ປກສ ເມືອງວຽງໄຊ ສຶກສາອົບຮົມໄວໜຸ່ມ 21 ຄົນ ທີ່ຂີ່ລົດແຕ່ງ-ສ້າງສຽງດັງກວນເມືອງ
ຂ່າວ ປກສ ແຂວງຫົວພັນລາຍງານວ່າ: ວັນທີ 9 ຕຸລາ 2026 ເຈົ້າໜ້າທີ່ຕຳຫລວດຈະລາຈອນ ປກສ ເມືອງວຽງໄຊ ແຂວງຫົວພັນ ໄດ້ນໍາເອົາກຸ່ມໄວລຸ້ນ, ເຍົາວະຊົນ ທີ່ຂັບຂີ່ລົດດັດແປງສະພາບເຕັກນິກ (ລົດແຕ່ງ) ແລະ ສ້າງສຽງດັງລົບກວນສັງຄົມ ຈຳນວນ 21 ຄົນ ເຂົ້າມາສຶກສາອົບຮົມ ແລະ ກ່າວເຕືອນ ຢູ່ທີ່ກອງບັນຊາການ ປກສ ເມືອງ.
ເຈົ້າໜ້າທີ່ ປກສ ເມືອງວຽງໄຊ ໄດ້ຊີ້ແຈງໃຫ້ກຸ່ມໄວລຸ້ນດັ່ງກ່າວ ເຫັນໄດ້ເຖິງຜົນເສຍ ແລະ ໄພອັນຕະລາຍ ຂອງການຂັບຂີ່ລົດດັດແປງສະພາບ, ພ້ອມທັງອະທິບາຍຂໍ້ກຳນົດກົດໝາຍ ແລະ ລະບຽບການຈະລາຈອນທາງບົກ ໃຫ້ເຂົາເຈົ້າຮັບຮູ້ ແລະ ເຂົ້າໃຈຢ່າງເລິກເຊິ່ງ.
ພ້ອມນີ້, ໄດ້ເຮັດບົດບັນທຶກຮ່ວມກັບໄວລຸ້ນ ແລະ ເຊີນຜູ້ປົກຄອງ (ພໍ່ແມ່) ເຂົ້າມາຮັບຊາບ ເພື່ອຮ່ວມກັນຕິດຕາມ, ສຶກສາອົບຮົມ ແລະ ຕັກເຕືອນລູກຫຼານບໍ່ໃຫ້ປະພຶດຕົນຄືແນວນັ້ນອີກ. ພ້ອມດຽວກັນນັ້ນ ເຈົ້າໜ້າທີ່ກໍ່ໄດ້ໃຫ້ປ່ຽນຖ່າຍອຸປະກອນທີ່ດັດແປງ (ໂດຍສະເພາະທໍ່ຄວັນສຽງດັງ) ອອກ ແລະ ປ່ຽນໃສ່ອຸປະກອນເດີມທີ່ຖືກຕ້ອງຕາມມາດຕະຖານເຕັກນິກຂອງໂຮງງານ.
ຂ່າວຈາກ: ປກສ ແຂວງຫົວພັນ
