ລາຄານ້ຳມັນດິບປັບຕົວສູງຂຶ້ນ ໂດຍ WTI ພຸ່ງເຂົ້າໃກ້ 95 ໂດລາຕໍ່ບາເຣວ ຫຼັງຄວາມຂັດແຍ່ງໃນຕາເວັນອອກກາງປະທຸຂຶ້ນຢ່າງຕໍ່ເນື່ອງ.
ສຳນັກຂ່າວ Bloomberg ລາຍງານວ່າ ລາຄານ້ຳມັນດິບປັບຕົວສູງຂຶ້ນ ຫຼັງການໂຈມຕີໃນຕາເວັນອອກກາງເກີດຂຶ້ນອີກຄັ້ງ ສົ່ງຜົນໃຫ້ຄວາມບໍ່ແນ່ນອນກ່ຽວກັບການຟື້ນຕົວຂອງການຂົນສົ່ງພະລັງງານຈາກອ່າວເປີເຊຍເພີ່ມສູງຂຶ້ນ.ລາຄານ້ຳມັນດິບເວສຕ໌ເທັກຊັສ ອິນເຕີມີເດຍດ (WTI) ປັບຕົວສູງຂຶ້ນໃກ້ລະດັບ 95 ໂດລາຕໍ່ບາເຣວ ໃນຕອນເຊົ້າວັນພຸດ ທີ 14 ຕຸລາ 2026 ຫຼັງຈາກລາຄາຂະຫຍັບຂຶ້ນເລັກນ້ອຍໃນການຊື້ຂາຍກ່ອນໜ້ານີ້. ຂະນະທີ່ນ້ຳມັນດິບເບຣນທ໌ (Brent) ປັບຕົວຫຼຸດລົງ ແລະ ປິດຕະຫຼາດໃນວັນອັງຄານຕ່ຳກວ່າ 106 ໂດລາຕໍ່ບາເຣວ.
ສະຫະລັດລະບຸວ່າ ໄດ້ໃຫ້ການຊ່ວຍເຫຼືອໃນການຂົນສົ່ງນ້ຳມັນດິບຫຼາຍກວ່າ 19 ລ້ານບາເຣວ ຜ່ານຊ່ອງແຄບຮໍມຸຊ (Strait of Hormuz) ເຖິງແມ່ນວ່າການໂຈມຕີເຮືອບັນທຸກນ້ຳມັນຂອງອີຣ່ານໃນເສັ້ນທາງດັ່ງກ່າວຈະຮຸນແຮງຂຶ້ນ ແລະ ກຳລັງຄຸກຄາມການຟື້ນຕົວຫຼ້າສຸດຂອງອຸປະທານນ້ຳມັນຈາກອ່າວເປີເຊຍ ເຊິ່ງກັບມາໃກ້ຄຽງກັບລະດັບກ່ອນເກີດສົງຄາມ.ໃນພື້ນທີ່ອື່ນຂອງພາກພື້ນ ຊາອຸດີອາຣະເບຍໄດ້ສະກັດກັ້ນຂີປະນາວຸດ ແລະ ໂດຣນເພີ່ມເຕີມ ທີ່ກຸ່ມຮູຕີໃນເຢເມນຍິງເຂົ້າມາ. ຂະນະທີ່ການສູ້ລົບກັບກຸ່ມຕິດອາວຸດທີ່ໄດ້ຮັບການສະໜັບສະໜູນຈາກອີຣ່ານຍັງບໍ່ມີສັນຍານວ່າຈະຢຸດຕິລົງ.
ສຳນັກງານໃຫຍ່ຂອງ Saudi Aramco ບໍລິສັດນ້ຳມັນຂະໜາດໃຫຍ່ຂອງຊາອຸດີອາຣະເບຍ ໃນເຂດຕາເວັນອອກຂອງປະເທດ ຖືກໂຈມຕີຈົນເກີດໄຟໄໝ້ອາຄານ ໃນການໂຈມຕີລະລອກຫຼ້າສຸດ.
ລາຄານ້ຳມັນພຸ່ງຂຶ້ນຫຼາຍກວ່າ 70% ນັບແຕ່ຕົ້ນປີລາຄານ້ຳມັນດິບເບຣນທ໌ປັບຕົວສູງຂຶ້ນຫຼາຍກວ່າ 70% ນັບຕັ້ງແຕ່ຕົ້ນປີນີ້ ທ່າມກາງສົງຄາມລະຫວ່າງສະຫະລັດກັບອີຣ່ານ ທີ່ສ້າງຄວາມປັ່ນປ່ວນໃຫ້ແກ່ຕະຫຼາດພະລັງງານ.
ຄວາມສ່ຽງຍິ່ງເພີ່ມສູງຂຶ້ນ ຫຼັງຈາກກຸ່ມຮູຕີໂຈມຕີສະໜາມບິນຫຼັກໃນກຸງຣິຢາດ ເມືອງຫຼວງຂອງຊາອຸດີອາຣະເບຍ ໃນອາທິດຜ່ານມາ. ຂະນະດຽວກັນ ກອງກຳລັງທີ່ໄດ້ຮັບການສະໜັບສະໜູນຈາກຊາອຸດີອາຣະເບຍ ໄດ້ເປີດປະຕິບັດການຍຶດຄືນພື້ນທີ່ໃນເຢເມນທີ່ຢູ່ພາຍໃຕ້ການຄວບຄຸມຂອງກຸ່ມກະບົດ.
