ຈັບຕາ! ຈູລຽນ ວອດ ມີລຸ້ນອາດຫວນຄືນສູ່ ລິເວີພູ! ຈາກອະດີດຜູ້ອຳນວຍການກິລາ ສູ່ການກັບມາຮັບບົດບາດອີກຄັ້ງ!

ຈູລຽນ ວອດ (Julian Ward) ຜູ້ອຳນວຍການຝ່າຍເຕັກນິກຂອງ Fenway Sports Group (FSG) ກຳລັງຖືກຄາດໝາຍວ່າ ອາດຈະໄດ້ຮັບການແຕ່ງຕັ້ງໃຫ້ກັບຄືນມາເຮັດໜ້າທີ່ ຜູ້ອຳນວຍການກິລາຄົນໃໝ່ຂອງ ລິເວີພູນ ຫຼັງຈາກທີ່ລາວເຄີຍດຳລົງຕຳແໜ່ງນີ້ມາແລ້ວ.

ເດວິດ ອອນສະຕີນ ນັກຂ່າວຊື່ດັງຈາກ The Athletic ລາຍງານວ່າ ວອດ ເປັນໜຶ່ງໃນຕົວເຕັງທີ່ມີໂອກາດເຂົ້າມາແທນ ຣິຊາດ ຮິວສ໌ (Richard Hughes) ທີ່ອຳລາຕຳແໜ່ງຜູ້ອຳນວຍການກິລາຂອງ ລິເວີພູນ ໃນວັນທີ 5 ກັນຍາທີ່ຜ່ານມາ.

ຮິວສ໌ ເຄີຍຮັບໜ້າທີ່ຜູ້ອຳນວຍການກິລາຂອງ ລິເວີພູນ ປະມານ 2 ປີເຄິ່ງ ກ່ອນຈະຍ້າຍໄປຮ່ວມງານກັບ ໄຊມອນ ຟຣານຊິສ ອະດີດເພື່ອນຮ່ວມງານ ທີ່ສະໂມສອນ ອັນ ຮິລາລ ໃນລີກຊາອຸດີອາຣະເບຍ.

ວອດ ອາຍຸ 45 ປີ ກາຍເປັນຕົວເລືອກສຳຄັນຂອງສະໂມສອນ ໂດຍຂະບວນການຄັດເລືອກທີ່ນຳໂດຍກຸ່ມເຈົ້າຂອງ ລິເວີພູນ ກຳລັງເຂົ້າສູ່ຂັ້ນຕອນສຸດທ້າຍ.

ຫາກໄດ້ຮັບການແຕ່ງຕັ້ງ ວອດ ຈະຫວນຄືນມາຮັບຕຳແໜ່ງຜູ້ອຳນວຍການກິລາຂອງ ລິເວີພູນ ເປັນຄັ້ງທີ 2 ຫຼັງຈາກເຄີຍເຮັດໜ້າທີ່ນີ້ໃນລະດູການ 2022/23.

ເສັ້ນທາງຈາກແມວມອງ ສູ່ຜູ້ອຳນວຍການກິລາ

ວອດ ຍ້າຍຈາກ ແມນເຊັສເຕີ ຊິຕີ ມາຮ່ວມງານກັບ ລິເວີພູນ ໃນປີ 2012 ໂດຍເລີ່ມຕົ້ນຈາກຕຳແໜ່ງຜູ້ຈັດການຝ່າຍແມວມອງນັກເຕະໃນຕະຫຼາດເອີຣົບ ໂດຍຮັບຜິດຊອບຕະຫຼາດສະເປນ ແລະ ປອກຕຸຍການເປັນຫຼັກ.

ຈາກນັ້ນ ລາວໄດ້ຍ້າຍໄປຮັບຜິດຊອບດ້ານເສັ້ນທາງນັກເຕະທີ່ຖືກປ່ອຍຢືມ ແລະ ວຽກງານຮ່ວມມືດ້ານກິລາ.

ໃນປີ 2020 ວອດ ໄດ້ຮັບການເລື່ອນຕຳແໜ່ງເປັນ ຜູ້ຊ່ວຍຜູ້ອຳນວຍການກິລາ ແລະ ໄດ້ເຮັດວຽກຮ່ວມກັບ ໄມເຄິລ ເອັດເວີດສ໌ ກ່ອນຈະຖືກວາງຕົວໃຫ້ເປັນຜູ້ສືບທອດຕຳແໜ່ງ ຫຼັງຈາກ ເອັດເວີດສ໌ ອຳລາສະໂມສອນໃນປີ 2022.

ໃນເດືອນພະຈິກ 2022 ມີການຢືນຢັນວ່າ ວອດ ໄດ້ແຈ້ງໃຫ້ FSG ຮັບຊາບເຖິງຄວາມຕັ້ງໃຈທີ່ຈະອຳລາ ລິເວີພູນ ຫຼັງຈົບລະດູການ 2022/23.

ເຖິງແມ່ນຈະຮັບຕຳແໜ່ງພຽງລະດູການດຽວ ແຕ່ວອດ ກໍມີບົດບາດສຳຄັນໃນການດຶງຕົວນັກເຕະຫຼາຍຄົນມາຮ່ວມທີມ ເຊັ່ນ ຫຼຸຍສ໌ ດີອາຊ, ດາວິນ ນູເຢຊ ແລະ ໂກດີ ຄັກໂປ.

ນອກຈາກນີ້ ວອດ ຍັງຢູ່ຊ່ວຍສະໂມສອນຈົນເຖິງຊ່ວງຊຳເມີ 2023 ເພື່ອຊ່ວຍຜັກດັນດີວຄວ້າ ອາເລັກຊິສ ແມັກ ອັລລິສເຕີ ຈາກ ໄບຣຕັນ ແອນດ໌ ໂຮຟ ອັນເບຍນ ໃຫ້ສຳເລັດ.

ບົດບາດໃໝ່ກັບ FSG

ໃນປີ 2024 ວອດ ໄດ້ຮັບການແຕ່ງຕັ້ງເປັນ ຜູ້ອຳນວຍການຝ່າຍເຕັກນິກຂອງ FSG ຫຼັງຈາກ ເອັດເວີດສ໌ ກັບຄືນມາຮ່ວມງານກັບອົງກອນ.

ໜ້າທີ່ຂອງວອດ ຄອບຄຸມເຖິງການວາງແຜນພັດທະນານັກເຕະ ລວມເຖິງລະບົບອະຄາເດມີ ແລະ ໂຄງສ້າງດ້ານກິລາຂອງອົງກອນ.

ເດີມທີ FSG ມີແຜນໃຫ້ວອດເຂົ້າໄປດູແລວຽກງານດ້ານກິລາຂອງສະໂມສອນອີກແຫ່ງ ຖ້າການຊື້ກິດຈະການເກີດຂຶ້ນ. ແຕ່ The Athletic ລາຍງານວ່າ ແຜນການດັ່ງກ່າວຖືກລະງັບໄວ້.

ລິເວີພູນກັບການປ່ຽນແປງເບື້ອງຫຼັງ

ການກັບຄືນຂອງວອດ ເກີດຂຶ້ນໃນຊ່ວງທີ່ ລິເວີພູນ ກຳລັງປັບປ່ຽນໂຄງສ້າງຫຼາຍດ້ານ.

ກ່ອນໜ້ານີ້ FSG ໄດ້ບັນລຸຂໍ້ຕົກລົງຂາຍຫຸ້ນສ່ວນໜຶ່ງຂອງ ລິເວີພູນ ໃຫ້ກັບກຸ່ມທຶນ 1892 Holdings ເຊິ່ງນຳໂດຍ ອາມິດ ບາເທຍ ພ້ອມດ້ວຍນັກລົງທຶນລາຍອື່ນໆ ລວມເຖິງ ເຈັຟ ເບຊອສ ຜູ້ກໍ່ຕັ້ງ Amazon ແລະ ເອດູອາໂດ ເຊເວີຣິນ ຜູ້ຮ່ວມກໍ່ຕັ້ງ Facebook.

ຂະນະດຽວກັນ ເອັດເວີດສ໌ ກໍກ້າວລົງຈາກຕຳແໜ່ງຊີອີໂອຝ່າຍກິລາຂອງ FSG ໃນເດືອນກໍລະກົດ ໃນຂະນະທີ່ ມາກ ເບີຊິລ ແລະ ເຄຣັກ ແມັກຄີ ບຸກຄະລາກອນຝ່າຍສັນຫານັກເຕະອີກ 2 ຄົນ ກໍມີລາຍງານວ່າໄດ້ອຳລາສະໂມສອນ ແລະ ຍ້າຍໄປຮ່ວມງານກັບ ອັນ ຮິລາລ.

ການກັບຄືນຂອງວອດຈະໝາຍເຖິງຫຍັງຕໍ່ ລິເວີພູນ?

ເຈມສ໌ ເພຍສ໌ ນັກຂ່າວສາຍ ລິເວີພູນ ຂອງ The Athletic ລະບຸວ່າ ການດຶງວອດກັບຄືນມາ ອາດຊ່ວຍໃຫ້ສະໂມສອນມີຄວາມຕໍ່ເນື່ອງຫຼາຍຂຶ້ນ ຫຼັງຈາກເກີດການປ່ຽນແປງບຸກຄະລາກອນລະດັບສູງຫຼາຍຕຳແໜ່ງ.

ວອດ ມີປະສົບການເຮັດວຽກກັບ ລິເວີພູນ ລວມແລ້ວປະມານ 13 ປີ ຈາກການເຮັດວຽກ 2 ຊ່ວງ ແລະ ຍັງມີສາຍສຳພັນຢ່າງກວ້າງຂວາງໃນວົງການບານເຕະລະດັບໂລກ.

ລາວຍັງມີປະສົບການໃນການເຈລະຈາດີນັກເຕະ, ການຕໍ່ສັນຍາ ແລະ ການວາງແຜນພັດທະນານັກເຕະ ພ້ອມທັງເຂົ້າໃຈບົດບາດຂອງຜູ້ອຳນວຍການກິລາເປັນຢ່າງດີ ຈາກການເຄີຍເຮັດວຽກເຄີຍຄຽງກັບ ເອັດເວີດສ໌.

ແນວໃດກໍຕາມ ບົດບາດຂອງຜູ້ອຳນວຍການກິລາໃນປັດຈຸບັນ ແຕກຕ່າງຈາກຊ່ວງທີ່ວອດເຄີຍຮັບຕຳແໜ່ງໃນລະດູການ 2022/23.

ໃນເວລານັ້ນ ເຈີເກັນ ຄລັອບ ຍັງມີບົດບາດສຳຄັນຢ່າງຫຼາຍຕໍ່ການບໍລິຫານທີມ ເຮັດໃຫ້ຂອບເຂດໜ້າທີ່ຂອງຜູ້ອຳນວຍການກິລາມີຄວາມແຕກຕ່າງຈາກປັດຈຸບັນ.

ແຕ່ປັດຈຸບັນ ລິເວີພູນ ໃຊ້ໂຄງສ້າງການເຮັດວຽກທີ່ມີ ຜູ້ອຳນວຍການກິລາເປັນຈຸດສູນກາງ ຫຼາຍຂຶ້ນ ເຮັດໃຫ້ສາຍການບັນຊາ ແລະ ການແບ່ງໜ້າທີ່ລະຫວ່າງຝ່າຍບໍລິຫານກິລາກັບທີມງານໂຄດຊັດເຈນຂຶ້ນ.

ດັ່ງນັ້ນ ຖ້າການແຕ່ງຕັ້ງເກີດຂຶ້ນຈິງ ການກັບຄືນຂອງ ຈູລຽນ ວອດ ຈະເກີດຂຶ້ນໃນຊ່ວງສຳຄັນຂອງ ລິເວີພູນ ໂດຍລາວຈະຕ້ອງຮັບຜິດຊອບທັງດ້ານການສັນຫານັກເຕະ, ການເຈລະຈາສັນຍາ, ການພັດທະນານັກເຕະ ແລະ ທິດທາງດ້ານກິລາໃນລະຍະຍາວຂອງສະໂມສອນ.