ຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນປະເທດ ແຫ່ງ ສປປ ລາວ ເຄື່ອນໄຫວຢ້ຽມຢາມ ສສ ຫວຽດນາມ

ວັນທີ 12 ຕຸລາ 2026 ສະຫາຍ ພົນເອກ ຄຳລຽງ ອຸທະໄກສອນ ກຳມະການກົມການເມືອງສູນກາງພັກປະຊາຊົນປະຕິວັດລາວ, ຮອງນາຍົກລັດຖະມົນຕີ, ລັດຖະຕີກະຊວງປ້ອງກັນປະເທດ ແຫ່ງ ສປປ ລາວ ພ້ອມດ້ວຍນາຍທະຫານຂັ້ນສູງ ກອງທັບປະຊາຊົນລາວ ໄດ້ເຄື່ອນໄຫວຢ້ຽມຢາມ ສສ ຫວຽດນາມ ໃນລະຫວ່າງ ວັນທີ 12-15 ຕຸລາ 2026 ໂດຍການຕ້ອນຮັບ ຂອງສະຫາຍ ພົນເອກ ຟານ ວັນ ຢາງ ກຳມະການກົມການເມືອງສູນກາງພັກກອມມູນິດຫວຽດນາມ, ຮອງນາຍົກຖະມົນຕີ, ລັດຖະຕີກະຊວງປ້ອງກັນປະເທດ ແຫ່ງ ສສ ຫວຽດນາມ ພ້ອມດ້ວຍນາຍທະຫານຂັ້ນສູງ ກອງທັບປະຊາຊົນຫວຽດນາມ.

ພາຍຫລັງສໍາເລັດພິທີຕ້ອນຮັບຢ່າງເປັນທາງການ ໄດ້ພົບປະສອງຝ່າຍ ເຊິ່ງເປັນການທົບທວນ ແລະ ຕີລາຄາໝາກຜົນໃນການຮ່ວມມືຊ່ວຍເຫຼືອເຊິ່ງກັນ ແລະ ກັນ ໃນໄລຍະ 1 ປີຜ່ານມາ, ກອງທັບປະຊາຊົນລາວ ແລະ ຫວຽດນາມ ຍັງຄົງສືບຕໍ່ເພີ່ມທະວີໃນການຮັດແໜ້ນການຮ່ວມມືສອງຝ່າຍໃຫ້ກ້າວເຂົ້າສູ່ລວງເລິກ ແລະ ແຕກດອກອອກຜົນຢ່າງບໍ່ຢຸດຢັ້ງ. ສອງຝ່າຍໄດ້ຮ່ວມກັນຈັດຕັ້ງປະຕິບັດບັນດາເນື້ອໃນອະນຸສັນຍາ 5 ປີ ແລະ ແຜນການຮ່ວມມື ປະຈຳປີ 2026 ຢ່າງເຂັ້ມງວດ, ມີປະສິດທິຜົນ ແລະ ໄດ້ຮັບຜົນສຳເລັດຕາມຄາດໝາຍ ເຊິ່ງໄດ້ກາຍເປັນເສົາຄ້ຳຫຼັກອັນໜັກແໜ້ນໃຫ້ແກ່ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ, ການຮ່ວມມືຮອບດ້ານ ແລະ ຫຸ້ນສ່ວນຍຸດທະສາດ ຂອງສອງຊາດ, ທັງສອງຝ່າຍເຫັນດີເປັນເອກະພາບສືບຕໍ່ໃນການຮ່ວມມືຊ່ວຍເຫຼືອເຊິ່ງກັນ ແລະ ກັນ ໂດຍສະເພາະແມ່ນ ວຽກງານພັກ-ວຽກງານການເມືອງ, ໄດ້ມີການແລກປ່ຽນຂໍ້ມູນຂ່າວສານ ເຊິ່ງກັນ ແລະ ກັນ ຢ່າງເປັນປົກກະຕິ.

– ໃນຂົງເຂດວຽກງານປ້ອງກັນຊາດ, ແລກປ່ຽນຄະນະຜູ້ແທນ: ສອງກອງທັບໄດ້ຈັດຕັ້ງການຢ້ຽມຢາມ, ເຮັດວຽກ, ຖອດຖອນບົດຮຽນເຊິ່ງກັນ ແລະ ກັນ ແລະ ພົບປະຮ່ວມກັນຢ່າງເປັນປົກກະຕິ ນັບແຕ່ຂັ້ນສູງຮອດທ້ອງຖິ່ນ ຢ່າງມີປະສິດທິຜົນ ແລະ ສຳເລັດຕາມແຜນການ;