ເກີດເຫດໄຟໄໝ້ເຮືອ(ກຳປັ່ນ)ບັນທຸກນ້ຳມັນ Aframax Rio ຢູ່ນອກຊາຍຝັ່ງເມືອງໂຊຊີ ປະເທດຣັດເຊຍ

ກະຊວງຄົມມະນາຄົມຣັດເຊຍລະບຸໃນວັນທີ 6 ຕຸລາວ່າ ໜ່ວຍກູ້ໄພຣັດເຊຍໄດ້ເຂົ້າຊ່ວຍເຫຼືອລູກເຮືອ 23 ຄົນຂອງເຮືອບັນທຸກນ້ຳມັນ Aframax Rio ທີ່ຕິດທຸງຊາດໄລບີເລຍ ຫຼັງຈາກເຮືອລຳດັ່ງກ່າວຖືກໂຈມຕີໂດຍເຮືອໄຮ້ຄົນຂັບ ຈົນເກີດໄຟໄໝ້ ຢູ່ບໍລິເວນນອກຊາຍຝັ່ງທະເລດຳຂອງຣັດເຊຍ.

ກະຊວງຄົມມະນາຄົມຣັດເຊຍລະບຸໃນລາຍງານທີ່ເຜີຍແຜ່ຜ່ານ Telegram ວ່າ ລູກເຮືອທັງ 23 ຄົນເປັນຄົນອິນເດຍ ແລະບໍ່ມີຜູ້ໃດໄດ້ຮັບບາດເຈັບຈາກເຫດການ. ເຈົ້າໜ້າທີ່ດັບເພີງມີອຸປະກອນ ແລະ ກຳລັງພຽງພໍສຳລັບຄວບຄຸມໄຟ ຫຼັງຈາກຄວາມຮຸນແຮງຂອງແປວໄຟຫຼຸດລົງ.

ກ່ອນໜ້ານີ້ ເຈົ້າໜ້າທີ່ທ້ອງຖິ່ນໃນເຂດປົກຄອງ ຊີເຣຍສ (Sirius) ໄດ້ລາຍງານເຫດໄຟໄໝ້ເທິງເຮືອບັນທຸກນ້ຳມັນລຳດັ່ງກ່າວ ເຮັດໃຫ້ທາງການສັ່ງປິດຫາດຊາຍໃນພື້ນທີ່ ຊຶ່ງຕັ້ງຢູ່ໃນແຄວ້ນຄຣັສໂນດາ ທາງພາກໃຕ້ຂອງຣັດເຊຍ ບໍ່ໃຫ້ປະຊາຊົນເຂົ້າໃຊ້ບໍລິການ.