ທ່ານ ລິນຄຳ ດວງສະຫວັນ ລັດຖະມົນຕີ ກະຊວງກະສິກຳ ແລະ ສິ່ງແວດລ້ອມ ໄດ້ຊີ້ແຈງຕໍ່ບັນຫາການບຸກລຸກທີ່ດິນປ່າໄມ້

ໃນໄລຍະ 9 ເດືອນຕົ້ນປີ 2026 ນີ້, ການນໍາເຂົ້າສິນຄ້າກະສິກຳ ຂອງ ສປປ ລາວ ຫຼຸດລົງ 50% ຈາກ 80 ລ້ານໂດລາສະຫະລັດ ໃນປີຜ່ານມາ ເຫຼືອ 40 ລ້ານໂດລາສະຫະລັດ ເນື່ອງຈາກວ່າ ການຜະລິດກະສິກຳ ທີ່ມີການປຸງແຕ່ງ ສາມາດກຸ້ມກິນໄດ້ 100% ເປັນຕົ້ນ ເຂົ້າ, ກາເຟ, ຊາ, ປານໍ້າຈືດ, ຊີ້ນງົວ-ຄວາຍ, ໝູ, ສັດປີກ ແລະ ໄຂ່. ໃນຂະນະທີ່ ກະຊວງກະສິກຳ ແລະ ສິ່ງແວດລ້ອມ ກໍຄື ຂະແໜງການກ່ຽວຂ້ອງ ໄດ້ມີການອອກແຈ້ງການກ່ຽວກັບການເກືອດຫ້າມການນໍາເຂົ້າສິນຄ້າ ທີ່ສາມາດຜະລິດກຸ້ມກິນພາຍໃນ ຕາມດ່ານທ້ອງຖິ່ນ ແລະ ດ່ານປະເພນີ ໂດຍສະເພາະ ເຂົ້າ, ຊີ້ນ, ໄຂ່, ປາ ແລະ ພືດຜັກ ເຊິ່ງເຮັດໃຫ້ການນໍາເຂົ້າສິນຄ້າກະສິກຳ ຫຼຸດລົງຢ່າງກ້າວກະໂດດ.

ທ່ານ ລິນຄຳ ດວງສະຫວັນ ລັດຖະມົນຕີ ກະຊວງກະສິກຳ ແລະ ສິ່ງແວດລ້ອມ ໄດ້ຊີ້ແຈງຕໍ່ກອງປະຊຸມສະໄໝສາມັນ ເທື່ອທີ 2 ຂອງສະພາແຫ່ງຊາດ ຊຸດທີ X ໃນວັນທີ 7 ຕຸລາ 2026 ວ່າ: ການສົ່ງເສີມການຜະລິດ ເພື່ອຄໍ້າປະກັນສະບຽງອາຫານ, ທົດແທນການນໍາເຂົ້າ ແມ່ນສາມາດກຸ້ມກິນ ແລະ ມີສ່ວນແຮໄວ້. ສໍາລັບປີ 2026 ນີ້, ການຜະລິດເຂົ້າ ຈະສາມາດປະຕິບັດໄດ້ 95% ຂອງແຜນການ (3,9 ລ້ານໂຕນ) ແຕ່ກໍຍັງສາມາດຮັບປະກັນການບໍລິໂພກພາຍໃນຢ່າງພຽງພໍ. ສໍາລັບພືດຜັກ ແລະ ໝາກໄມ້ ກໍໄດ້ຍູ້ແຮງຂະບວນການຜະລິດພືດຜັກ, ໄມ້ໃຫ້ໝາກ ຂອງຊາວກະສິກອນ, ຜູ້ຜະລິດຂະໜາດນ້ອຍ-ກາງ ດ້ວຍການສ້າງ ແລະ ປັບປຸງກຸ່ມຜະລິດ, ປັດຈຸບັນ ປູກພືດສະບຽງໄດ້ 255.500 ກວ່າເຮັກຕາ ເທົ່າກັບ 91% ຂອງແຜນການ, ຄາດຄະເນຜົນຜະລິດປະມານ 2,3 ລ້ານກວ່າໂຕນ, ຄາດວ່າໝົດປີຈະປະຕິບັດໄດ້ຕາມແຜນການ. ສ່ວນການຜະລິດ ຊີ້ນ, ໄຂ່ ແລະ ປາ ກໍໄດ້ຊຸກຍູ້ການລ້ຽງສັດ ເປັນຟາມແບບທັນສະໄໝ ຫຼາຍຂຶ້ນເຮັດໃຫ້ຝຸງສັດຂະຫຍາຍຕົວ 1,4%. ເຖິງແມ່ນວ່າໃນໄລຍະຜ່ານມາ, ພົບການລະບາດຂອງພະຍາດອະຫິວາໜູ ເຊິ່ງເຮັດໃຫ້ການສະໜອງຊີ້ນໝູ ບໍ່ພຽງພໍກັບຄວາມຕ້ອງການໃນບາງເຂດ ໃນໄລຍະໃດໜຶ່ງ ໂດຍລວມແມ່ນສາມາດຜະລິດ ແລະ ສະໜອງ ຊີ້ນ, ປາ ແລະ ໄຂ່ ໄດ້ 440.000 ໂຕນ ຫຼື ທຽບເທົ່າ 76,6% ຂອງແຜນການ 574.300 ໂຕນ ຄາດວ່າໝົດປີ ຈະສາມາດບັນລຸຕາມແຜນການ ແລະ ສາມາດຄໍ້າປະກັນການບໍລິໂພກພາຍໃນໄດ້ໂດຍພື້ນຖານ. ໃນພາບລວມເຫັນວ່າ ການຜະລິດພາຍໃນ ມີການຂະຫຍາຍຕົວເພີ່ມຂຶ້ນ ສາມາດຮັບປະກັນສະໜອງການບໍລິໂພກພາຍໃນໄດ້ໂດຍພື້ນຖານ, ແຕ່ຍັງມີບາງລາຍການສະບຽງອາຫານ ທີ່ບໍ່ສາມາດຜະລິດຢູ່ພາຍໃນບາງແຂວງ ຈຶ່ງຕ້ອງໄດ້ດຸ່ນດຽງຈາກແຂວງໃກ້ຄຽງ ຫຼື ປະເທດໃກ້ຄຽງ ທີ່ມີການຂົນສົ່ງສະດວກ ແລະ ຕົ້ນທຶນຄ່າຂົນສົ່ງຕໍ່າ.

ການຜະລິດ ແລະ ສົ່ງອອກ ສິນຄ້າກະສິກຳ ແລະ ປ່າໄມ້ ໃນໄລຍະຜ່ານ ເຫັນວ່າມີທ່າອຽງເພີ່ມຂຶ້ນຕາມລໍາດັບ, ໃນ 9 ເດືອນ ປີ 2026 ສາມາດປະຕິບັດໄດ້ 1.389 ລ້ານໂດລາສະຫະລັດ ເທົ່າກັບ 73% ຂອງແຜນການ ທີ່ສະພາຮອງຮັບ 1.900 ລ້ານໂດລາສະຫະລັດ. ໃນນັ້ນ, ພືດ ແລະ ຜະລິດຕະພັນພືດ ມູນຄ່າ 1.002 ລ້ານກວ່າໂດລາສະຫະລັດ ເທົ່າກັບ 84% ຂອງແຜນການ (ແຜນການ 1.200 ລ້ານໂດລາສະຫະລັດ); ສັດ ແລະ ຜະລິດຕະພັນສັດ ມູນຄ່າ 148,2 ລ້ານກວ່າໂດລາສະຫະລັດ ເທົ່າກັບ 74% ຂອງແຜນການ (ແຜນການ 200 ລ້ານໂດລາສະຫະລັດ). ໃນນັ້ນ, ຜະລິດຕະພັນກວມເອົາ 7,9%; ໄມ້ ແລະ ຜະລິດຕະພັນໄມ້, ຢາງພາລາ, ເຄື່ອງປ່າຂອງດົງ, ຖ່ານຂາວ ມູນຄ່າ 238,9 ລ້ານກວ່າໂດລາສະຫະລັດ ເທົ່າກັບ 48% (ແຜນການ 500 ລ້ານໂດລາສະຫະລັດ). ສໍາລັບສິນຄ້າ ທີ່ໄດ້ເຈລະຈາເຕັກນິກເປີດຕະຫຼາດ ກັບປະເທດຄູ່ຄ້າ ໄດ້ທັງໝົດ 80 ລາຍການ. ໃນນັ້ນ, ສປ ຈີນ: ພືດ 39 ລາຍການ ແລະ ສັດ 5 ລາຍການ (ງົວ-ຄວາຍ, ລີງຫາງຍາວ, ລີງວອກ, ປາສະຫວາຍ ແລະ ນໍ້າເຜິ້ງ), ສສ ຫວຽດນາມ 19 ລາຍການພືດ, ໄທ 16 ລາຍການພືດ, ກຳປູເຈຍ ສັດໃຫຍ່ 1 ລາຍການ.

ເພື່ອຊຸກຍູ້ສົ່ງເສີມການຜະລິດ ແລະ ຍົກລະດັບເຕັກນິກການຜະລິດ, ຄວາມຮູ້ຄວາມສາມາດ ຂອງກະສິກອນ ເພື່ອຮັບປະກັນການເພີ່ມສະມັດຕະພາບ, ຄຸນນະພາບຂອງສິນຄ້າ ແລະ ການປຸງແຕ່ງຜະລິດຕະພັນກະສິກຳ ເປັນສິນຄ້າ ໃຫ້ມີຄວາມເຂັ້ມແຂງ ສາມາດແຂ່ງຂັນກັບຕະຫຼາດພາຍໃນ ແລະ ຕ່າງປະເທດໄດ້ ຂະແໜງການມີມາດຕະການ ຄື: ສຸມໃສ່ຖ່າຍທອດເຕັກນິກ, ເຕັກໂນໂລຊີ ແລະ ກົນຈັກກະສິກຳທີ່ທັນສະໄໝ ເຂົ້າໃນການປູກຝັງ-ລ້ຽງສັດ ແລະ ການປຸງແຕ່ງໄດ້ຮັບການສົ່ງເສີມຢ່າງກວ້າງຂວາງ (ປັດຈຸບັນ ມີການນຳໃຊ້ເຕັກນິກ ແລະ ກົນຈັກກະສິກຳເຂົ້າໃນການຜະລິດ ເຊັ່ນ: ກະກຽມດິນປູກເຂົ້ານາ 99%, ດຳນາ 3%, ຢອດເມັດ ແລະ ຫວ່ານເມັດຫຼາຍກວ່າ 45%, ເກັບກ່ຽວ ແລະ ຟາດເຂົ້າຫຼາຍກ່ວາ 50%); ສ້າງ ແລະ ພັດທະນາສູນສົ່ງເສີມ ແລະ ບໍລິການເຕັກນິກກະສິກຳ ໃຫ້ມີຄວາມເຂັ້ມແຂງ ເພື່ອເຮັດໜ້າທີ່ສົ່ງເສີມການຜະລິດໃຫ້ຊາວກະສິກໍາ, ກຸ່ມການຜະລິດ ແລະ ສະຫະກອນ ເປັນຕົ້ນ ສູນພັດທະນາກະສິກໍາໜອງແຫ້ວ ນະຄອນຫຼວງວຽງຈັນ ແລະ ສູນພັດທະນາກະສິກຳປາກແຈ້ງ ແຂວງວຽງຈັນ ເພື່ອເປັນສູນຕົວແບບໃນການສົ່ງເສີມການຫັນເປັນທັນສະໄໝ ແລະ ບັນດາສູນສົ່ງເສີມ ແລະ ບໍລິການເຕັກນິກ ໃນຂອບເຂດທົ່ວປະເທດ. ພ້ອມກັນນັ້ນ, ກໍປັບປຸງ ແລະ ພັດທະນາໂຄງລ່າງພື້ນຖານການຜະລິດ ແລະ ເຕັກນິກຫຼັງເກັບກ່ຽວ ເພື່ອຮັບປະກັນຄຸນນະພາບຜົນຜະລິດ; ປັບປຸງກຳລັງການຜະລິດ ເປັນຕົ້ນ ສ້າງ ແລະ ພັດທະນາກຸ່ມ, ສະຫະກອນ ໃຫ້ເຂັ້ມແຂງ ກາຍເປັນຫົວໜ່ວຍວິສາຫະກິດຮ່ວມມືປະຊາຊົນ ເພື່ອສ້າງຖານການຜະລິດ ຂອງຂະແໜງການໃຫ້ກວ້າງຂວາງ; ສົ່ງເສີມ, ອຳນວຍຄວາມສະດວກ ແລະ ສ້າງເງື່ອນໄຂ ໃຫ້ບັນດາຫົວໜ່ວຍທຸລະກິດ ແລະ ອຸດສາຫະກຳປຸງແຕ່ງ ໄດ້ມາລົງທຶນ ແລະ ນໍາເອົາເຕັກນິກທີ່ທັນສະໄໝ ເພື່ອຜະລິດສິນຄ້າກະສິກຳ ທີ່ມີຄຸນນະພາບ ເຮັດໜ້າທີ່ເປັນຕະຫຼາດພາຍໃນ ແລະ ຕ່າງປະເທດ ເພື່ອຮອງຮັບຜົນຜະລິດ ຈາກກຸ່ມ ແລະ ສະຫະກອນ ດ້ວຍຮູບການສັນຍາການຜະລິດກະສິກໍາ ຫຼື ຮູບການອື່ນທີ່ເໝາະສົມ.

ໂດຍ: ແສງເດືອນ