຳ ແລະ ສິ່ງແວດລ້ອມ ຈັດກອງປະຊຸມປຶກສາຫາລືວຽກງານກວດກາຊັບພະຍາກອນທຳມະຊາດ ແລະ ສິ່ງແວດລ້ອມ ຮ່ວມກັບ ກອງກວດກາຊັບພະຍາກອນທໍາມະຊາດ ແລະ ສິ່ງແວດລ້ອມແຂວງ ອຸດົມໄຊ , ພະແນກກະສິກຳ ແລະ ສິ່ງແວດລ້ອມ 8 ແຂວງພາກເໜືອ ຢ່າງເປັນທາງການ. ໂດຍການເປັນປະທານຮ່ວມຂອງ ທ່ານ ໄຊນະຄອນ ອິນທະວົງ ຮອງລັດຖະມົນຕີ ກສ ແລະ ປອ ວົງສະຫວັນ ໄຊຍະວົງ ປະທານຄະນະກຳມະການປົກຄອງແຂວງອຸດົມໄຊ ແລະ ພາກສ່ວນກ່ຽວຂ້ອງ ຈາກ 8 ແຂວງພາກເໜືອ (ຜົ້ງສາລີ, ຫລວງນ້ຳທາ, ບໍ່ແກ້ວ, ອຸດົມໄຊ, ຫລວງພະບາງ, ໄຊຍະບູລີ, ຊຽງຂວາງ ແລະ ແຂວງວຽງຈັນ) ເຂົ້າຮ່ວມ.

ທ່ານ ບຸນເດດ ສຸດທະວິໄລ ຫົວໜ້າ ກກຊສ ລາຍງານໃຫ້ຮູ້ວ່າ: ບັນຫາການລັກລອບຕັດໄມ້ ແລະ ບຸກລຸກທີ່ດິນປ່າໄມ້ໃນ 3 ປະເພດປ່າ, ອາຊະຍາກຳສັດປ່າຂ້າມຊາດ ແລະ ການລັກລອບຄ້າຂາຍສັດປ່າຜິດກົດໝາຍໄດ້ມີການຫັນປ່ຽນໄປໃຊ້ລະບົບອອນລາຍ. ນອກຈາກນີ້, ຍັງມີບັນຫາຜົນກະທົບຕໍ່ສິ່ງແວດລ້ອມຈາກໂຄງການລົງທຶນຂຸດຄົ້ນແຮ່ທາດ ແລະ ອຸດສາຫະກຳຂະໜາດໃຫຍ່, ບັນຫາການເຊົ່າ-ສຳປະທານທີ່ດິນລັດ ແລະ ຜົນກະທົບອື່ນໆ.

ທ່ານ ໄຊນະຄອນ ອິນທະວົງ ຮອງລັດຖະມົນຕີ ໄດ້ເນັ້ນໜັກໃຫ້ທຸກພາກສ່ວນ ສຸມໃສ່ວຽກງານໂຄສະນາເຜີຍແຜ່ກົດໝາຍໃຫ້ກວ້າງຂວາງ ແລະ ເລິກເຊິ່ງ, ເພີ່ມທະວີການປະສານສົມທົບຢ່າງກົມກຽວລະຫວ່າງສູນກາງ ແລະ ທ້ອງຖິ່ນ ໂດຍຜ່ານເຄືອຂ່າຍ L-WEN ແລະ P-WEN, ພ້ອມທັງຮຽກຮ້ອງໃຫ້ມີການບັງຄັບໃຊ້ກົດໝາຍຢ່າງເຂັ້ມງວດ ແລະ ເດັດຂາດ.

ນອກນີ້ ຍັງໄດ້ລົງນາມເຊັນບົດບັນທຶກມອບ-ຮັບ ວຽກງານຈຸດສຸມ ແລະ ຄາດໝາຍສູ້ຊົນ ລະຫວ່າງ ກກຊສ ແລະ ພກສ 8 ແຂວງພາກເໜືອ. ການເຊັນບົດບັນທຶກດັ່ງກ່າວ ຖືເປັນບາດກ້າວສຳຄັນໃນການນຳພາຈັດຕັ້ງປະຕິບັດວຽກງານຕົວຈິງ ໃຫ້ມີຄວາມສັກສິດ ແລະ ເຂັ້ມງວດຂຶ້ນໃນໄລຍະ 3 ເດືອນທ້າຍປີ (ແຕ່ນີ້ຫາທ້າຍປີ 2026), ກ່ອນທີ່ຈະມີການປະເມີນຜົນຄືນຮ່ວມກັນ ໃນກອງປະຊຸມສະຫຼຸບປະຈຳປີ ທີ່ຈະຈັດຂຶ້ນໃນເດືອນມັງກອນ 2027 ທີ່ຈະມາເຖິງນີ້.