ໄຕ້ຫວັນກຽມຮັບມອບເຮືອບິນຂັບໄລ່ F-16V ລຳທຳອິດຈາກສະຫະລັດ
ໄຕ້ຫວັນກຽມຮັບມອບເຮືອບິນຂັບໄລ່ F-16V ຈຳນວນ 2 ລຳທຳອິດຈາກສະຫະລັດ ຕາມຂໍ້ຕົກລົງຈັດຊື້ທັງໝົດ 66 ລຳ ມູນຄ່າ 8,000 ລ້ານໂດລາສະຫະລັດ ຫຼັງຈາກການສົ່ງມອບລ່າຊ້າມາຫຼາຍເດືອນ ເພື່ອເພີ່ມສັກກະຍະພາບທາງທະຫານໃນການຮັບມື ແລະປ້ອງປາມການຄຸກຄາມຈາກຈີນ ທ່າມກາງຄວາມກັງວົນກ່ຽວກັບທ່າທີຂອງລັດຖະບານສະຫະລັດພາຍໃຕ້ການນຳຂອງ ໂດນັນ ທຣຳ.
ໄຕ້ຫວັນຈະຮັບມອບເຮືອບິນຂັບໄລ່ F-16V ຈຳນວນ 2 ລຳທຳອິດຈາກສະຫະລັດໃນມື້ນີ້ (2 ຕຸລາ) ຕາມຂໍ້ຕົກລົງຈັດຊື້ເຮືອບິນທັງໝົດ 66 ລຳຈາກບໍລິສັດ Lockheed Martin ມູນຄ່າ 8,000 ລ້ານໂດລາສະຫະລັດ ໂດຍສະຫະລັດອະນຸມັດການຂາຍໃນປີ 2019. ເຮືອບິນ 2 ລຳທຳອິດມີກຳນົດເດີນທາງເຖິງຖານທັບອາກາດໄຖຕົງ ທາງຕະເວັນອອກສຽງໃຕ້ຂອງໄຕ້ຫວັນ ຫຼັງຈາກລ່າຊ້າມາຫຼາຍເດືອນຈາກບັນຫາຫຼາຍດ້ານ ລວມເຖິງລະບົບຊອບແວ.
ລັດຖະມົນຕີກະຊວງການປ້ອງກັນໄຕ້ຫວັນ ເວີລິງຕັນ ກູ (Wellington Koo) ກ່າວວ່າ ຈະມີເຮືອບິນ F-16V ລຳອື່ນໆ ທະຍອຍສົ່ງມອບເພີ່ມເຕີມໃນໄວໆນີ້ ແລະຢືນຢັນວ່າ ພາຍໃນທ້າຍປີ ໄຕ້ຫວັນຈະບໍ່ໄດ້ມີພຽງ 2 ລຳທີ່ເດີນທາງມາຮອດ. ເຮືອບິນທັງໝົດຈະຊ່ວຍເພີ່ມຈຳນວນເຮືອບິນ F-16 ຂອງໄຕ້ຫວັນໃຫ້ມີຫຼາຍກວ່າ 200 ລຳ.
F-16V ເປັນເຮືອບິນຂັບໄລ່ຮຸ່ນປັບປຸງ ທີ່ຕິດຕັ້ງລະບົບອິເລັກໂຕຣນິກການບິນ, ອາວຸດ ແລະເຣດາທີ່ທັນສະໄໝຂຶ້ນ ເຮັດໃຫ້ສາມາດຮັບມືກັບໄພຄຸກຄາມທາງອາກາດໄດ້ດີຂຶ້ນ ລວມເຖິງເຮືອບິນຂັບໄລ່ລ່ອງໜອງ J-20 ຂອງຈີນ. ຂະນະດຽວກັນ ໄຕ້ຫວັນໄດ້ດຳເນີນໂຄງການປັບປຸງ F-16 ຮຸ່ນເກົ່າສຳເລັດໃນປີ 2023.
ການສົ່ງມອບເກີດຂຶ້ນໃນຊ່ວງທີ່ໄຕ້ຫວັນກຳລັງເຜີຍກັບແຮງກົດດັນທາງທະຫານຈາກຈີນ ເຊິ່ງອ້າງສິດເໜືອໄຕ້ຫວັນ ແລະຄັດຄ້ານການຂາຍອາວຸດຂອງສະຫະລັດໃຫ້ໄຕ້ຫວັນຢ່າງຕໍ່ເນື່ອງ. ຂະນະທີ່ໄຕ້ຫວັນລະບຸວ່າ ກອງທັບອາກາດຈຳເປັນຕ້ອງສົ່ງເຮືອບິນຂຶ້ນປະຕິບັດການເພື່ອຕິດຕາມເຮືອບິນທະຫານຈີນເກືອບທຸກມື້.
ສະຫະລັດເປັນຜູ້ສະໜັບສະໜູນດ້ານຄວາມປອດໄພ ແລະເປັນຜູ້ຈັດຫາອາວຸດລາຍໃຫຍ່ທີ່ສຸດຂອງໄຕ້ຫວັນ ເຖິງແມ່ນວ່າທັງສອງຝ່າຍບໍ່ມີຄວາມສຳພັນທາງການທູດຢ່າງເປັນທາງການ. ກົດໝາຍສະຫະລັດກຳນົດໃຫ້ສະຫະລັດຈັດຫາອຸປະກອນທີ່ຈຳເປັນສຳລັບການປ້ອງກັນຕົນເອງຂອງໄຕ້ຫວັນ.
ຂະນະດຽວກັນ ໄຕ້ຫວັນກຳລັງລໍຖ້າການອະນຸມັດຈາກລັດຖະບານປະທານາທິບໍດີ ໂດນັນ ທຣຳ ສຳລັບແພັກເກັດອາວຸດຊຸດໃໝ່ ມູນຄ່າປະມານ 14,000 ລ້ານໂດລາສະຫະລັດ. ທຣຳເຄີຍລະບຸໃນເດືອນພຶດສະພາວ່າ ໄດ້ຊະລໍການພິຈາລະນາຂໍ້ຕົກລົງນີ້ໄວ້. ກ່ອນໜ້ານັ້ນ ສະຫະລັດໄດ້ອະນຸມັດແພັກເກັດອາວຸດມູນຄ່າ 11,000 ລ້ານໂດລາສະຫະລັດໃຫ້ໄຕ້ຫວັນໃນເດືອນທັນວາ 2025.
ຈີນຍັງຄົງຮຽກຮ້ອງໃຫ້ສະຫະລັດຢຸດການຂາຍອາວຸດໃຫ້ໄຕ້ຫວັນ ຂະນະທີ່ລັດຖະບານສະຫະລັດຢືນຢັນວ່າ ນະໂຍບາຍຕໍ່ໄຕ້ຫວັນຍັງບໍ່ມີການປ່ຽນແປງ.
ທີ່ມາຂ່າວ: Reuters / AFP
ຂ່າວທີ່ກ່ຽວຂ້ອງ
ອ່ານຫຼາຍທີ່ສຸດ
