ປິດສາກການໄລ່ລ່າ 9 ວັນ ຂ້າມ 3 ລັດ! ເຈົ້າໜ້າທີ່ສະຫະລັດຈັບກຸມນັກໂທດຄາດຕະກຳແຫກຄຸກຈາກລັດເທນເນສຊີໄດ້ແລ້ວ ຫຼັງຜູ້ກ່ຽວຂັບລົດທີ່ລັກມາໄປຕິດຂີ້ຕົມ.

AD

AD

AD

ເຈົ້າໜ້າທີ່ສະຫະລັດລະດົມກຳລັງຮ່ວມກັນຈັບກຸມ “ເຈຄອບ ອັນເລນ ມໍລີ” ນັກໂທດຄະດີຂ້າຄາດຕະກຳເພື່ອນຮ່ວມງານ ແລະທຳລາຍສົບ ທີ່ຫຼົບໜີອອກຈາກຄຸກໃນລັດເທນເນສຊີໄດ້ສຳເລັດ ຫຼັງຈາກເປີດປະຕິບັດການໄລ່ລ່າຂ້າມ 3 ລັດ ເປັນເວລາດົນກວ່າ 9 ວັນ.

ການຫຼົບໜີຂອງລາວສິ້ນສຸດລົງ ຫຼັງຈາກຂັບລົດກະບະທີ່ລັກມາຈົນອອກນອກເສັ້ນທາງ ແລະຕິດຂີ້ຕົມຢູ່ໃນລັດມິສຊູຣີ. ເມື່ອກວດຄົ້ນລົດ ເຈົ້າໜ້າທີ່ພົບປືນ 3 ກະບອກ ເຊິ່ງມີລາຍງານວ່າເປັນອາວຸດທີ່ຖືກລັກມາ ໂດຍກຽມແຈ້ງຂໍ້ຫາເພີ່ມເຕີມ.

ເຈົ້າໜ້າທີ່ສະຫະລັດສາມາດຈັບກຸມ ເຈຄອບ ອັນເລນ ມໍລີ ອາຍຸ 28 ປີ ນັກໂທດຄະດີຄາດຕະກຳທີ່ຫຼົບໜີອອກຈາກຄຸກໃນລັດເທນເນສຊີໄດ້ແລ້ວ ຫຼັງຈາກຕິດຕາມໄລ່ລ່າເປັນເວລາ 9 ວັນ ຄອບຄຸມພື້ນທີ່ 3 ລັດ ໂດຍການຫຼົບໜີຄັ້ງນີ້ສິ້ນສຸດລົງເມື່ອລາວຂັບລົດອອກນອກເສັ້ນທາງ ແລະຕິດຂີ້ຕົມຢູ່ໃນລັດມິສຊູຣີ.

ສຳນັກງານສືບສວນລັດເທນເນສຊີ (TBI) ເປີດເຜີຍວ່າ ມໍລີຖືກຈັບກຸມໃນລະຫວ່າງປະຕິບັດການຮ່ວມຂອງເຈົ້າໜ້າທີ່ທ້ອງຖິ່ນ ໜ່ວຍງານລະດັບລັດ ແລະໜ່ວຍງານລັດຖະບານກາງ ຫຼັງໄດ້ຮັບເບາະແສວ່າ ລາວກຳລັງລີ້ຊ່ອນຢູ່ໃນລັດອິລິນອຍ ແລະໄດ້ລັກລົດກະບະອີກຄັນຈາກຟາມແຫ່ງໜຶ່ງ.

ເຈົ້າໜ້າທີ່ໄດ້ຕິດຕາມປ້າຍທະບຽນລົດຜ່ານລະບົບອ່ານປ້າຍທະບຽນອັດຕະໂນມັດ ແລະກ້ອງວົງຈອນປິດ FLOCK ກ່ອນຈະພົບລົດຄັນດັ່ງກ່າວແລ່ນຢູ່ເທິງທາງຫຼວງໝາຍເລກ 291 ໃນລັດມິສຊູຣີ.

ຕຳຫຼວດທາງຫຼວງລັດມິສຊູຣີໄດ້ເຂົ້າຈັບກຸມມໍລີໃນເຂດແຄໂຣລ ເມື່ອເວລາປະມານ 11 ໂມງ 34 ນາທີ ຂອງວັນອັງຄານຕາມເວລາທ້ອງຖິ່ນ ໂດຍລາວບໍ່ໄດ້ຂັດຂືນການຈັບກຸມ. ພ້ອມກັນນີ້ ເຈົ້າໜ້າທີ່ຍັງພົບປືນ 3 ກະບອກຢູ່ໃນລົດ ເຊິ່ງມີລາຍງານວ່າເປັນປືນທີ່ຖືກລັກມາ.

ມໍລີຫຼົບໜີອອກຈາກຄຸກຄວາມປອດໄພສູງ North West Correctional Complex ໃນເມືອງ Tiptonville ລັດເທນເນສຊີ ໃນຄືນວັນທີ 25 ຕຸລາ ຂະນະກຳລັງຮັບໂທດຈຳຄຸກຕະຫຼອດຊີວິດ ຈາກຄະດີຄາດຕະກຳເພື່ອນຮ່ວມງານ ຊື່ Cody Burchfield ໃນປີ 2022.

ພາບຈາກກ້ອງວົງຈອນປິດເຜີຍໃຫ້ເຫັນວ່າ ມໍລີສວມຊຸດນັກໂທດ ແລະປີນຂ້າມຮົ້ວຮັກສາຄວາມປອດໄພ ກ່ອນຈະໄປລີ້ຊ່ອນຢູ່ບໍລິເວນດ້ານຫຼັງຫ້ອງຄົວຂອງຄຸກ ແລະລັກລົດກະບະ Ford ຈາກຟາມໃກ້ຄຽງໃນຊ່ວງເຊົ້າມືດຂອງວັນທີ 26 ຕຸລາ.

ຫຼັງຈາກຫຼົບໜີ ລາວໄດ້ຂັບລົດຂ້າມລັດໄປຍັງເມືອງ Marion ໃນລັດອິລິນອຍ ກ່ອນຈະປະຖິ້ມລົດຄັນທຳອິດ ແລະຫາຍຕົວໄປເປັນເວລາ 8 ວັນ ເຮັດໃຫ້ເຈົ້າໜ້າທີ່ຕ້ອງອອກປະກາດເຕືອນປະຊາຊົນ ພ້ອມທັງເພີ່ມຊື່ລາວເຂົ້າໃນບັນຊີລາຍຊື່ຜູ້ຕ້ອງການຕົວຫຼາຍທີ່ສຸດ ແລະປະກາດມອບເງິນລາງວັນສຳລັບຜູ້ແຈ້ງເບາະແສ.

ຕໍ່ມາ ເຈົ້າໜ້າທີ່ໄດ້ຮັບເບາະແສວ່າ ມໍລີລີ້ຊ່ອນຕົວຢູ່ໃນກະຕ່ອມພາຍໃນເຂດພັກລ່າສັດໃກ້ກັບເມືອງ Marion ກ່ອນຈະລັກລົດກະບະອີກຄັນໜຶ່ງໄປໃຊ້. ໂດຍລາວໄດ້ຂຽນຂໍ້ຄວາມດ້ວຍລາຍມືເພື່ອຂໍໂທດເຈົ້າຂອງລົດ ພ້ອມຝາກຂໍ້ຄວາມບອກແມ່ວ່າຕົນຮັກແມ່ ເຊິ່ງຂໍ້ຄວາມດັ່ງກ່າວຊ່ວຍໃຫ້ເຈົ້າໜ້າທີ່ເຊື່ອມໂຍງເບາະແສຈົນສາມາດຕິດຕາມຫາຕົວລາວໄດ້.

ມໍລີຖືກຕັດສິນວ່າມີຄວາມຜິດຖານຄາດຕະກຳ ຈາກກໍລະນີການເສຍຊີວິດຂອງ Cody Burchfield ເພື່ອນຮ່ວມງານໃນປີ 2022 ຫຼັງຈາກພົບສົບຂອງ Burchfield ຢູ່ໃນກ່ອງໂລຫະໃຕ້ເຮືອນຂອງມໍລີ ຫຼາຍສັບປະດາຫຼັງຈາກຄອບຄົວແຈ້ງວ່າລາວຫາຍຕົວໄປ.

ຜົນການຊັນສູດລະບຸວ່າ Burchfield ເສຍຊີວິດຈາກການຖືກຍິງເຂົ້າທີ່ທ້າຍທອຍດ້ານຫຼັງ ແລະປອກກະສຸນທີ່ພົບຍັງກົງກັບອາວຸດປືນທີ່ພົບຢູ່ໃນເຮືອນຂອງມໍລີອີກດ້ວຍ.

ນອກຈາກຄະດີຄາດຕະກຳແລ້ວ ມໍລີຍັງຖືກຕັດສິນວ່າມີຄວາມຜິດໃນຂໍ້ຫາບຸກລຸກເຄຫະສະຖານໂດຍມີເຫດຮ້າຍແຮງ ທຳລາຍຊັບສິນ ປອມແປງ ຫຼືທຳລາຍຫຼັກຖານ ແລະຫຼົບໜີການຈັບກຸມ. ລາວຖືກພິພາກສາໃຫ້ຈຳຄຸກຕະຫຼອດຊີວິດໃນເດືອນມິຖຸນາ 2025 ແລະຄຳຮ້ອງຂໍໃຫ້ພິຈາລະນາຄະດີໃໝ່ກໍຖືກປະຕິເສດໃນເດືອນພຶດສະພາທີ່ຜ່ານມາ.

ການຫຼົບໜີຄັ້ງນີ້ຍັງສ້າງຄວາມກັງວົນໃຫ້ແກ່ຄອບຄົວຂອງຜູ້ເສຍຊີວິດ ໂດຍຍາດຂອງ Burchfield ລະບຸວ່າ ການຫຼົບໜີຂອງຜູ້ກໍ່ເຫດໄດ້ປຸກຄວາມເຈັບປວດ ແລະບາດແຜທາງຈິດໃຈທີ່ເຄີຍເກີດຂຶ້ນໃຫ້ກັບມາອີກຄັ້ງ.

ເຈົ້າໜ້າທີ່ລະບຸວ່າ ມໍລີຈະຖືກດຳເນີນຄະດີເພີ່ມເຕີມໃນລັດເທນເນສຊີ ຈາກຂໍ້ຫາຫຼົບໜີອອກຈາກຄຸກ ທຳລາຍຊັບສິນ ແລະລັກຊັບ ຂະນະທີ່ລາວອາດຈະປະເຊີນກັບຂໍ້ຫາເພີ່ມເຕີມໃນລັດອິລິນອຍ ແລະລັດມິສຊູຣີອີກດ້ວຍ.

ການຫຼົບໜີຂອງມໍລີເກີດຂຶ້ນໃນຊ່ວງທີ່ກົມລາຊະທັນທັນຂອງລັດເທນເນສຊີກຳລັງຖືກກວດສອບບັນຫາດ້ານຄວາມປອດໄພ ໂດຍລາວເປັນນັກໂທດຄົນທີ 2 ທີ່ຫຼົບໜີຈາກການຄວບຄຸມຂອງໜ່ວຍງານໃນເດືອນຕຸລາ ຫຼັງຈາກກ່ອນໜ້ານີ້ Gregory Redden ອາຍຸ 63 ປີ ໄດ້ຫຼົບໜີອອກຈາກໂຮງໝໍໃນເມືອງ Nashville ເມື່ອວັນທີ 21 ຕຸລາ ກ່ອນຈະຖືກຈັບກຸມໄດ້ໃນພາຍຫຼັງ.

ນອກຈາກນີ້ ຄຸກ North West Correctional Complex ເຊິ່ງສາມາດຮອງຮັບນັກໂທດໄດ້ເຖິງ 1,776 ຄົນ ຍັງເຄີຍເກີດເຫດຮຸນແຮງຫຼາຍຄັ້ງໃນຊ່ວງຫຼາຍປີຜ່ານມາ ໂດຍໃນເດືອນກໍລະກົດ ຄະນະລູກຂຸນໃຫຍ່ໄດ້ອອກຄຳຟ້ອງຫຼາຍສິບຄະດີ ກ່ຽວກັບການທຳຮ້າຍເຈົ້າໜ້າທີ່ ແລະການຄາດຕະກຳນັກໂທດ 5 ຄົນ.

ທີ່ມາ: CNN / BBC