ຫລວງພະບາງ ປັບປຸງລາຄາປີ້ເຂົ້າຊົມສະຖານທີ່ທ່ອງທ່ຽວ ຢູ່ພາຍໃນແຂວງເລີ່ມແຕ່ ວັນທີ 15 ພະຈິກ 2026 ເປັນຕົ້ນໄປ
ແຫລ່ງຂ່າວຈາກ ແຂວງຫລວງພະບາງ ໃຫ້ຮູ້ວ່າ: ພະແນກວັດທະນະທຳ ແລະ ທ່ອງທ່ຽວ ແຂວງຫລວງພະບາງ ໄດ້ອອກໜັງສືແຈ້ງການ ໃນວັນທີ 13 ຕຸລາ 2026 ເຖິງບັນດາຜູ້ປະກອບການທຸລະກິດທ່ອງທ່ຽວ, ນັກທ່ອງທ່ຽວ ພາຍໃນ ແລະ ຕ່າງປະເທດ ກ່ຽວກັບແຈ້ງລາຄາ ປີ້ເຂົ້າຊົມ ສະຖານທີ່ທ່ອງທ່ຽວຕ່າງໆ ຢູ່ແຂວງຫລວງ, ເຊິ່ງຈະເລີ່ມຈັດຕັ້ງປະຕິບັດ ໃນວັນທີ 15 ພະຈິກ 2026 ທີ່ຈະມາເຖິງນີ້.
ອີງຕາມ ມະຕິ ວ່າດ້ວຍການຮັບຮອງເອົາການປັບປຸງ ຂຶ້ນລາຄາປີ້ເຂົ້າຊົມສະຖານທີ່ທ່ອງທ່ຽວ ຢູ່ແຂວງຫລວງພະບາງ ເລກທີ 152/ຄປຈ.ຫຼບ, ລົງວັນທີ 02 ຕຸລາ 2026; ອີງຕາມ ຂໍ້ຕົກລົງ ຂອງຄະນະກຳມະການປົກຄອງ ແຂວງຫລວງພະບາງ, ວ່າດ້ວຍການປັບປຸງຂຶ້ນລາຄາປີ້ເຂົ້າຊົມ ສະຖານທີ່ທ່ອງທ່ຽວ ຢູ່ແຂວງຫລວງພະບາງ, ເລກທີ 2011/ຄປຂ.ຫຼຸບ, ລົງວັນທີ 09 ຕຸລາ 2026; ອີງໃສ່ ການຄົ້ນຄວ້າເຫັນດີ ຂອງພະແນກ ວັດທະນະທຳ ແລະ ການທ່ອງທ່ຽວ ແຂວງຫລວງພະບາງ ແລະ ພະແນກການເງິນແຂວງ, ຄັ້ງວັນທີ 12 ຕຸລາ 2026.
ພະແນກ ວັດທະນະທຳ ແລະ ການທ່ອງທ່ຽວ ແຂວງຫລວງພະບາງ ຂໍແຈ້ງມາຍັງບັນດາທ່ານ ຜູ້ປະກອບ ການ ທຸລະກິດທ່ອງທ່ຽວ, ນັກທ່ອງທ່ຽວ ພາຍໃນ ແລະ ຕ່າງປະເທດ ຊາບວ່າ: ເລີ່ມແຕ່ ວັນທີ 15 ພະຈິກ 2026 ເປັນຕົ້ນໄປ ລາຄາປີ້ເຂົ້າຊົມ ບັນດາສະຖານທີ່ທ່ອງທ່ຽວຕ່າງໆ ໃຫ້ປະຕິບັດ ເປັນຕົ້ນ ສະຖານທີ່ທ່ອງທ່ຽວ
-ຫໍພິພິທະພັນແຫ່ງຊາດ ຫລວງພະບາງ: ຄົນຕ່າງປະເທດ 200.000 ກີບຕໍ່ປີ້, ຄົນລາວ 20.000 ກີບຕໍ່ປີ້.
– ສະຖານທີ່ທ່ອງທ່ຽວ ນໍ້າຕົກຕາດກວາງຊີ: ຄົນຕ່າງປະເທດ 100.000 ກີບຕໍ່ປີ້, ຄົນລາວ 20.000 ກີບຕໍ່ປີ້; ສະຖານທີ່ທ່ອງທ່ຽວ ພູສີ: ຄົນຕ່າງປະເທດ 60.000 ກີບຕໍ່ປີ້, ຄົນລາວ15.000 ກີບຕໍ່ປີ້.
– ສະຖານທີ່ທ່ອງທ່ຽວ ຖໍ້າຕິ່ງ: ຄົນຕ່າງປະເທດ 60.000 ກີບຕໍ່ປີ້, ຄົນລາວ 15.000 ກີບຕໍ່ປີ້; ສະຖານທີ່ທ່ອງທ່ຽວ ວັດວິຊຸນນະຣາດ: ຄົນຕ່າງປະເທດ 60.000 ກີບຕໍ່ປີ້.
-ສະຖານທີ່ທ່ອງທ່ຽວ ວັດຊຽງທອງ: ຄົນຕ່າງປະເທດ 60.000 ກີບຕໍ່ປີ້ (ສະຖານທີ່ທ່ອງທ່ຽວ ວັດຕ່າງໆ ສຳລັບຄົນລາວແມ່ນບໍ່ໄດ້ເສຍຄ່າ).
