ຄໍາມ່ວນ ເປີດຕະຫຼາດນັດແຮງງານປະຈໍາປີ 2026 ຕ້ອງການແຮງງານ 1,762 ຕໍາແໜ່ງງານ
ແຂວງຄໍາມ່ວນ ເປີດງານຕະຫຼາດນັດແຮງງານປະຈໍາປີ 2026 ໃນວັນທີ 13-14 ຕຸລາ ທີ່ໂຮງຮຽນຄໍາມ່ວນ-ກວາງບິ່ງ ໂດຍມີ 111 ຕໍາແໜ່ງງານ, ຕ້ອງການແຮງງານ 1,762 ຄົນ ເພື່ອເປີດໂອກາດໃຫ້ຜູ້ຫວ່າງງານໄດ້ພົບປະນາຍຈ້າງ ແລະ ສະໝັກວຽກໂດຍກົງ.
ເຂົ້າຮ່ວມພິທີເປີດງານມີ ທ່ານ ເດດສັກດາ ມະນີຄໍາ ຮອງປະທານຄະນະກໍາມະການປົກຄອງແຂວງຄໍາມ່ວນ ແລະ ທ່ານ ພົງໄຊສັກ ອິນຖາລາດ ຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ພ້ອມດ້ວຍຕາງໜ້າພາກສ່ວນກ່ຽວຂ້ອງ ແລະ ບັນດາສະຖານປະກອບການເຂົ້າຮ່ວມ.
ພາຍໃນງານມີ 23 ຮ້ານ ໃຫ້ບໍລິການຮັບສະໝັກງານ, ຈັດຫາງານ ແລະ ປະກັນສັງຄົມ ພ້ອມທັງແນະແນວອາຊີບ, ສອນຂຽນປະຫວັດສະໝັກວຽກ ແລະ ຮັບລົງທະບຽນຜູ້ຕ້ອງການຝຶກສີມືແຮງງານ.
ຄາດວ່າຈະມີຜູ້ສະໝັກ ແລະ ສໍາພາດວຽກຈໍານວນ 1,000 ຄົນ, ໄດ້ຮັບຄໍາປຶກສາ ແລະ ແນະແນວອາຊີບ 500 ຄົນ ແລະ ຝຶກຂຽນປະຫວັດສະໝັກວຽກ 300 ຄົນ. ງານດັ່ງກ່າວຈັດຂຶ້ນ ເພື່ອເຊື່ອມໂຍງຜູ້ຊອກວຽກກັບນາຍຈ້າງ ແລະ ສົ່ງເສີມການຈ້າງງານໃຫ້ສອດຄ່ອງກັບຄວາມຕ້ອງການຂອງຕະຫຼາດແຮງງານ. ການຈັດງານຄັ້ງນີ້ໄດ້ຮັບການສະໜັບສະໜູນຫຼັກຈາກ ບໍລິສັດ ໄຟຟ້ານໍ້າເທີນ 2.
ຂ່າວ : ມະນີວັນ
