ມອບ-ຮັບຜູ້ຖືກຫາສັນຊາດຫວຽດນາມ 30 ຄົນ ໃຫ້ທາງການຫວຽດນາມໄປດຳເນີນຄະດີຕາມກົດໝາຍ

ໃນວັນທີ 3 ຕຸລາ 2026, ເຈົ້າໜ້າທີ່ກອງບັນຊາການ ປກສ ແຂວງບໍ່ແກ້ວ ໄດ້ສົມທົບ ເຈົ້າໜ້າທີ່ປະຈຳດ່ານປາງຫົກ ແຂວງຜົ້ງສາລີ ໄດ້ມອບ-ຮັບຜູ້ຖືກຫາສັນຊາດຫວຽດນາມ ທີ່ກະທຳຜິດກົດໝາຍຂອງ ສປປ ລາວ ຢູ່ທີ່ດ່ານສາກົນເຕີຍຈາງ ແຂວງດຽນບຽນ ສສ ຫວຽດນາມ ເພື່ອນໍາສົງຕົວໄປດໍາເນີນຄະດີຕາມຂັ້ນຕອນກົດໝາຍ.

ຕາງໜ້າຝ່າຍເຈົ້າໜ້າທີ່ປ້ອງກັນຄວາມສະຫງົບ ແຂວງບໍ່ແກ້ວ ສປປ ລາວ ຮອ ອະໄພຈິດ ອິນທະວົງ ຫົວໜ້າໜ່ວຍງານກວດກາຄຸ້ມຄອງຄົນຕ່າງປະເທດ ຫ້ອງສັນຕິບານ ປກສ ແຂວງບໍ່ແກ້ວ, ຝ່າຍ ສສ ຫວຽດນາມ ຕາງໜ້າໂດຍ ຮອ ຫງວຽນວັນຮຽນ ຮອງຫົວໜ້າດ່ານສາກົນເຕີຍຈາງ ພ້ອມດ້ວຍຄະນະທັງສອງຝ່າຍ ເຂົ້າຮ່ວມ.

ຜູ້ຖືກຫາສັນຊາດຫວຽດນາມທີ່ຖືກສົ່ງຕົວໃນຄັ້ງນີ້ ມີຈຳນວນທັງໝົດ 30 ຄົນ ຍິງ 8 ຄົນ, ໃນຂໍ້ຫາສໍ້ໂກງຊັບທາງໂທລະຄົມ (ຄໍເຊັນເຕີ).

ການມອບ-ຮັບຜູ້ຖືກຫາ ແມ່ນໄດ້ປະຕິບັດຕາມທິດຊີ້ນຳຂອງຂັ້ນເທິງ ກໍຄື ການຮ່ວມມືລະຫວ່າງ ເຈົ້າໜ້າທີ່ປ້ອງກັນຄວາມສະຫງົບ ປກສ ແຂວງບໍ່ແກ້ວ ຂອງ ສປປ ລາວ ແລະ ສສ ຫວຽດນາມ ໃນການສະກັດກັ້ນ ແລະ ຕ້ານອາຊະຍາກຳຂ້າມຊາດ, ໂດຍສະເພາະແມ່ນບັນຫາການສໍ້ໂກງຊັບທາງໂທລະຄົມ ແລະ ການລັກລອບເຂົ້າເມືອງໂດຍບໍ່ຖືກຕ້ອງ ທີ່ສ້າງຄວາມບໍ່ສະຫງົບໃຫ້ແກ່ສັງຄົມ.

ທາງເຈົ້າໜ້າທີ່ວິຊາສະເພາະ ທັງສອງຝ່າຍ ລາວ-ຫວຽດນາມ ໄດ້ຮ່ວມກັນກວດກາຈຳນວນຄົນ, ເອກະສານທີ່ກ່ຽວຂ້ອງຖືກຕ້ອງແລ້ວ ພ້ອມກັນເຊັນບົດບັນທຶກມອບ-ຮັບ ຢ່າງເປັນທາງການ.